Jag Ladki Ship: મિડલ ઈસ્ટમાં ચાલી રહેલા ભીષણ યુદ્ધ અને દરિયાઈ માર્ગો પર વધતા તણાવ છતાં ભારતની ઉર્જા સુરક્ષા અકબંધ રહી છે. હોર્મુઝ સ્ટ્રેટમાં ફસાયેલા ભારતીય જહાજો પૈકી વધુ એક મહત્વપૂર્ણ જહાજ 'જગ લાડકી' (Jag Ladki) આજે સુરક્ષિત રીતે ગુજરાતના મુંદ્રા બંદરે પહોંચી ગયું છે. 'શિવાલિક' અને 'નંદા દેવી' જહાજો બાદ આ ત્રીજું મોટું જહાજ છે જે ભારત માટે ક્રૂડ ઓઈલનો જથ્થો લઈને આવ્યું છે. આ સફળ ડિલિવરીથી સાબિત થાય છે કે વૈશ્વિક અસ્થિરતા વચ્ચે પણ ભારત સરકાર અને શિપિંગ મંત્રાલય દેશમાં ઈંધણના પુરવઠાને જાળવી રાખવા માટે મક્કમ છે.
ભારતીય ધ્વજ ધરાવતું આ વિશાળ ટેન્કર સંયુક્ત આરબ અમીરાત (UAE) થી આશરે 81,000 ટન જેટલો ક્રૂડ ઓઈલનો જથ્થો લઈને આવ્યું છે. આજે સવારે જ્યારે આ જહાજ મુંદ્રા બંદરના બાહ્ય સમુદ્રી વિસ્તારમાં પહોંચ્યું, ત્યારે સુરક્ષા અને ટેકનિકલ ટીમોએ તુરંત જ તેની તપાસ હાથ ધરી હતી. આ જહાજનું ભારત પહોંચવું એ દેશની રિફાઈનરીઓ માટે મોટા રાહતના સમાચાર છે, કારણ કે યુદ્ધની સ્થિતિમાં ઉર્જા પુરવઠો ખોરવાવાની ભીતિ સેવાઈ રહી હતી. અદાણી પોર્ટ્સ મુંદ્રા દ્વારા આ જહાજને સુરક્ષિત બર્થિંગ પૂરું પાડીને ઉર્જા લાઈનોને સુરક્ષિત રાખવામાં મહત્વની ભૂમિકા ભજવવામાં આવી છે.
SPM પર મિડ-સી ટ્રાન્સફર પ્રક્રિયા શરૂ
'જગ લાડકી' જહાજ આજે સવારે આશરે 10:30 વાગ્યે મુંદ્રા બંદરના ઊંડા સમુદ્રમાં આવેલા સિંગલ પોઈન્ટ મૂરિંગ (SPM) પર પહોંચ્યું હતું. SPM એક એવી વ્યવસ્થા છે જ્યાં ખૂબ મોટા જહાજોને કાંઠા સુધી લાવ્યા વગર જ તેમાંથી તેલ ખાલી કરી શકાય છે. ટેકનિકલ ટીમો દ્વારા જરૂરી પ્રોટોકોલ અને સુરક્ષા તપાસ પૂર્ણ કર્યા બાદ હવે મિડ-સી ટ્રાન્સફર દ્વારા ક્રૂડ ઓઈલ કાઢવાની પ્રક્રિયા શરૂ કરી દેવામાં આવી છે.
UAE થી 81,000 ટન 'મુર્બન ક્રૂડ' લઈને આવ્યું જહાજ
શિપિંગ મંત્રાલયના જણાવ્યા અનુસાર, આ જહાજ 14 માર્ચે UAE ના ફુજૈરાહ બંદરથી રવાના થયું હતું. તે પોતાની સાથે આશરે 80,886 મેટ્રિક ટન 'મુર્બન ક્રૂડ ઓઈલ' લઈને આવ્યું છે. 274.19 મીટરની લંબાઈ અને 50.04 મીટરની પહોળાઈ ધરાવતું આ ટેન્કર અત્યંત વિશાળ છે, જેનું ડેડવેઈટ ટનેજ આશરે 1,64,716 ટન જેટલું છે. આ જથ્થો ભારતની રિફાઈનરીઓ માટે પૂરતો સ્ટોક પૂરો પાડશે.
હોર્મુઝ સ્ટ્રેટમાં ફસાયેલા 24 જહાજોમાં સામેલ હતું 'જગ લાડકી'
નોંધનીય છે કે જ્યારે મિડલ ઈસ્ટમાં યુદ્ધ ફાટી નીકળ્યું, ત્યારે હોર્મુઝ સ્ટ્રેટના પશ્ચિમી ભાગમાં કુલ 24 જેટલા જહાજો ફસાઈ ગયા હતા, જેમાં 'શિવાલિક', 'નંદા દેવી' અને 'જગ લાડકી'નો સમાવેશ થતો હતો. આ પહેલા 'શિવાલિક' 16 માર્ચે મુંદ્રા અને 'નંદા દેવી' 17 માર્ચે કંડલા બંદરે પહોંચ્યા હતા, જે બંને સાથે મળીને 92,712 ટન LPG લઈને આવ્યા હતા. હવે 'જગ લાડકી' ના આગમન સાથે ભારતની ઉર્જા સુરક્ષા વધુ મજબૂત બની છે.
