T20 World Cup : T20 વર્લ્ડ કપના સુપર-8 રાઉન્ડમાં આજે રોમાંચ તેની ચરમસીમાએ છે. કોલકાતાના ઐતિહાસિક ઈડન ગાર્ડન્સ મેદાન પર ભારત અને વેસ્ટ ઇન્ડીઝ વચ્ચે સેમિફાઈનલમાં પહોંચવા માટે આરપારની જંગ ચાલી રહી છે. પ્રથમ બેટિંગ કરતા વેસ્ટ ઇન્ડીઝે આક્રમક ગેમ બતાવી ભારત સામે મોટો સ્કોર ખડક્યો છે. બીજી તરફ, સાઉથ આફ્રિકાએ ઝિમ્બાબ્વેને હરાવીને ગ્રુપ-1 માં ટોપનું સ્થાન મેળવી લીધું છે.
વેસ્ટ ઇન્ડીઝની આક્રમક બેટિંગ
ટોસ હારીને પ્રથમ બેટિંગ કરવા ઉતરેલી વેસ્ટ ઇન્ડીઝની ટીમે નિર્ધારિત 20 ઓવરમાં 4 વિકેટ ગુમાવીને 195 રન બનાવ્યા છે. વેસ્ટ ઇન્ડીઝ તરફથી રોસ્ટન ચેઝે સૌથી વધુ 40 રનનું યોગદાન આપ્યું હતું. જોકે, અંતિમ ઓવરોમાં જેસન હોલ્ડર (37*) અને કેપ્ટન રોવમેન પોવેલે (34*) વિસ્ફોટ બેટિંગ કરી હતી. આ બંને વચ્ચે પાંચમી વિકેટ માટે માત્ર 35 બોલમાં 76 રનની નોટઆઉટ પાર્ટનરશીપ થઈ હતી, જેના કારણે ટીમ મજબૂત સ્થિતિમાં પહોંચી શકી.
ભારતીય બોલિંગ અને ફિલ્ડિંગ
ભારત તરફથી સ્ટાર બોલર જસપ્રીત બુમરાહે શાનદાર પ્રદર્શન કરતા 2 વિકેટ ઝડપી હતી. જસપ્રીત બુમરાહે એક જ ઓવરમાં હેટમાયર અને ચેઝને આઉટ કરીને ભારતને મેચમાં પરત લાવવાનો પ્રયાસ કર્યો હતો. જોકે, ભારતની ફિલ્ડિંગ આજે નબળી રહી હતી. અભિષેક શર્માએ બે મહત્વના કેચ છોડ્યા હતા, જે ભારતને મોંઘા પડ્યા. વરુણ ચક્રવર્તી અને હાર્દિક પંડ્યાએ 1-1 વિકેટ લીધી હતી. હવે સેમિફાઇનલમાં પહોંચવા માટે ભારતે 196 રન બનાવવા પડશે.
બંને ટીમોની પ્લેઇંગ-11
ભારત (IND) : સૂર્યકુમાર યાદવ (કેપ્ટન), સંજુ સેમસન, અભિષેક શર્મા, ઈશાન કિશન, હાર્દિક પંડ્યા, તિલક વર્મા, શિવમ દુબે, અક્ષર પટેલ, અર્શદીપ સિંહ, જસપ્રીત બુમરાહ અને વરુણ ચક્રવર્તી.
વેસ્ટ ઇન્ડીઝ (WI) : શાઈ હોપ (કેપ્ટન), રોસ્ટન ચેઝ, શિમરોન હેટમાયર, રોવમન પોવેલ, શેરફન રધરફોર્ડ, રોમારિયો શેફર્ડ, જેસન હોલ્ડર, અકીલ હૌસેન, મેથ્યુ ફોર્ડ, ગુડાકેશ મોતી અને શમાર જોસેફ.
સાઉથ આફ્રિકાની શાનદાર જીત
T20 વર્લ્ડ કપમાં સાઉથ આફ્રિકાએ પોતાનું વિજયી અભિયાન ચાલુ રાખતા ઝિમ્બાબ્વે સામે 5 વિકેટથી શાનદાર જીત નોંધાવી છે. આ વિજય સાથે જ પ્રોટીઝ ટીમ ગ્રુપ-1 ના પોઈન્ટ્સ ટેબલમાં નંબર-1 પર પહોંચી ગઈ છે. ઝિમ્બાબ્વેના સિકંદર રઝાની 73 રનની લડાયક ઈનિંગના જવાબમાં સાઉથ આફ્રિકાએ ડેવાલ્ડ બ્રેવિસના આક્રમક 42 રનની મદદથી માત્ર 17.5 ઓવરમાં લક્ષ્યાંક હાંસલ કરી લીધો હતો. હવે સાઉથ આફ્રિકાની ટીમ 4 માર્ચના રોજ કોલકાતાના ઈડન ગાર્ડન્સ ખાતે પ્રથમ સેમિફાઇનલમાં ન્યુઝીલેન્ડ સામે ટકરાશે.
