Shane Warne: 4 વર્ષ પહેલા દુનિયા છોડી ચૂકેલા ઓસ્ટ્રેલિયાના દિગ્ગજ સ્પિનર શેન વોર્ન ફરી એકવાર ચર્ચામાં છે. તેમના નિધનના 4 વર્ષ બાદ પુત્ર જેક્સન વોર્ને એક એવું નિવેદન આપ્યું છે, જેણે સમગ્ર વિશ્વને ચોંકાવી દીધું છે. 2022માં થાઈલેન્ડમાં 52 વર્ષની વયે હાર્ટ એટેકથી વોર્નનું અચાનક અવસાન થતા રમત જગત સ્તબ્ધ થઈ ગયું હતું. હવે જેક્સન વોર્ને દાવો કર્યો છે કે તેમના પિતાના મૃત્યુમાં 'કોવિડ-19 રસી'ની મહત્વની ભૂમિકા હોઈ શકે છે.
'ટુ વર્લ્ડ્સ કોલાઈડ પોડકાસ્ટ' પર વાતચીત દરમિયાન જેક્સને માત્ર સરકાર પર જ સવાલો ઉઠાવ્યા નથી, પરંતુ એવો પણ દાવો કર્યો છે કે તેમના પિતા રસી લેવાના પક્ષમાં નહોતા, પરંતુ કામના દબાણને કારણે તેમને આમ કરવું પડ્યું હતું. જેક્સને એવું પણ કહ્યું કે પિતાને પહેલાથી જ કેટલીક સ્વાસ્થ્ય સમસ્યાઓ હતી, પરંતુ કોવિડ-19 રસીઓને કારણે તેમની સ્થિતિ વધુ બગડી ગઈ હતી.
શેન વોર્નના પુત્રએ શું દાવો કર્યો?
પિતા શેન વોર્નના મૃત્યુનું કારણ જણાવતા જેક્સને કહ્યું, "મને ચોક્કસ લાગે છે કે તેમાં (કોવિડ રસી) સામેલગીરી હતી. મને નથી લાગતું કે હવે આ કહેવું વિવાદાસ્પદ રહ્યું છે. ભલે પપ્પાને સ્વાસ્થ્ય સંબંધિત કેટલીક જૂની સમસ્યાઓ રહી હોય, પરંતુ મને લાગે છે કે આ (રસી)એ તે સમસ્યાઓને સપાટી પર લાવી દીધી. આ એક એવી બાબત છે જેની સાથે હું હંમેશા સંઘર્ષ કરતો રહ્યો છું." જેક્સનના મતે, શેન વોર્ન તેમના મૃત્યુના થોડા મહિના પહેલા કોવિડ-19થી સંક્રમિત થયા હતા, પરંતુ તે સમયે તેઓ કોઈ ગંભીર બીમારીથી ઝઝૂમી રહ્યા નહોતા.
પિતાના મૃત્યુના સમાચાર સાંભળીને કોવિડ અને રસીને જવાબદાર ઠેરવ્યા
જેક્સને તે પળને યાદ કરી જ્યારે તેમને પિતાના મૃત્યુના સમાચાર મળ્યા હતા. જેક્સને જણાવ્યું, "જેવું મેં ફોન મૂક્યો (વોર્નના મૃત્યુના સમાચાર મળ્યા પછી), મારી પ્રથમ પ્રતિક્રિયા એ હતી કે મેં તરત જ સરકારને દોષી ઠેરવી. મેં તરત જ કોવિડ અને રસીને તેના માટે જવાબદાર માની."
"પપ્પા ઠીક હતા. મને લાગે છે કે તેમણે રસીના ત્રણ કે ચાર ડોઝ લીધા હતા. તેઓ તેને લગાવવા માંગતા નહોતા, પરંતુ કામના સિલસિલામાં તેમને મજબૂર કરવામાં આવ્યા હતા. તેમને પણ દરેક વ્યક્તિની જેમ મજબૂર થવું પડ્યું હતું." તે સમયે પપ્પા સ્વસ્થ હતા અને ખુશ હતા. તેઓ ઘણા સમય પછી તેમના શ્રેષ્ઠ ફોર્મમાં દેખાતા હતા. હા, તેઓ ધૂમ્રપાન કરતા હતા અને દારૂ પીતા હતા, પરંતુ 80 અને 90ના દાયકાના ઘણા લોકો પપ્પા કરતા વધુ ધૂમ્રપાન અને દારૂ પીતા હતા અને છતાં તેઓ ઠીક છે.
કેવું રહ્યું શેન વોર્નનું ક્રિકેટ કરિયર?
શેન વોર્ન એક મહાન લેગ સ્પિનર હતા, જેમણે 1992-2007 વચ્ચે 145 ટેસ્ટમાં 708 વિકેટ અને 194 વનડેમાં 293 વિકેટ લીધી હતી. તેમણે 2008માં IPLની પ્રથમ સીઝનમાં પોતાની કેપ્ટનશીપમાં રાજસ્થાન રોયલ્સને ખિતાબ જીતાડ્યો હતો. તેમની બોલિંગ સામે બેટ્સમેનો લાચાર દેખાતા હતા. 4 માર્ચ 2022ના રોજ થાઈલેન્ડના કોહ સમુઈ ટાપુ પર એક વિલામાં રજાઓ ગાળતી વખતે તેમનું અવસાન થયું હતું. તે સમયના પોસ્ટમોર્ટમ રિપોર્ટ મુજબ તેમના મૃત્યુનું કારણ હાર્ટ એટેક જણાવવામાં આવ્યું હતું.
