T20 World Cup : T20 વર્લ્ડ કપ 2026 હવે તેના સૌથી રોમાંચક તબક્કે પહોંચી ગયો છે. ગ્રુપ સ્ટેજની મેચો બાદ 6 ટીમોએ સત્તાવાર રીતે સુપર-8 માં પોતાની જગ્યા પાકી કરી લીધી છે. જોકે, હજુ પણ બે સ્થાનો ખાલી છે અને તેના માટે ક્રિકેટ જગતની દિગ્ગજ ટીમો વચ્ચે જંગ જોવા મળશે. ભારત અને વેસ્ટ ઈન્ડિઝ જેવી ટીમોએ શાનદાર પ્રદર્શન કરીને નેક્સ્ટ રાઉન્ડમાં પ્રવેશ કર્યો છે, ત્યારે પાકિસ્તાન અને ઓસ્ટ્રેલિયા જેવી ટીમો માટે સમીકરણો ગૂંચવાયા છે.
આ 6 ટીમોએ સુપર-8 માં મેળવી એન્ટ્રી
ટૂર્નામેન્ટમાં અત્યાર સુધીના પ્રદર્શનને જોતા ભારત, વેસ્ટ ઈન્ડિઝ, સાઉથ આફ્રિકા, ઈંગ્લેન્ડ અને શ્રીલંકાએ સુપર-8 માં સ્થાન સુરક્ષિત કરી લીધું છે. ન્યુઝીલેન્ડે હાલમાં કેનેડાને 8 વિકેટે હરાવીને ગ્રુપ D માંથી સાઉથ આફ્રિકા સાથે નેક્સ્ટ રાઉન્ડની ટિકિટ મેળવી લીધી છે. હવે માત્ર 2 જ જગ્યાઓ બાકી છે જેના માટે રસાકસી જોવા મળી રહી છે.
ઓસ્ટ્રેલિયા પર બહાર થવાનું જોખમ
2021 ના ચેમ્પિયન ઓસ્ટ્રેલિયા માટે આ વર્લ્ડ કપ અત્યાર સુધી મુશ્કેલ રહ્યો છે. શ્રીલંકા સામેની હાર બાદ હવે તેઓએ 'જો અને તો' ના સમીકરણ પર નિર્ભર રહેવું પડશે. ઓસ્ટ્રેલિયાને જો આગળ વધવું હોય તો ઓમાન સામે મોટા અંતરથી જીતવું પડશે અને આશા રાખવી પડશે કે, આયર્લેન્ડ ઝિમ્બાબ્વેને હરાવે. અંતે બધો ખેલ નેટ રન રેટ (NRR) પર આવીને અટકશે.
પાકિસ્તાનનું ભાગ્ય પોતાના હાથમાં
પાકિસ્તાન માટે રસ્તો થોડો સ્પષ્ટ છે. જો તેઓ ગ્રુપ A ની તેમની છેલ્લી મેચ જીતી લે છે, તો તેઓ સુપર-8 માં પહોંચી જશે. પરંતુ જો અહીં કોઈ ઉલટફેર થયો અને પાકિસ્તાન હારી ગયું, તો 2009 ના ચેમ્પિયન માટે ટૂર્નામેન્ટનો પ્રવાસ અહીં જ પૂરો થઈ જશે. અત્યાર સુધી પાકિસ્તાનનું બેટિંગ પર્ફોમન્સ ચિંતાનો વિષય રહ્યો છે.
ઝિમ્બાબ્વે અને USA ની આશા જીવંત
ઝિમ્બાબ્વેએ ઓસ્ટ્રેલિયાને હરાવીને ટૂર્નામેન્ટમાં મોટો અપસેટ સર્જ્યો છે અને તેઓ મજબૂત સ્થિતિમાં છે. બીજી તરફ, USA તેની બધી મેચો રમી ચૂક્યું છે અને હવે તે અન્ય ટીમોના પરિણામો પર નિર્ભર છે. નેધરલેન્ડ્સ સામેની મોટી જીત અને નામીબિયા સામેની મેચ જીતીને USA હજુ પણ સુપર-8 ની રેસમાં છે, પરંતુ તેમની તકો અન્ય ટીમોની હાર-જીત પર ટકેલી છે.
અફઘાનિસ્તાન અને UAE ને ચમત્કારની આશા
અફઘાનિસ્તાન અને UAE જેવી ટીમો માટે સુપર-8 નો રસ્તો ઘણો મુશ્કેલ છે. તેઓએ માત્ર પોતાની મેચો મોટા અંતરથી જીતવી પડશે એટલું જ નહીં, પરંતુ ન્યુઝીલેન્ડ અને કેનેડા જેવી ટીમોના પરિણામો પણ તેમના પક્ષમાં આવે તેવી પ્રાર્થના કરવી પડશે. જોકે, હાલની સ્થિતિ જોતા તેમનું આગળ વધવું અશક્ય જેવું લાગે છે.
આગળ શું થશે?
હવે દરેક ક્રિકેટ પ્રેમીની નજર 18 ફેબ્રુઆરીની આસપાસ રમાનારી મેચો પર છે, જ્યાં સુપર-8 નું અંતિમ ચિત્ર સ્પષ્ટ થશે. શું પાકિસ્તાન અને ઓસ્ટ્રેલિયા કમબેક કરશે? કે પછી ઝિમ્બાબ્વે કે અમેરિકા જેવી ટીમ નવો ઇતિહાસ રચશે?
