દિલ્હી હાઈકોર્ટે અભિનેતા સલમાન ખાનના વ્યક્તિત્વ અધિકારો સાથે સંકળાયેલા કેસમાં ચીની AI વોઈસ પ્લેટફોર્મ દ્વારા દાખલ કરવામાં આવેલી અરજી પર વિચાર કરવા સંમતિ આપી છે. ચીની AI પ્લેટફોર્મે દિલ્હી હાઈકોર્ટના આદેશને પડકાર્યો છે જેમાં અભિનેતાના અવાજ, નામ, ઇમેજ અને ઓળખના વ્યાપારી દુરુપયોગને અટકાવવામાં આવ્યો હતો.
સલમાન ખાનને ફટકારવામાં આવી નોટિસ
દિલ્હી હાઈકોર્ટે અભિનેતા સલમાન ખાનને નોટિસ જારી કરીને અરજીનો પોતાનો પક્ષ રજૂ કરવા જણાવ્યું છે. દિલ્હી હાઈકોર્ટે સલમાન ખાનને પોતાનો જવાબ દાખલ કરવા માટે ચાર અઠવાડિયાનો સમય આપ્યો છે. હાઈકોર્ટે એ પણ સ્પષ્ટ કર્યું છે કે કેસમાં તમામ પક્ષકારોની દલીલો સાંભળ્યા પછી જ આગળની કાર્યવાહીનો નિર્ણય લેવામાં આવશે.
દિલ્હી હાઈકોર્ટે આ કેસમાં આગામી સુનાવણીની તારીખ 27 ફેબ્રુઆરી નક્કી કરી છે.
અગાઉ, દિલ્હી હાઈકોર્ટે સલમાન ખાનના વ્યક્તિત્વના અધિકારોનું રક્ષણ કર્યું હતું અને તેમની પરમીશન વિના તેમના નામ, અવાજ અને અન્ય વિશિષ્ટ ઓળખ તત્વોના ઉપયોગ પર પ્રતિબંધ મૂક્યો હતો.
આ ફિલ્મમાં સલમાન ખાન જોવા મળશે
કામના મોરચે, સલમાન ખાન છેલ્લે ફિલ્મ સિકંદરમાં જોવા મળ્યો હતો, જેમાં તેની સામે રશ્મિકા મંદાના હતી. સલમાન ખાનની આ ફિલ્મ ફ્લોપ ગઈ અને તેને ખરાબ સમીક્ષાઓ મળી. હવે, સલમાન ખાનના હાથમાં ધ બેટલ ઓફ ગલવાન છે. આ ફિલ્મે ઘણી ચર્ચા જગાવી છે. સલમાન ખાને ફિલ્મ માટે ખૂબ મહેનત કરી હતી, શૂટિંગ દરમિયાન ઈજા પણ સહન કરવી પડી હતી.
આ ફિલ્મનું ડાયરેક્ટ અપૂર્વ લાખિયા કરી રહ્યા છે. સલમાન ખાન ઉપરાંત, આ ફિલ્મમાં ચિત્રાંગદા સિંહ, અંકુર ભાટિયા, અભિલાષ ચૌધરી અને હીરા સોહલ પણ છે. ફિલ્મને લઈને ઘણી ચર્ચા થઈ રહી છે. ફિલ્મમાંથી સલમાનનો લુક પણ જાહેર કરવામાં આવ્યો છે.
