"હું તૂટી ગયો હતો, સપના વિખેરાઈ ગયા હતા" : ‘પ્લેયર ઓફ ધ ટુર્નામેન્ટ’ બન્યા બાદ સંજુ સેમસને કહ્યું; "હું સચિન સર સાથે સતત સંપર્કમાં હતો, તેમણે મને દિશા બતાવી"

T20 World Cup 2026: ICC Men's T20 World Cup 2026 માં ભારતીય ટીમની ઐતિહાસિક જીત સાથે વિકેટકીપર બેટ્સમેન Sanju Samson માટે આ ટુર્નામેન્ટ જીવનની યાદગાર ક્ષણ બની ગઈ. સમગ્ર ટુર્નામેન્ટમાં શાનદાર પ્રદર્શન કરીને સંજુ સેમસને ‘પ્લેયર ઓફ ધ ટુર્નામેન્ટ’નો ખિતાબ જીત્યો. ફાઈનલ જીત્યા બાદ સેમસન ખૂબ જ ઈમોશનલ દેખાયો અને કહ્યું કે આ ક્ષણ તેના માટે સપનું સાકાર થવા જેવી છે.

સંજુ સેમસન બન્યો ‘પ્લેયર ઓફ ધ ટુર્નામેન્ટ’

સચિન તેંડુલકરના માર્ગદર્શનથી લખી કમબેકની કહાની

સંજુ સેમસને મુશ્કેલ સમયમાં સાથ આપનારાઓનો માન્યો આભાર

ટુર્નામેન્ટ દરમિયાન સંજુ સેમસને માત્ર 5 મેચમાં જ 321 રન ફટકારીને ઇતિહાસ રચ્યો. ખાસ વાત એ હતી કે તેણે સતત ત્રણ મહત્વપૂર્ણ મેચોમાં અડધી સદી ફટકારી અને ટીમને જીત તરફ દોરી. તેના આ શાનદાર પ્રદર્શનના કારણે જ ભારતને વર્લ્ડ કપ જીતવામાં મોટી મદદ મળી.

'પ્લેયર ઓફ ધ ટુર્નામેન્ટ' બનતા ઈમોશનલ થયો સંજુ સેમસન, સંભળાવ્યો સચિન તેંડુલકર સાથેનો કિસ્સોઃ

ફાઈનલ જીત્યા બાદ સંજુ સેમસને પોતાની લાગણીઓ વ્યક્ત કરતાં કહ્યું કે, “આ બધું સપના જેવું લાગી રહ્યું છે. હું ખૂબ ખુશ અને આભારી છું. આ ક્ષણે મારી પાસે શબ્દો પણ નથી અને મારી લાગણીઓને સંભાળવી પણ મુશ્કેલ થઈ રહી છે.” સેમસને જણાવ્યું કે આ સફળતાની શરૂઆત લગભગ બે વર્ષ પહેલા થઈ ગઈ હતી. તેણે યાદ કર્યું કે 2024ના વર્લ્ડ કપમાં તે ટીમનો ભાગ તો હતો, પરંતુ તેને રમવાની તક મળી નહોતી. તે સમયથી જ તેણે નક્કી કરી લીધું હતું કે જ્યારે તક મળશે ત્યારે પોતાને સાબિત કરીને બતાવશે.

સંજુ સેમસને એ પણ સ્વીકાર્યું કે એક સમય એવો આવ્યો હતો જ્યારે તે ખૂબ નિરાશ થઈ ગયો હતો. ન્યુઝીલેન્ડ સામેની સિરીઝ બાદ તે માનસિક રીતે તૂટી ગયો હતો અને પોતાના ભવિષ્ય વિશે વિચારવા લાગ્યો હતો. પરંતુ તેણે હાર માન્યા વગર સતત મહેનત ચાલુ રાખી. સેમસનના કહેવા મુજબ કદાચ ભગવાનની યોજના કંઈક અલગ જ હતી અને મોટા સપનાઓ જોવાની હિંમતનું ઇનામ તેને આજે મળ્યું છે.

આ મુશ્કેલ સમયમાં ઘણા પૂર્વ ખેલાડીઓએ તેને પ્રોત્સાહન આપ્યું. ખાસ કરીને ભારતીય ક્રિકેટના દિગ્ગજ બેટ્સમેન Sachin Tendulkar સાથે તેની સતત વાતચીત થતી રહી. સેમસને જણાવ્યું કે તેણે સચિન સાથે લાંબી ચર્ચાઓ કરી અને તેમના માર્ગદર્શનથી તેને આત્મવિશ્વાસ મળ્યો. અંતમાં સંજુ સેમસને આ સિદ્ધિનો શ્રેય તમામ લોકોને આપ્યો જેમણે મુશ્કેલ સમયમાં તેનો સાથ આપ્યો અને તેના પર વિશ્વાસ રાખ્યો. તેણે કહ્યું કે ‘પ્લેયર ઓફ ધ ટુર્નામેન્ટ’નો એવોર્ડ તેના માટે ખૂબ ખાસ છે અને હાલમાં તે આ ઐતિહાસિક ક્ષણનો પૂરો આનંદ માણવા માંગે છે.