Surat News: સુરત જિલ્લામાં ભારે વરસાદ અને તેના કારણે સર્જાયેલી પૂર જેવી પરિસ્થિતિ બાદ રાજ્ય સરકાર એક્શન મોડમાં આવી ગઈ છે. પૂરની સ્થિતિ, અસરગ્રસ્ત વિસ્તારોમાં રાહત કામગીરી અને લોકોના પુનર્વસનને લઈને નાયબ મુખ્યમંત્રી હર્ષ સંઘવીની અધ્યક્ષતામાં સુરત જિલ્લા કલેક્ટર કચેરી ખાતે મહત્વપૂર્ણ ઉચ્ચસ્તરીય બેઠકનું આયોજન કરવામાં આવ્યું છે. આ બેઠકમાં સુરત જિલ્લા અને શહેરના વહીવટી તંત્રના વરિષ્ઠ અધિકારીઓ, વિવિધ વિભાગોના અધિકારીઓ તેમજ આપત્તિ વ્યવસ્થાપન સાથે જોડાયેલા અધિકારીઓ ઉપસ્થિત રહ્યા હતા. બેઠક શરૂ થાય તે પહેલાં જ એક પછી એક અધિકારીઓ કલેક્ટર કચેરી પહોંચતા જોવા મળ્યા હતા. ત્યારબાદ નાયબ મુખ્યમંત્રી હર્ષ સંઘવી પણ બેઠકમાં હાજર રહ્યા અને અધિકારીઓ પાસેથી સમગ્ર પરિસ્થિતિનો વિગતવાર અહેવાલ મેળવ્યો.
પૂરગ્રસ્ત વિસ્તારોની સ્થિતિ અને રાહત કામગીરીની સમીક્ષા
બેઠક દરમિયાન સુરત શહેર અને જિલ્લાના પૂરથી પ્રભાવિત વિસ્તારોની હાલની સ્થિતિ અંગે વિસ્તૃત ચર્ચા કરવામાં આવી હતી. કયા વિસ્તારોમાં હજુ પણ પાણી ભરાયેલા છે, ક્યાં વિસ્તારોમાં સફાઈની કામગીરી ચાલી રહી છે, પીવાના પાણી, આરોગ્ય સેવાઓ, વીજ પુરવઠો અને જાહેર સુવિધાઓની સ્થિતિ શું છે તે અંગે અધિકારીઓએ વિગતવાર માહિતી રજૂ કરી હતી. નાયબ મુખ્યમંત્રીએ અધિકારીઓને અસરગ્રસ્ત વિસ્તારોમાં રાહત કામગીરીમાં કોઈપણ પ્રકારની ઢીલ ન રાખવા તેમજ લોકો સુધી જરૂરી તમામ સુવિધાઓ ઝડપથી પહોંચાડવા સૂચના આપી હોવાનું જાણવા મળ્યું છે.
સ્વચ્છતા અભિયાનને મળશે પ્રાથમિકતા
પૂરનું પાણી ઓસર્યા બાદ સૌથી મોટો પડકાર સ્વચ્છતા અને રોગચાળો અટકાવવાનો હોય છે. આથી બેઠકમાં અસરગ્રસ્ત વિસ્તારોમાં વ્યાપક સફાઈ અભિયાન ચલાવવા અંગે ખાસ ચર્ચા કરવામાં આવી હતી. ગટર વ્યવસ્થા, રસ્તાઓ પરથી કાદવ દૂર કરવો, જંતુનાશક દવાનો છંટકાવ, પીવાના પાણીની શુદ્ધતા જાળવવી અને આરોગ્ય વિભાગ દ્વારા મેડિકલ ટીમોને સતત કાર્યરત રાખવા સહિતના મુદ્દાઓ પર અધિકારીઓને જરૂરી સૂચનાઓ આપવામાં આવી હતી.
અસરગ્રસ્તો માટે કેસડોલ અને નુકસાની પેકેજ અંગે ચર્ચા
બેઠકનો સૌથી મહત્વપૂર્ણ મુદ્દો પૂરથી અસરગ્રસ્ત પરિવારોને મળનારી સહાય રહ્યો હતો. અધિકારીઓ સાથે કેશ ડોલ (Cash Dole) સહાય, નુકસાનનું મૂલ્યાંકન અને રાહત પેકેજ અંગે વિસ્તૃત ચર્ચા કરવામાં આવી હતી. સૂત્રોના જણાવ્યા અનુસાર ભારે વરસાદ અને પૂરના કારણે જેમના મકાનો, ઘરવખરી, દુકાનો, નાના વેપાર, ખેતી અને અન્ય સંપત્તિને નુકસાન થયું છે તેવા લોકોને સહાય કેવી રીતે પહોંચાડવી તે અંગે અધિકારીઓ પાસેથી સૂચનો લેવામાં આવ્યા હતા.
મોટા રાહત પેકેજની શક્યતા
અધિકારીઓ દ્વારા રજૂ કરવામાં આવેલા અહેવાલ અને નુકસાનના પ્રાથમિક અંદાજના આધારે રાજ્ય સરકાર અસરગ્રસ્તો માટે મોટા રાહત પેકેજની જાહેરાત કરી શકે તેવી શક્યતા વ્યક્ત કરવામાં આવી રહી છે. બેઠકમાં વિવિધ કેટેગરી મુજબ સહાયની રકમ, નુકસાનના સર્વેની પ્રક્રિયા અને સહાય સીધી લાભાર્થીઓ સુધી કેવી રીતે પહોંચાડવી તે અંગે પણ ચર્ચા થઈ હોવાનું જાણવા મળ્યું છે.
નુકસાનના સર્વે પર વિશેષ ભાર
નાયબ મુખ્યમંત્રીએ અધિકારીઓને સૂચના આપી હતી કે દરેક અસરગ્રસ્ત વિસ્તારનો પારદર્શક અને ઝડપી સર્વે કરવામાં આવે જેથી કોઈપણ પીડિત પરિવાર સહાયથી વંચિત ન રહે. ખાસ કરીને જ્યાં મકાનોમાં પાણી ઘૂસ્યા છે, ઘરવખરીને નુકસાન થયું છે અથવા નાના વેપારીઓને આર્થિક ફટકો પડ્યો છે તેવા કેસોને પ્રાથમિકતા આપવા પર ભાર મૂકવામાં આવ્યો હતો.
બેઠક બાદ અસરગ્રસ્ત વિસ્તારોની મુલાકાત લેશે હર્ષ સંઘવી
ઉચ્ચસ્તરીય બેઠક પૂર્ણ થયા બાદ નાયબ મુખ્યમંત્રી હર્ષ સંઘવી મોડી રાત્રે સુરતના પૂરગ્રસ્ત વિસ્તારોની મુલાકાતે પણ નીકળશે. તેઓ સ્થળ પર જઈને રાહત અને બચાવ કામગીરીની સમીક્ષા કરશે તેમજ અસરગ્રસ્ત નાગરિકો સાથે સીધી વાતચીત કરીને તેમની સમસ્યાઓ વિશે માહિતી મેળવશે. ઉપરાંત અધિકારીઓને જરૂરી સ્થળ પર જ સૂચનાઓ પણ આપશે.
સરકારની દરેક સ્થિતિ પર નજર
રાજ્ય સરકાર સમગ્ર પરિસ્થિતિ પર સતત નજર રાખી રહી છે. જિલ્લા વહીવટી તંત્ર, મહાનગરપાલિકા, પોલીસ, ફાયર બ્રિગેડ, આરોગ્ય વિભાગ અને આપત્તિ વ્યવસ્થાપન વિભાગ વચ્ચે સતત સંકલન રાખીને અસરગ્રસ્ત વિસ્તારોમાં કામગીરી કરવામાં આવી રહી છે. સરકારનો પ્રયાસ છે કે અસરગ્રસ્તોને ઝડપથી સહાય મળે, જાહેર જીવન ફરી સામાન્ય બને અને પૂરના કારણે ઊભી થયેલી મુશ્કેલીઓનો વહેલી તકે ઉકેલ આવે.
આ પણ વાંચો: કચ્છમાં ઘોરાડ સંરક્ષણમાં ઐતિહાસિક સફળતા : જમ્પ સ્ટાર્ટ ટેકનિકથી જન્મેલું બીજું બચ્ચું 50 દિવસથી વધુ જીવિત રહ્યું
અસરગ્રસ્તોની નજર હવે સરકારના નિર્ણય પર
હાલ સુરતના પૂરગ્રસ્ત વિસ્તારોમાં રહેતા હજારો પરિવારોની નજર રાજ્ય સરકારના આગામી નિર્ણય પર છે. જો બેઠકમાં થયેલી ચર્ચા મુજબ રાહત પેકેજ જાહેર થશે તો નુકસાન ભોગવનારા પરિવારોને મોટી રાહત મળી શકે છે. આગામી એકાદ-બે દિવસમાં રાજ્ય સરકાર દ્વારા નુકસાની સહાય, કેશ ડોલ અને વિશેષ રાહત પેકેજ અંગે સત્તાવાર જાહેરાત કરવામાં આવે તેવી શક્યતા વ્યક્ત કરવામાં આવી રહી છે.
