T20 World Cup : સામાન્ય રીતે જ્યારે પણ ટીમ ઇન્ડિયા મોટા રન ચેઝ (160+) કરતી હોય ત્યારે ચાહકોની નજર વિરાટ કોહલી પર હોય છે. પરંતુ T20 વર્લ્ડ કપ 2026 માં વેસ્ટ ઇન્ડીઝ સામેની 'કરો યા મરો' મેચમાં વિરાટ કોહલીની ગેરહાજરીમાં સંજુ સેમસન અસલી 'ચેઝ માસ્ટર' તરીકે ઉભરી આવ્યો છે. સંજુએ માત્ર ટીમને જીતાડી જ નહીં, પરંતુ વિરાટ કોહલીના વર્ષો જૂના રેકોર્ડને તોડીને ભારતીય ક્રિકેટમાં એક નવો અધ્યાય લખ્યો છે.
સંજુ સેમસન : રેકોર્ડ બ્રેકર ઇનિંગ
આ મેચમાં સંજુ સેમસને માત્ર 50 બોલમાં નોટઆઉટ 97* રનની વિસ્ફોટક ઇનિંગ રમી હતી. આ સાથે જ તેને T20 વર્લ્ડ કપના રન ચેઝમાં ભારતીય બેટર દ્વારા સૌથી વધુ વ્યક્તિગત સ્કોરનો વિરાટ કોહલીનો રેકોર્ડ (82* રન) તોડી નાખ્યો છે. સંજુની આ ઇનિંગમાં 12 ચોગ્ગા અને 4 ગગનચુંબી છગ્ગાનો સમાવેશ થાય છે. તેની આ રમતને કારણે ભારત સેમીફાઇનલમાં પ્રવેશવામાં સફળ રહ્યું છે.
મુખ્ય રેકોર્ડ્સ અને સિદ્ધિઓ
સંજુ સેમસને આ એક જ મેચમાં અનેક ઐતિહાસિક સિદ્ધિઓ પોતાના નામે કરી છે:
વર્લ્ડ કપ ચેઝમાં સર્વોચ્ચ સ્કોર : 97* રન સાથે સંજુ હવે T20 વર્લ્ડ કપ રન-ચેઝમાં સૌથી વધુ સ્કોર કરનાર ભારતીય બેટર બન્યો છે. તેને વિરાટ કોહલીના 82* ના રેકોર્ડને પાછળ છોડ્યો.
ભારતનો સૌથી મોટો રન-ચેઝ : વેસ્ટ ઈન્ડિઝ સામે 196 રનનો પીછો કરીને ભારતે T20 વર્લ્ડ કપ ઇતિહાસમાં પોતાનો સૌથી સફળ રન-ચેઝ નોંધાવ્યો છે.
વિકેટકીપર તરીકે નવો કીર્તિમાન : સંજુએ T20I માં ભારતીય વિકેટકીપર-બેટર તરીકે સૌથી વધુ 50+ સ્કોર કરવાનો રેકોર્ડ પણ પોતાના નામે કર્યો છે.
પ્લેયર ઓફ ધ મેચ : આ વર્ચ્યુઅલ ક્વાર્ટર-ફાઇનલમાં શાનદાર પ્રદર્શન બદલ તેને 'પ્લેયર ઓફ ધ મેચ' જાહેર કરવામાં આવ્યો હતો.
મેચનો ટૂંકો અહેવાલ
કોલકાતાના ઈડન ગાર્ડન્સમાં રમાયેલી આ મેચમાં વેસ્ટ ઈન્ડિઝે પ્રથમ બેટિંગ કરતાં 195 રન બનાવ્યા હતા. 196 રનના પહાડ જેવા લક્ષ્યાંકનો પીછો કરવા ઉતરેલી ભારતીય ટીમની શરૂઆત નબળી રહી હતી. અભિષેક શર્મા અને ઈશાન કિશન જલ્દી આઉટ થયા બાદ સંજુ સેમસને મોરચો સંભાળ્યો હતો. તેને સૂર્યકુમાર (18) અને તિલક વર્મા (27) સાથે ભાગીદારી કરી ટીમને લક્ષ્યની નજીક પહોંચાડી હતી અને અંતે નોટઆઉટ રહી વિજય અપાવ્યો હતો.
હવે મુંબઈમાં મહાજંગ : સેમીફાઇનલ
વેસ્ટ ઇન્ડીઝને ધૂળ ચટાડ્યા બાદ હવે ટીમ ઈન્ડિયા સેમીફાઇનલ માટે મુંબઈ રવાના થશે. ભારતનો સામનો 5 માર્ચે મુંબઈના વાનખેડે સ્ટેડિયમમાં ઇંગ્લેન્ડ સામે થશે. સંજુના ફોર્મને જોતા ચાહકોને આશા છે કે, સેમીફાઇનલમાં પણ આવો જ ચમત્કાર જોવા મળશે.
