બોલિવૂડના સુપરસ્ટાર શાહરૂખ ખાનએ આજે પોતાના જીવનના 60મા વર્ષમાં પગ મૂક્યો છે. દરેક વર્ષે જેમ તેમના ચાહકો મન્નતની બહાર ભેગા થાય છે, એ જ રીતે આ વખતે પણ મુંબઈના બંદ્રા વિસ્તારમાં આવેલા તેમના નિવાસસ્થાન બહાર ચાહકોની ભીડ ઉમટી પડી હતી. પોલીસે ચાહકોની વધતી સંખ્યાને કાબૂમાં રાખવા માટે વધારાની સુરક્ષા વ્યવસ્થા ગોઠવવી પડી હતી.
અલીબાગમાં મિત્રો સાથે ખાનગીમાં ઉજવણી
માહિતી અનુસાર, શાહરૂખ ખાન આ વખતે પરિવાર અને નજીકના મિત્રોની હાજરીમાં અલીબાગ સ્થિત પોતાના બંગલામાં જન્મદિવસ ઉજવી રહ્યા છે. બોલિવૂડના જાણીતા દિગ્દર્શક કરણ જોહર, અભિનેત્રી રાની મુખર્જી અને કોરિયોગ્રાફર ફરાહ ખાન સહિતના મિત્રોએ ઉજવણીમાં હાજરી આપી હતી. કરણ જોહરે ઇન્સ્ટાગ્રામ પર એક તસ્વીર શેર કરી હતી જેમાં તેઓ રાની મુખર્જી સાથે દેખાયા હતા, જ્યારે ફરાહ ખાને શાહરૂખ સાથેનો ફોટો પોસ્ટ કર્યો હતો.
મન્નતની બહાર ચાહકોનો જુસ્સો યથાવત
જ્યાં સુધી શાહરૂખ ખાન મન્નત ખાતે હાજર ન હતા, ત્યાં સુધી પણ તેમના ચાહકોનો ઉત્સાહ ઓછો થયો નહોતો. અનેક લોકોએ રસ્તા પર કેક કાપીને, પોસ્ટરો સાથે જન્મદિવસની ઉજવણી કરી હતી. કેટલાક ચાહકોએ "શાહરૂખ ખાન ભારતનો ગૌરવ છે" એવા નારા પણ લગાવ્યા હતા. આ સમગ્ર દ્રશ્યોના વીડિયો અને ફોટા સોશિયલ મીડિયા પર વાયરલ થઈ ગયા હતા.
મન્નતનું નવીનીકરણ ચાલુ, તાત્કાલિક નિવાસ અન્યત્ર
સૂત્રો મુજબ, શાહરૂખ ખાન હાલમાં પોતાના ઘરના નવીનીકરણના કામને કારણે મન્નતમાં નથી રહેતા. તેઓ હાલમાં પાલી હિલ વિસ્તારની ‘પૂજા કાસા’ ઇમારતમાં બે લક્ઝરી એપાર્ટમેન્ટ ભાડે લઈ રહ્યા છે.
નવા પ્રોજેક્ટ ‘કિંગ’ની જાહેરાતની રાહ
શાહરૂખ ખાનના ચાહકો માટે તેમના જન્મદિવસે એક ખાસ સપ્રાઈઝની પણ અપેક્ષા છે. એવી ચર્ચા છે કે તેમની આગામી ફિલ્મ ‘કિંગ’ની સત્તાવાર જાહેરાત જલ્દી થઈ શકે છે, જેમાં દીપિકા પાદુકોણ અને સુહાના ખાન પણ મહત્વની ભૂમિકામાં જોવા મળશે.
