વિશ્વમાં એક એવો પણ દેશ છે જ્યાં વિદ્યાર્થીઓના ભવિષ્યને એટલું મહત્વ આપવામાં આવે છે કે તેમની રાષ્ટ્રીય પરીક્ષા દરમિયાન આખા દેશની પરિવહન વ્યવસ્થા, ખાસ કરીને એવિએશન સેક્ટરને રોકી દેવામાં આવે છે. દક્ષિણ કોરિયામાં દર વર્ષે લેવાતી યુનિવર્સિટી પ્રવેશ પરીક્ષા દરમિયાન શાંતિ જળવાઈ રહે તે માટે સરકાર દ્વારા અસાધારણ કદમ ઉઠાવવામાં આવે છે. આ પરીક્ષા માત્ર એક શૈક્ષણિક પ્રક્રિયા નથી પરંતુ દક્ષિણ કોરિયાના દરેક વિદ્યાર્થીના જીવનની સૌથી મોટી અને મહત્વની ઘટના માનવામાં આવે છે.
પરીક્ષાના 35 મિનિટ માટે આકાશમાં વિમાનો પર પ્રતિબંધ
દક્ષિણ કોરિયાની આ પરીક્ષા દરમિયાન સૌથી ચોંકાવનારો નિર્ણય ફ્લાઈટ્સના ટેક-ઓફ અને લેન્ડિંગ પરના પ્રતિબંધનો છે. પરીક્ષાના 'ઇંગ્લિશ લિસનિંગ સેક્શન' દરમિયાન બપોરે 1:05 વાગ્યાથી 1:40 વાગ્યા સુધી એટલે કે અંદાજે 35 મિનિટ માટે તમામ વિમાનોની અવરજવર સ્થગિત કરી દેવામાં આવે છે. આ પાછળનું મુખ્ય કારણ એ છે કે વિમાનોના અવાજને લીધે વિદ્યાર્થીઓને ઓડિયો પ્રશ્નો સાંભળવામાં કોઈ પણ પ્રકારની અડચણ ન પડે. સરકાર આ પગલા દ્વારા પરીક્ષા કેન્દ્રો પર સંપૂર્ણ શાંતિ સુનિશ્ચિત કરે છે.
હવામાં ઉડી રહેલા વિમાનો માટેના કડક નિયમો
લિસનિંગ ટેસ્ટ શરૂ થવાના સમયે જે વિમાનો પહેલેથી જ હવામાં ઉડી રહ્યા હોય તેમને એરપોર્ટ પર ઉતરાણ કરવાની મંજૂરી આપવામાં આવતી નથી. આવા વિમાનોના પાયલોટોને સૂચના આપવામાં આવે છે કે તેઓ ટેસ્ટ પૂરો ન થાય ત્યાં સુધી ઓછામાં ઓછી 3000 મીટરની ઊંચાઈ જાળવી રાખે. આ નિયમને કારણે શહેરો અને પરીક્ષા કેન્દ્રો પર વિમાનોનો ઘોંઘાટ નહિવત થઈ જાય છે. વિદ્યાર્થીઓના હિતમાં આખું રાષ્ટ્ર એકજુટ થઈને આ સહયોગ આપે છે.
માત્ર એરપોર્ટ જ નહીં, ઓફિસો અને શેરબજારના સમયમાં પણ ફેરફાર
દક્ષિણ કોરિયામાં આ પરીક્ષાને 'સુનંગ' (Suneung) તરીકે ઓળખવામાં આવે છે. પરીક્ષાના દિવસે વિદ્યાર્થીઓને ટ્રાફિક જામની સમસ્યા ન નડે તે માટે સરકારી કચેરીઓ, મોટી ખાનગી કંપનીઓ અને કોરિયા એક્સચેન્જ (શેરબજાર) પણ સામાન્ય સમય કરતા 1 કલાક મોડા ખોલવામાં આવે છે. આ દિવસને દક્ષિણ કોરિયામાં એટલી ગંભીરતાથી લેવામાં આવે છે કે તે વિદ્યાર્થીના કરિયર અને સામાજિક પ્રતિષ્ઠાનો નિર્ણાયક દિવસ બની જાય છે.
