T20 World Cup : ભારત અને શ્રીલંકાની યજમાનીમાં રમાઈ રહેલો T20 વર્લ્ડ કપ 2026 હવે તેના સૌથી રોમાંચક તબક્કે પહોંચી ગયો છે. 7 ફેબ્રુઆરીથી શરૂ થયેલા આ ક્રિકેટ મહાકુંભમાં અત્યાર સુધી કુલ 55 માંથી 43 મેચો રમાઈ ચુકી છે. લીગ સ્ટેજના ઉતાર-ચઢાવ બાદ હવે સુપર-8 સ્ટેજની શરૂઆત થઈ ગઈ છે, જેમાં દુનિયાની શ્રેષ્ઠ આઠ ટીમો સેમીફાઇનલમાં પહોંચવા માટે પરસેવો પાડી રહી છે.
આજની મેચ : ઝિમ્બાબ્વે vs વેસ્ટ ઈન્ડિઝ
આજે 23 ફેબ્રુઆરીના રોજ મુંબઈના ઐતિહાસિક વાનખેડે સ્ટેડિયમમાં ઝિમ્બાબ્વે અને વેસ્ટ ઈન્ડિઝ વચ્ચે સુપર-8 ની મહત્વની મેચ રમાશે. વેસ્ટ ઈન્ડિઝની ટીમ લીગ સ્ટેજમાં પોતાની ચારેય મેચ જીતીને પોઈન્ટ ટેબલમાં ટોપ પર રહી હતી. શાઈ હોપના નેતૃત્વમાં ટીમ ખૂબ જ મજબૂત ફોર્મમાં દેખાઈ રહી છે.
ગ્રુપ-1 ની સ્થિતિ : ભારત સામે સાઉથ આફ્રિકાની મોટી જીત
સુપર-8 ના ગ્રુપ 1 માં ભારત, સાઉથ આફ્રિકા, વેસ્ટ ઈન્ડિઝ અને ઝિમ્બાબ્વેનો સમાવેશ થાય છે. આ ગ્રુપની મહત્વની મેચમાં સાઉથ આફ્રિકાએ યજમાન ભારતને અમદાવાદના નરેન્દ્ર મોદી સ્ટેડિયમમાં 76 રને હરાવીને તમામને ચોંકાવી દીધા છે. આ જીત સાથે સાઉથ આફ્રિકા +3.800 ના શાનદાર નેટ રન રેટ (NRR) સાથે ટેબલમાં ટોપ પર છે, જ્યારે ભારત હાર બાદ બીજા ક્રમે છે.
ગ્રુપ-2 ના સમીકરણો : ઈંગ્લેન્ડનો દબદબો અને વરસાદી અવરોધ
બીજી તરફ ગ્રુપ 2 માં ઈંગ્લેન્ડ, શ્રીલંકા, પાકિસ્તાન અને ન્યુઝીલેન્ડ વચ્ચે જંગ છે. ઈંગ્લેન્ડે શ્રીલંકાને હરાવીને +2.550 ના રન રેટ સાથે પ્રથમ સ્થાન મેળવ્યું છે. પાકિસ્તાન અને ન્યુઝીલેન્ડ વચ્ચેની મેચ વરસાદને કારણે રદ થતા બંને ટીમોને 1-1 પોઈન્ટ વહેંચવો પડ્યો હતો. હાલમાં શ્રીલંકા રન રેટમાં પાછળ હોવાથી બોટમ પર છે.
ઝિમ્બાબ્વે : ટુર્નામેન્ટનું સૌથી મોટું સરપ્રાઈઝ
સિકંદર રઝાની કેપ્ટન્સીમાં ઝિમ્બાબ્વેએ આ વર્લ્ડ કપમાં ઈતિહાસ રચ્યો છે. લીગ સ્ટેજમાં ઓસ્ટ્રેલિયા અને શ્રીલંકા જેવી દિગ્ગજ ટીમોને હરાવીને ઝિમ્બાબ્વેએ સુપર-8 માં જગ્યા બનાવી છે. વરસાદને કારણે તેમની એક મેચ રદ થઈ હતી, પરંતુ બાકીની મેચો જીતીને તેઓ અત્યાર સુધી 'અનબીટન' રહ્યા છે. આજે જોવાનું એ રહેશે કે, શું તેઓ વેસ્ટ ઈન્ડિઝના વિજય રથને રોકી શકશે કે નહીં.
ટીમ કેપ્ટન્સ:
વેસ્ટ ઈન્ડિઝ : શાઈ હોપ (Shai Hope)
ઝિમ્બાબ્વે : સિકંદર રઝા (Sikandar Raza)
