સુરેન્દ્રનગર શહેરના જોરાવરનગર વિસ્તારમાં વરસાદી વાતાવરણ દરમિયાન વીજ કરંટ લાગતાં એક ભેંસનું મોત થતાં સ્થાનિકોમાં ચિંતા અને રોષનો માહોલ જોવા મળ્યો છે. ઘટના જોરાવરનગરના મુખ્ય બજાર વિસ્તારમાં બની હતી, જ્યાં પશુઓ પસાર થઈ રહ્યા હતા ત્યારે આ દુર્ઘટના સર્જાઈ હતી.
પ્રાથમિક માહિતી મુજબ, વરસાદના કારણે ભેજયુક્ત વાતાવરણ વચ્ચે એક ભેંસ વીજ પોલના સંપર્કમાં આવી ગઈ હતી. વીજ કરંટ લાગતા ભેંસનું ઘટનાસ્થળે જ મોત થયું હતું. ઘટનાની જાણ થતાં સ્થાનિક લોકો મોટી સંખ્યામાં એકત્ર થયા હતા.
પીજીવીસીએલ સામે લોકોનો આક્રોશ
ઘટના બાદ સ્થાનિક લોકોએ વીજ વિતરણ કંપની પીજીવીસીએલ (PGVCL) સામે રોષ વ્યક્ત કર્યો હતો. લોકોનું કહેવું છે કે જો આ જ સ્થળે કોઈ વ્યક્તિ વીજ પોલના સંપર્કમાં આવ્યો હોત તો મોટી જાનહાનિ સર્જાઈ શકી હોત. તેમણે શહેરમાં વીજ સુરક્ષાની સ્થિતિ અંગે ગંભીર પ્રશ્નો ઉઠાવ્યા હતા. સ્થાનિકોના જણાવ્યા મુજબ શહેરના અનેક વિસ્તારોમાં ખુલ્લા ટ્રાન્સફોર્મર, જર્જરિત વીજ પોલ અને નીચે લટકતા વીજ વાયરો જોવા મળે છે, જેના કારણે અકસ્માતનો સતત ભય રહે છે.
આ પણ વાંચો: જૂનાગઢના માંગરોળ નજીક બોલેરો-બાઈક વચ્ચે ગંભીર અકસ્માત, ચાલકનું મોત : પોલીસે તપાસ શરૂ કરી
તાત્કાલિક સમારકામ અને સુરક્ષા વ્યવસ્થા મજબૂત કરવાની માંગ
ઘટના બાદ સ્થાનિક રહિશોએ પીજીવીસીએલને શહેરના જોખમી વીજ પોલ, ખુલ્લા ટ્રાન્સફોર્મર અને લટકતા વીજ વાયરોનું તાત્કાલિક નિરીક્ષણ કરીને જરૂરી સમારકામ કરવાની માંગ કરી છે. વરસાદી મોસમ દરમિયાન આવી બેદરકારીના કારણે પશુઓ તેમજ લોકોના જીવને જોખમ ઊભું થઈ શકે છે તેવો આક્ષેપ પણ કરવામાં આવ્યો છે. સ્થાનિકોએ માંગ કરી છે કે શહેરના તમામ વીજ માળખાનું તાત્કાલિક સર્વે કરીને જ્યાં જરૂરી હોય ત્યાં સુરક્ષા ધોરણો મુજબ કામગીરી કરવામાં આવે, જેથી ભવિષ્યમાં આવી દુર્ઘટનાઓ ટાળી શકાય.
