સુરત: સુરતમાં વિશ્વાસના સંબંધને કલંકિત કરતો એક ચોંકાવનારો મામલો સામે આવ્યો છે. અગાઉ એક કિશોરીના અપહરણ અને યૌન શોષણ સંબંધિત કેસમાં પરિવાર વતી કોર્ટમાં કેસ લડી રહેલા વકીલ સામે જ હવે તે જ કિશોરીના શારીરિક અને માનસિક શોષણના ગંભીર આરોપો નોંધાયા છે. ફરિયાદ મળતા જ સચિન GIDC પોલીસે તાત્કાલિક ગુનો નોંધી આરોપી વકીલની ધરપકડ કરી વધુ તપાસ શરૂ કરી છે.
જૂના કેસ દરમિયાન પરિવારનો વિશ્વાસ જીત્યો હતો
પોલીસના જણાવ્યા અનુસાર, વર્ષ 2025માં જ્યારે પીડિતા સગીરા હતી ત્યારે તેના અપહરણ અને યૌન શોષણનો કેસ સચિન GIDC પોલીસ મથકે નોંધાયો હતો. તપાસ પૂર્ણ થયા બાદ કેસ કોર્ટમાં પહોંચ્યો હતો. કોર્ટમાં પરિવારનો પક્ષ મજબૂત રીતે રજૂ થાય તે માટે પીડિતાના પિતાએ વકીલ પ્રણયરાજ ગોવિંદભાઈ રણવીરને પોતાના કાનૂની પ્રતિનિધિ તરીકે નિયુક્ત કર્યો હતો. કેસની કાર્યવાહી દરમિયાન પરિવારને આરોપી વકીલ પર સંપૂર્ણ વિશ્વાસ હતો.
કેસને અસર પહોંચાડવાની ધમકી આપી કિશોરીને બોલાવી
ફરિયાદ મુજબ, 12 જુલાઈ 2026ના રોજ આરોપી વકીલે પીડિતાના પિતાનો સંપર્ક કરીને કિશોરીને પોતાના ઘરે ઘરકામ માટે મોકલવાની વાત કરી હતી. સાથે જ એવો આક્ષેપ છે કે જો કિશોરીને નહીં મોકલવામાં આવે તો કોર્ટમાં ચાલતા કેસને નુકસાન પહોંચાડી દેવાની ધમકી પણ આપવામાં આવી હતી. આ દબાણના કારણે પરિવાર કિશોરીને વકીલ સાથે મોકલવા મજબૂર બન્યો હતો.
ઘરે લઈ જઈ અયોગ્ય વર્તન અને બ્લેકમેઇલનો આરોપ
ફરિયાદમાં જણાવાયું છે કે આરોપી વકીલ કિશોરીને ડિંડોલી સ્થિત પોતાના નિવાસસ્થાને લઈ ગયો હતો, જ્યાં તેની સાથે જબરદસ્તી કરી શારીરિક શોષણ કરવામાં આવ્યું હોવાનો આરોપ છે. એટલું જ નહીં, સમગ્ર ઘટનાનો વીડિયો મોબાઇલમાં રેકોર્ડ કરી તેને આધારે બ્લેકમેઇલ કરવામાં આવી અને કોઈને જાણ કરશે તો ગંભીર પરિણામ ભોગવવાની ધમકી અપાઈ હોવાનું પણ ફરિયાદમાં ઉલ્લેખ છે.
પિતાને આપવીતી જણાવતાં પોલીસ એક્શનમાં આવી
ઘટના બાદ ભયભીત બનેલી કિશોરીએ પોતાના પિતાને સમગ્ર ઘટનાની જાણ કરી હતી. ત્યારબાદ પરિવાર તાત્કાલિક સચિન GIDC પોલીસ મથકે પહોંચ્યો હતો. ઘટનાની ગંભીરતાને ધ્યાનમાં રાખી ઉચ્ચ પોલીસ અધિકારીઓના માર્ગદર્શન હેઠળ તુરંત ગુનો નોંધવામાં આવ્યો અને આરોપીને ઝડપી લેવા અલગ-અલગ ટીમો કાર્યરત કરવામાં આવી હતી.
POCSO સહિત ગંભીર કલમો હેઠળ ગુનો નોંધાયો
પોલીસે આરોપી સામે ભારતીય ન્યાય સંહિતા (BNS) તેમજ POCSO Actની વિવિધ ગંભીર કલમો હેઠળ ગુનો નોંધ્યો છે. ફરિયાદ નોંધાયા બાદ પોલીસે કલાકોમાં જ ડિંડોલી વિસ્તારમાંથી આરોપી વકીલની ધરપકડ કરી હતી. તપાસના ભાગરૂપે આરોપીના મોબાઇલ સહિતના ડિજિટલ પુરાવા પણ જપ્ત કરવાની કાર્યવાહી હાથ ધરાઈ છે.
આરોપી સામે અગાઉ પણ નોંધાયા છે અનેક ગુના
પ્રાથમિક તપાસ દરમિયાન સામે આવ્યું છે કે આરોપી વકીલ સામે અગાઉ પણ વિવિધ પોલીસ મથકોમાં કુલ છ ગુનાઓ નોંધાયેલા છે. તેમાં દહેજ સંબંધિત ફરિયાદ, જાહેર સેવક સાથે ગેરવર્તન, જાહેરનામાનો ભંગ, મારામારી તેમજ અન્ય કાયદાકીય ગુનાઓનો સમાવેશ થાય છે. પોલીસે આરોપીના ગુનાહિત ઇતિહાસની પણ વિગતવાર તપાસ શરૂ કરી છે.
આ પણ વાંચો: મોરબીમાં ખેડૂતોની વિશાળ રેલી : સરકારના નવા પરિપત્રનો અસ્વીકાર કરીને સુધારાની કરી માંગ
તપાસ તમામ પાસાઓથી આગળ વધી રહી છે
પોલીસનું કહેવું છે કે સમગ્ર મામલાની અત્યંત સંવેદનશીલતા ધ્યાનમાં રાખીને તમામ પુરાવા એકત્ર કરવામાં આવી રહ્યા છે. પીડિતાના નિવેદન, ડિજિટલ પુરાવા અને અન્ય સાક્ષીઓના આધારે તપાસ આગળ વધારવામાં આવી રહી છે. પોલીસે સ્પષ્ટ કર્યું છે કે કેસમાં કાયદા મુજબની તમામ કાર્યવાહી કરવામાં આવશે.
