સુરત શહેરમાં રિયલ એસ્ટેટ અને મિલકતના વ્યવહારોમાં છેતરપિંડીના બનાવો સતત સામે આવી રહ્યા છે. ખાસ કરીને વરિષ્ઠ નાગરિકોને વિશ્વાસમાં લઈને તેમની કિંમતી મિલકતો સાથે છેતરપિંડી કરવાના બનાવોએ ચિંતા વધારી છે. આવો જ એક ગંભીર મામલો સામે આવ્યો છે, જેમાં સચિન GIDC વિસ્તારમાં આવેલા કિંમતી પ્લોટના માલિક એવા નિવૃત્ત વૃદ્ધ સાથે કરોડો રૂપિયાની છેતરપિંડી થઈ હોવાનો આક્ષેપ કરવામાં આવ્યો છે. ફરિયાદના આધારે સુરત ક્રાઇમ બ્રાન્ચે ગુનો નોંધી તપાસ શરૂ કરી છે.
ફરિયાદ મુજબ, નિવૃત્ત વૃદ્ધના બાંધકામના કામ દરમિયાન તેમની ઓળખ કોન્ટ્રાક્ટર હાર્દિક સાથે થઈ હતી. સમય જતાં બંને વચ્ચે વિશ્વાસનો સંબંધ વિકસ્યો હતો અને વૃદ્ધે તેને પોતાના પરિવારના સભ્ય સમાન માનતા હતા. દરમિયાન વૃદ્ધને નાણાંની જરૂરિયાત ઉભી થતાં તેમણે સચિન GIDCમાં આવેલો પોતાનો પ્લોટ વેચવાની ઈચ્છા વ્યક્ત કરી હતી. ત્યારે કોન્ટ્રાક્ટર હાર્દિકે ખરીદદાર શોધી આપવાની અને સમગ્ર પ્રક્રિયા પૂર્ણ કરાવવાની જવાબદારી પોતાના ઉપર લીધી હતી.
આ પણ વાંચો: સુરતના કડોદરામાં કરુણ ઘટના : વરસાદી પાણી ભરાયેલા ખાડામાં પડી માસૂમ બાળકીનું મોત
પ્લોટનું વેચાણ થયું, પરંતુ કરોડો રૂપિયાની રકમ ન મળી હોવાનો આક્ષેપ
ફરિયાદમાં જણાવ્યા મુજબ, આરોપીએ પ્લોટ માટે ખરીદદાર નક્કી કરી સબ-રજિસ્ટ્રાર કચેરીમાં વેચાણ દસ્તાવેજની પ્રક્રિયા પૂર્ણ કરાવી હતી. પ્લોટના વેચાણ બદલ કરોડો રૂપિયાની રકમ મળવાની હતી. જોકે ફરિયાદીનો આક્ષેપ છે કે વેચાણની મોટાભાગની રકમ તેમના ખાતામાં જમા કરાવવાના બદલે વિવિધ બહાના બતાવી આરોપીએ પોતાના કબજામાં લઈ લીધી હતી. ફરિયાદ મુજબ, વેચાણ બાદ આરોપીએ માત્ર રૂ. 27.50 લાખ ફરિયાદીને આપ્યા હતા, જ્યારે બાકીના અંદાજે રૂ. 2.83 કરોડ હપ્તાવાર ચૂકવવાની ખાતરી આપી હતી. જોકે, લાંબો સમય પસાર થઈ જવા છતાં આ રકમ પરત આપવામાં આવી ન હોવાનું ફરિયાદમાં જણાવાયું છે.
ભાડા અને આર્થિક મુશ્કેલીના બહાને વધુ રૂપિયા લીધાનો પણ આરોપ
ફરિયાદમાં વધુમાં એવો પણ આક્ષેપ કરવામાં આવ્યો છે કે પ્લોટના વેચાણની રકમ અટકાવી રાખ્યા બાદ પણ આરોપીએ વિવિધ બહાના બનાવી ફરિયાદી પાસેથી વધુ નાણાં મેળવ્યા હતા. ઓફિસના ભાડા, ધંધામાં આર્થિક તંગી તેમજ સરકારી મંજૂરીઓ માટે ખર્ચની જરૂર હોવાનું કહી અનેક વખત લાખો રૂપિયા રોકડા લીધા હોવાનો આરોપ છે. ફરિયાદીનું કહેવું છે કે સતત ખાતરીઓ છતાં બાકીની રકમ પરત મળી નહીં. અંતે જ્યારે તેમણે પોતાના નાણાંની માંગણી કરી ત્યારે આરોપી તરફથી ધમકીઓ આપવામાં આવતી હોવાનો પણ આક્ષેપ કરવામાં આવ્યો છે. ત્યારબાદ નિવૃત્ત વૃદ્ધે સુરત પોલીસ કમિશનર કચેરીનો સંપર્ક કરી સમગ્ર મામલે રજૂઆત કરી હતી.
આ પણ વાંચો: સુરતના જહાંગીરપુરામાં વૃદ્ધ પર હુમલો કરાતા થયું મોત : CCTVમાં કેદ થઈ ચોંકાવનારી ઘટના
ક્રાઇમ બ્રાન્ચે ગુનો નોંધી તપાસ હાથ ધરી
મળતી માહિતી અનુસાર, સુરત ક્રાઇમ બ્રાન્ચે ફરિયાદના આધારે આરોપી કોન્ટ્રાક્ટર હાર્દિક વિરુદ્ધ વિશ્વાસઘાત, છેતરપિંડી અને આર્થિક કાવતરાને લગતી સંબંધિત કલમો હેઠળ ગુનો નોંધી તપાસ શરૂ કરી છે. તપાસના ભાગરૂપે આરોપીને શોધી કાઢવા, નાણાકીય વ્યવહારોની તપાસ કરવા તેમજ જરૂરી હોય ત્યાં બેંક ખાતાઓ સીઝ કરવાની કાર્યવાહી હાથ ધરવામાં આવી રહી છે. પોલીસ દ્વારા સમગ્ર નાણાકીય વ્યવહાર, દસ્તાવેજો, બેંક ટ્રાન્ઝેક્શન અને અન્ય પુરાવાઓની ચકાસણી કરવામાં આવી રહી છે. તપાસ પૂર્ણ થયા બાદ જ સમગ્ર છેતરપિંડીનું ચોક્કસ પ્રમાણ અને અન્ય કોઈ વ્યક્તિની સંડોવણી અંગે સ્પષ્ટતા થઈ શકશે. હાલ આ કેસમાં કરવામાં આવેલા તમામ આક્ષેપો ફરિયાદના આધારે નોંધાયેલા છે અને પોલીસ તપાસ ચાલુ છે.
