T20 World Cup : T20 વર્લ્ડ કપ 2026 હવે તેના નિર્ણાયક તબક્કે પહોંચી ગયો છે. 8 માર્ચે રમાનારી ફાઇનલમાં કોણ બાજી મારશે તે તો સમય જ કહેશે, પરંતુ તે પહેલા એક એવો અજબ-ગજબ સંયોગ સામે આવ્યો છે જે ભારતીય ફેન્સમાં ઉત્સાહ ભરી રહ્યો છે. 5 માર્ચે મુંબઈના વાનખેડે સ્ટેડિયમમાં ભારત અને ઈંગ્લેન્ડ વચ્ચે બીજી સેમીફાઇનલ રમાવાની છે. આ મેચ માત્ર ફાઇનલની ટિકિટ માટે નથી, પરંતુ એક એવા ઇતિહાસને દોહરાવવા માટે છે જે કહે છે કે, 'જ્યારે ભારત સેમીફાઇનલમાં ઈંગ્લેન્ડને હરાવે છે, ત્યારે ભારત જ ચેમ્પિયન બને છે!'
ઐતિહાસિક સંયોગનો જાદુ
ક્રિકેટના ઇતિહાસમાં ભારત અને ઈંગ્લેન્ડ અત્યાર સુધી ICC ટૂર્નામેન્ટની સેમીફાઇનલમાં 4 વાર સામસામે આવી ચૂક્યા છે. આ આંકડો અત્યારે 2-2 ની બરાબરી પર છે. ખાસ વાત એ છે કે, જે બે વર્ષોમાં (1983 અને 2024) ભારતે ઈંગ્લેન્ડને સેમીફાઇનલમાં પછાડ્યું, તે બંને વખતે ભારતે વર્લ્ડ કપની ટ્રોફી પોતાના નામે કરી છે. આ 43 વર્ષ જૂનો સંયોગ ટીમ ઇન્ડિયા માટે વિજયનો સંકેત આપી રહ્યો છે.
1983 અને 2024 : ભારતનો સુવર્ણ ઇતિહાસ
ભારત અને ઈંગ્લેન્ડ વચ્ચે સેમીફાઇનલનો પ્રથમ જંગ 1983 ના વનડે વર્લ્ડ કપમાં થયો હતો. ત્યારે કપિલ દેવની સેનાએ ઈંગ્લેન્ડને 6 વિકેટે હરાવીને ઇતિહાસનું પ્રથમ વર્લ્ડ કપ જીત્યું હતું. છેલ્લે 2024 ના T20 વર્લ્ડ કપમાં પણ ભારતે ઈંગ્લેન્ડને 68 રને હાર આપી હતી. રોહિત શર્માની ફિફ્ટી અને કુલદીપ-અક્ષરની સ્પિન જોડીએ ઈંગ્લેન્ડને પેવેલિયન ભેગું કર્યું હતું અને ભારતે ખિતાબ જીત્યો હતો.
જ્યારે ઇંગ્લેન્ડે ભારતનું સપનું તોડ્યું
જોકે, સિક્કાની બીજી બાજુ ઈંગ્લેન્ડનો દબદબો પણ રહ્યો છે. ઈંગ્લેન્ડે 1987 અને 2022 ની સેમીફાઇનલમાં ભારતને હરાવીને ટૂર્નામેન્ટમાંથી બહાર કરી દીધું હતું. 1987 માં ગ્રેહામ ગૂચની શાનદાર સેન્ચુરી (136 રન)ની મદદથી ઈંગ્લેન્ડે ભારતને હરાવ્યું હતું, જે સુનિલ ગાવસ્કરની છેલ્લી ઇન્ટરનેશનલ મેચ બની હતી. ત્યારબાદ 2022 ના T20 વર્લ્ડ કપમાં એડિલેડના મેદાન પર જોશ બટલર અને એલેક્સ હેલ્સે ભારતને 10 વિકેટે હરાવીને શરમજનક હાર આપી હતી. આમ, ઈંગ્લેન્ડ પણ સેમીફાઇનલમાં ભારત સામે જીતવાનો મજબૂત ઇતિહાસ ધરાવે છે.
વાનખેડેનું મેદાન અને અભિષેકનો પાવર
આ વખતે સેમીફાઇનલ મુંબઈના ઐતિહાસિક વાનખેડે સ્ટેડિયમમાં રમાવાની છે. આ મેદાન ભારત માટે નસીબદાર રહ્યું છે. ખાસ કરીને યુવા બેટ્સમેન અભિષેક શર્માના આંકડા અહીં ડર પેદા કરે તેવા છે. વાનખેડેમાં ઈંગ્લેન્ડ સામેની છેલ્લી મેચમાં અભિષેક શર્માએ માત્ર 54 બોલમાં 135 રનની વિસ્ફોટક ઇનિંગ રમી હતી, જે ભારત માટે પ્લસ પોઈન્ટ સાબિત થઈ શકે છે.
હવે રસ્તો સાફ છે
જોકે, 1987 અને 2022 માં ઈંગ્લેન્ડે ભારતને હરાવીને બહાર પણ કર્યું છે, પરંતુ વર્તમાન ફોર્મ અને ઐતિહાસિક સંયોગો ભારતની તરફેણમાં દેખાય છે. જો ભારત 5 માર્ચે ઇંગ્લેન્ડને હરાવવામાં સફળ રહેશે, તો 8 માર્ચે ભારતનું ચેમ્પિયન બનવું લગભગ ફાઇનલ ગણાશે.
