T20 World Cup : ICC T20 વર્લ્ડ કપ 2026 હવે તેના અંતિમ પડાવ પર પહોંચી ગયો છે. રવિવારે, 8 માર્ચે અમદાવાદના નરેન્દ્ર મોદી સ્ટેડિયમમાં ભારત અને ન્યુઝીલેન્ડ (IND vs NZ) વચ્ચે હાઇ-વોલ્ટેજ ફાઇનલ મુકાબલો રમાશે. આ ઐતિહાસિક મેચ પહેલા કિવી કેપ્ટન મિશેલ સેન્ટનરે એક પ્રેસ કોન્ફરન્સમાં હિંમતભર્યું નિવેદન આપ્યું છે, જેનાથી ભારતીય ચાહકોમાં ચર્ચા જાગી છે.
દિલ તોડવાની વાત:
પ્રેસ કોન્ફરન્સ દરમિયાન સેન્ટનરે સ્પષ્ટ કર્યું કે, તેમનું લક્ષ્ય માત્ર ટ્રોફી જીતવાનું છે. તેમણે કહ્યું, "અમે અમારી નાની ખામીઓને સુધારવા પર ધ્યાન આપી રહ્યા છીએ. છેલ્લી કેટલીક ટુર્નામેન્ટમાં અમારું પ્રદર્શન શાનદાર રહ્યું છે. જો ટ્રોફી જીતવા માટે અમારે કરોડો ભારતીય ચાહકોના દિલ તોડવા પડે, તો મને તેમાં કોઈ વાંધો નથી."
જસપ્રીત બુમરાહની પ્રશંસા
ભારતીય બોલિંગ આક્રમણ વિશે વાત કરતા સેન્ટનરે જસપ્રીત બુમરાહને સૌથી મોટો ખતરો ગણાવ્યો હતો. તેમણે સ્વીકાર્યું કે, "અમદાવાદની પિચ બેટિંગ માટે અનુકૂળ હોઈ શકે છે, પરંતુ જસપ્રીત બુમરાહ ભારત માટે ચોક્કસપણે ગેમ ચેન્જર સાબિત થશે. તેની બોલિંગ ગમે ત્યારે મેચનું પાસું પલટી શકે છે."
વરુણ ચક્રવર્તી પર વિશ્વાસ
ભારતના મિસ્ટ્રી સ્પિનર વરુણ ચક્રવર્તીના ફોર્મ અંગે પૂછવામાં આવતા સેન્ટનરે કહ્યું, "વરુણ એક ઉત્કૃષ્ટ બોલર છે. ભલે તે અત્યારે સંઘર્ષ કરતો દેખાય, પરંતુ તેને લયમાં પાછા આવવા માટે માત્ર એક સારી મેચની જરૂર છે. અમે તેની ક્ષમતાથી સારી રીતે વાકેફ છીએ."
હાઇ-સ્કોરિંગ મેચની અપેક્ષા
અમદાવાદની પિચ વિશે અંદાજ લગાવતા કિવી કેપ્ટને કહ્યું કે, "મેં હજુ પિચ જોઈ નથી કારણ કે તે ઢંકાયેલી છે, પરંતુ મને લાગે છે કે આ એક ફ્લેટ પિચ હશે જ્યાં રનનો વરસાદ થશે. ભારત જે રીતે સેમીફાઇનલમાં 250 થી વધુ રન બનાવીને આવ્યું છે, તે જોતા અમારે તૈયાર રહેવું પડશે."
ઘરઆંગણે ભારત પર પ્રેશર
સેન્ટનરના મતે, પોતાની ધરતી પર અને લાખો ચાહકોની સામે રમવું એ ભારત માટે પ્રેશર સમાન હોઈ શકે છે. તેમણે ઉમેર્યું, "ભારત પર હોમ ગ્રાઉન્ડ પર વર્લ્ડ કપ જીતવાનું મોટું દબાણ છે, અને અમે આ સ્થિતિનો ફાયદો ઉઠાવવાનો પ્રયાસ કરીશું."
જૂની યાદો અને માઇન્ડ ગેમ્સ
ક્રિકેટ ઇતિહાસમાં આવા નિવેદનો પહેલા પણ વિવાદ સર્જી ચૂક્યા છે. યાદ કરો 2023 નો ODI વર્લ્ડ કપ, જ્યારે ઓસ્ટ્રેલિયન કેપ્ટન પેટ કમિન્સે ફાઈનલ પહેલા કહ્યું હતું કે, "મને 1,30,000 ભારતીય દર્શકોને શાંત કરવામાં (silencing the crowd) આનંદ આવશે." એટલું જ નહીં, આ જ 2026 T20 વર્લ્ડ કપની સેમીફાઇનલ પહેલા ઈંગ્લેન્ડના સેમ કરને વાનખેડે સ્ટેડિયમને શાંત કરી દેવાની વાત કરી હતી. હવે સેન્ટનરના 'દિલ તોડવાના' નિવેદને ફરી એકવાર ફાઇનલ પહેલા ગરમાવો વધારી દીધો છે.
