સુરત શહેરમાં સતત ભારે વરસાદને કારણે સર્જાયેલી પૂર અને જળબંબાકારની પરિસ્થિતિને પહોંચી વળવા રાજ્ય સરકારે મહત્વપૂર્ણ નિર્ણય લીધો છે. શહેરમાં રાહત અને બચાવ કામગીરીને વધુ અસરકારક બનાવવા માટે વરિષ્ઠ IAS અધિકારી શાલિની અગ્રવાલને વિશેષ જવાબદારી સોંપવામાં આવી છે. તેઓ વિવિધ સરકારી વિભાગો વચ્ચે સીધું સંકલન સાધીને સમગ્ર કામગીરીની દેખરેખ રાખશે.
રાજ્ય સરકારના નિર્ણય મુજબ, શાલિની અગ્રવાલ સુરત મ્યુનિસિપલ કોર્પોરેશન (SMC), ફાયર એન્ડ ઇમરજન્સી સર્વિસ, જિલ્લા વહીવટી તંત્ર, પોલીસ વિભાગ અને અન્ય સંબંધિત એજન્સીઓ સાથે સતત સંકલન કરીને રાહત અને બચાવ કામગીરીને ગતિ આપશે. શહેરના અસરગ્રસ્ત વિસ્તારોમાં ઝડપી પ્રતિસાદ, લોકોનું સુરક્ષિત સ્થળે સ્થળાંતર, પાણીના નિકાલ અને જરૂરી સેવાઓની ઉપલબ્ધતા સુનિશ્ચિત કરવા તેઓ માર્ગદર્શન આપશે.
સુરતના વહીવટનો છે અનુભવ
શાલિની અગ્રવાલ અગાઉ સુરત મ્યુનિસિપલ કોર્પોરેશનના મ્યુનિસિપલ કમિશનર તરીકે સફળતાપૂર્વક કામગીરી કરી ચૂક્યા છે. તેમના કાર્યકાળ દરમિયાન શહેરમાં વિવિધ વિકાસ કાર્યો, શહેરી આયોજન અને આપત્તિ વ્યવસ્થાપન સંબંધિત કામગીરીમાં તેમણે મહત્વની ભૂમિકા ભજવી હતી. સુરતની ભૌગોલિક સ્થિતિ, ડ્રેનેજ સિસ્ટમ અને વહીવટી માળખા અંગેનો તેમનો અનુભવ હાલની પરિસ્થિતિમાં ઉપયોગી સાબિત થશે તેવી અપેક્ષા વ્યક્ત કરવામાં આવી રહી છે.
હાલમાં શાલિની અગ્રવાલ ગુજરાત ઊર્જા વિકાસ નિગમ લિમિટેડ (GUVNL)ના મેનેજિંગ ડિરેક્ટર (MD) તરીકે ફરજ બજાવી રહ્યા છે. તેમ છતાં રાજ્ય સરકારે વરસાદી સંકટને ધ્યાનમાં રાખીને તેમને સુરતમાં વિશેષ જવાબદારી સોંપી છે.
આ પણ વાંચો: સુરતમાં અંતિમયાત્રા દરમિયાન વરસાદી પાણીમાં પરિવાર ફસાયો : વરાછા પોલીસના સમયસર રેસ્ક્યૂથી ટળી મોટી દુર્ઘટના
રાહત કામગીરીને મળશે વધુ ગતિ
સુરતમાં ભારે વરસાદ બાદ અનેક વિસ્તારોમાં પાણી ભરાવા, માર્ગો બંધ થવા અને જનજીવન પ્રભાવિત થવાની સ્થિતિ સર્જાઈ છે. આવી પરિસ્થિતિમાં વિવિધ વિભાગો વચ્ચે ઝડપી સંકલન અત્યંત જરૂરી બન્યું છે. શાલિની અગ્રવાલના માર્ગદર્શન હેઠળ રાહત અને બચાવ કામગીરી વધુ સુવ્યવસ્થિત અને ઝડપી બનશે તેવી સરકારને આશા છે.
રાજ્ય સરકાર દ્વારા પરિસ્થિતિ પર સતત નજર રાખવામાં આવી રહી છે. અસરગ્રસ્ત વિસ્તારોમાં જરૂરી મશીનરી, માનવબળ અને બચાવ ટીમોને સક્રિય રાખવામાં આવી છે, જ્યારે નાગરિકોને પણ હવામાન વિભાગ અને સ્થાનિક તંત્ર દ્વારા આપવામાં આવતી સૂચનાઓનું પાલન કરવાની અપીલ કરવામાં આવી છે.
