Surat News: સુરતની વીર નર્મદ દક્ષિણ ગુજરાત યુનિવર્સિટી (VNSGU) માં શિક્ષણ જગતને સ્તબ્ધ કરી દેતી એક ઘટના સામે આવી છે. ભવિષ્યના તબીબો ગણાતા MBBSના વિદ્યાર્થીઓ પરીક્ષામાં પાસ થવા માટે શોર્ટકટ અપનાવતા પકડાયા છે. સામાન્ય રીતે કાપલી કે નકલની ચોરી જોવા મળતી હોય છે, પરંતુ અહીં વિદ્યાર્થીઓએ આધુનિક આર્ટિફિશિયલ ઇન્ટેલિજન્સ (AI) એટલે કે ChatGPTનો ઉપયોગ કરીને હાઈટેક રીતે ચોરી કરવાનું કારસ્તાન રચ્યું હતું. પરીક્ષા દરમિયાન સતર્ક નિરીક્ષકોએ શંકાસ્પદ હિલચાલના આધારે તપાસ કરતા સમગ્ર કૌભાંડનો પર્દાફાશ થયો છે.
મેડિકલ જેવી ગંભીર અને જવાબદારીપૂર્વકની પરીક્ષામાં આ પ્રકારે ટેકનોલોજીનો દુરુપયોગ થતા શૈક્ષણિક વર્તુળોમાં ભારે ચર્ચા જાગી છે. યુનિવર્સિટી વહીવટી તંત્રએ આ મામલે સહેજ પણ નરમાશ દાખવ્યા વગર કડક વલણ અપનાવ્યું છે. પકડાયેલા તમામ છ વિદ્યાર્થીઓ સામે શિસ્તભંગના પગલાં ભરીને તેમને આર્થિક દંડની સાથે શૈક્ષણિક સજા પણ ફટકારવામાં આવી છે, જેથી ભવિષ્યમાં કોઈ વિદ્યાર્થી આવું કરવાની હિંમત ન કરે.
સ્માર્ટફોન અને ChatGPT દ્વારા પ્રશ્નોના ઉકેલ મેળવતા હતા
મળતી વિગતો અનુસાર, VNSGU દ્વારા આયોજિત MBBSની પરીક્ષા દરમિયાન કેટલાક વિદ્યાર્થીઓની ગતિવિધિઓ શંકાસ્પદ જણાઈ હતી. ઊંડાણપૂર્વકની તપાસમાં જાણવા મળ્યું કે, આ વિદ્યાર્થીઓ અત્યંત નાના ઇલેક્ટ્રોનિક ડિવાઇસ અને છુપાવેલા મોબાઈલ ફોન દ્વારા ઇન્ટરનેટ સાથે જોડાયેલા હતા. તેઓ પ્રશ્નપત્રના સવાલો ChatGPTમાં સર્ચ કરી તેના સચોટ જવાબો મેળવી રહ્યા હતા. પરીક્ષા ખંડમાં ટેકનોલોજીનો આવો દુરુપયોગ જોઈને યુનિવર્સિટીના સત્તાધીશો પણ આશ્ચર્યચકિત થઈ ગયા હતા.
6 વિદ્યાર્થીઓની પરીક્ષા રદ: ₹10,000નો દંડ અને આકરી કાર્યવાહી
ચોરી કરતા ઝડપાયેલા તમામ છ વિદ્યાર્થીઓ વિરુદ્ધ યુનિવર્સિટીએ તાત્કાલિક અસરથી પગલાં લીધા છે. પ્રાપ્ત માહિતી મુજબ, આ તમામ વિદ્યાર્થીઓની હાલની પરીક્ષા રદ કરી દેવામાં આવી છે. વધુમાં, શિસ્ત સમિતિના નિર્ણય અનુસાર દરેક વિદ્યાર્થી પર 10,000 રૂપિયાનો આકરો દંડ ફટકારવામાં આવ્યો છે. યુનિવર્સિટીએ સ્પષ્ટ કર્યું છે કે શૈક્ષણિક ગરિમા સાથે છેડછાડ કરનાર કોઈપણ વ્યક્તિને બક્ષવામાં આવશે નહીં.
ટેકનોલોજીનો દુરુપયોગ શિક્ષણ વ્યવસ્થા માટે ચિંતાનો વિષય
આ ઘટનાએ યુનિવર્સિટીના પરીક્ષા તંત્ર સામે પણ નવા પડકારો ઉભા કર્યા છે. નિષ્ણાતોનું માનવું છે કે અત્યાર સુધી માત્ર જેશર (Jammers) અને સીસીટીવીથી કામ ચાલતું હતું, પરંતુ હવે AIના જમાનામાં પરીક્ષાની સુરક્ષા વ્યવસ્થા વધુ સઘન બનાવવી પડશે. આ બનાવ બાદ VNSGU દ્વારા આગામી સમયમાં ડિજિટલ ગેજેટ્સ પર વધુ કડક પ્રતિબંધ અને સર્ચિંગની પ્રક્રિયાને વધુ સચોટ બનાવવાની ખાતરી આપવામાં આવી છે. મેડિકલના વિદ્યાર્થીઓ દ્વારા કરવામાં આવેલી આ હાઈટેક ચોરી સોશિયલ મીડિયા પર પણ ભારે ચર્ચાનું કેન્દ્ર બની છે.
