T20 World Cup : અમદાવાદમાં રમાઈ રહેલી T20 વર્લ્ડ કપ 2026 ની ફાઇનલમાં ભારત જીતની એકદમ નજીક પહોંચી ગયું છે. 256 રનના વિશાળ લક્ષ્યાંકનો પીછો કરવા ઉતરેલી ન્યૂઝીલેન્ડની ટીમ 17 ઓવરના અંતે 8 વિકેટ ગુમાવીને 143 રન બનાવી શકી છે. હવે કીવી ટીમને જીતવા માટે બાકીની 4 ઓવરમાં અશક્ય જણાતા 113 રન કરવાના છે, એટલે કે દરેક ઓવરમાં 26 રનથી વધુની જરૂર છે.
ભારતીય બોલરોનો દબદબો
ન્યૂઝીલેન્ડની શરૂઆતથી જ ભારતીય બોલરોએ દબાણ બનાવી રાખ્યું હતું. અક્ષર પટેલે શાનદાર બોલિંગ કરતા 3 મહત્વની વિકેટ ઝડપી છે, જેમાં ફિન એલન, ગ્લેન ફિલિપ્સ અને ડેરીલ મિચેલનો સમાવેશ થાય છે. જસપ્રીત બુમરાહે પણ પોતાની આગવી શૈલીમાં બોલિંગ કરતા રચિન રવીન્દ્રને પેવેલિયન ભેગો કર્યો હતો. હાર્દિક પંડ્યાએ પણ માર્ક ચેપમેન અને સેટ બેટર ટિમ સીફર્ટને આઉટ કરીને ન્યૂઝીલેન્ડની આશાઓ પર પાણી ફેરવી દીધું હતું.
બુમરાહ અને અક્ષરનો ઘાતક સ્પેલ
જસપ્રીત બુમરાહે ચોથી ઓવરમાં જ ભારતને સફળતા અપાવી હતી, જ્યારે અક્ષર પટેલે મિડલ ઓવરોમાં કીવી બેટર્સને સેટ થવા દીધા ન હતા. વરુણ ચક્રવર્તીની એક ઓવરમાં મિચેલ સેન્ટનરે બે છગ્ગા ફટકારી લડત આપવાનો પ્રયાસ કર્યો હતો, પરંતુ વિશાળ ટાર્ગેટ સામે તે અપૂરતો સાબિત થયો છે. ન્યૂઝીલેન્ડની 8 વિકેટ પડી ગઈ છે અને ભારત હવે માત્ર 2 વિકેટ દૂર છે.
ભારતીય ઇનિંગના ઐતિહાસિક રેકોર્ડ્સ
આ પહેલા પ્રથમ બેટિંગ કરતા ભારતે 255/5 નો સ્કોર બનાવ્યો હતો, જે T20 વર્લ્ડ કપ ફાઇનલનો સૌથી મોટો સ્કોર છે. સંજુ સેમસને 89 રનની ઐતિહાસિક ઇનિંગ રમી હતી. અભિષેક શર્મા (52) અને ઈશાન કિશન (54) ની અડધી સદીઓએ ટીમને મજબૂત પાયો આપ્યો હતો. ભારતે પાવરપ્લેમાં 92 રન બનાવીને વર્લ્ડ રેકોર્ડ બનાવ્યો હતો, જેને કીવી બોલરોને દબાણમાં લાવી દીધા હતા.
ચેમ્પિયન બનવાની તૈયારી
અમદાવાદનું નરેન્દ્ર મોદી સ્ટેડિયમ હવે ભારતીય ફેન્સના નાદથી ગુંજી રહ્યું છે. જે મેદાન પર 2023 માં નિરાશા મળી હતી, ત્યાં જ હવે ઇતિહાસ રચાવા જઈ રહ્યો છે. સૂર્યકુમાર યાદવની કેપ્ટન્સીમાં ટીમ ઈન્ડિયા ટૂંક સમયમાં જ T20 વર્લ્ડ કપની ટ્રોફી પોતાના નામે કરે તેવી પૂરી શક્યતા છે.
બન્ને ટીમની પ્લેઇંગ-11
ભારત (IND) : સૂર્યકુમાર યાદવ (કેપ્ટન), સંજુ સેમસન (વિકેટકીપર), અભિષેક શર્મા, ઈશાન કિશન, હાર્દિક પંડ્યા, તિલક વર્મા, શિવમ દુબે, અક્ષર પટેલ, અર્શદીપ સિંહ, જસપ્રીત બુમરાહ અને વરુણ ચક્રવર્તી.
ન્યૂઝીલેન્ડ (NZ) : મિચેલ સેન્ટનર (કેપ્ટન), ફિન એલન, ટિમ સેફર્ટ (વિકેટકીપર), રચિન રવીન્દ્ર, ગ્લેન ફિલિપ્સ, માર્ક ચેપમેન, ડેરીલ મિચેલ, જિમી નીશમ, મેટ હેનરી, જેકબ ડફી અને લોકી ફર્ગ્યુસન.
