Salil Arora: સનરાઇઝર્સ હૈદરાબાદ (SRH)ની બેટિંગ લાઇનઅપ છેલ્લી કેટલીક IPL સીઝનમાં અત્યંત આક્રમક અને ભયંકર રહી છે. અભિષેક શર્મા, ટ્રેવિસ હેડ, ઇશાન કિશન અને હેનરિક ક્લાસેન જેવા ખેલાડીઓની હાજરીથી વિરોધી બોલરો માટે રન રોકવા મુશ્કેલ બની ગયા છે. હવે IPL 2026 પહેલાં આ લાઇનઅપમાં એક નવું નામ ઉમેરાયું છે –23 વર્ષીય સલિલ અરોરા, જેણે પ્રેક્ટિસ મેચમાં પોતાની વિસ્ફોટક બેટિંગથી બધાને ચોંકાવી દીધા છે.
પંજાબ તરફથી ઘરેલુ ક્રિકેટ
સલિલ અરોરા, જે પંજાબ તરફથી ઘરેલુ ક્રિકેટ રમે છે, તેણે સૈયદ મુશ્તાક અલી ટ્રોફી (SMAT 2025-26)માં ઝારખંડ સામે માત્ર 39 બોલમાં સદી ફટકારી હતી અને અંતે 45 બોલમાં અણનમ 125 રન બનાવ્યા, જેમાં 9 ચોગ્ગા અને 11 છગ્ગાનો સમાવેશ થાય છે. આ પ્રદર્શનને કારણે તે IPL 2026 ની હરાજીમાં ધ્યાન ખેંચ્યું અને SRHએ તેને ₹30 લાખના બેઝ પ્રાઇસથી ₹1.50 કરોડમાં ખરીદી લીધો.
ડેથ ઓવર્સમાં બેટિંગ કરતાં 16 બોલમાં 47 રન બનાવ્યા
તાજેતરમાં 21 માર્ચ, 2026ના રોજ રાજીવ ગાંધી ઇન્ટરનેશનલ સ્ટેડિયમ ખાતે SRHની ઇન્ટ્રા-સ્ક્વોડ પ્રેક્ટિસ મેચમાં સલિલે ડેથ ઓવર્સમાં બેટિંગ કરતાં 16 બોલમાં 47 રન બનાવ્યા. આ દરમિયાન તેણે સતત પાંચ બોલમાં પાંચ છગ્ગા ફટકારીને બધાને પ્રભાવિત કર્યા. આ પ્રદર્શન SRHની બેટિંગને વધુ ખતરનાક બનાવી રહ્યું છે અને વિરોધી ટીમો માટે તેમની સામે રમવું મુશ્કેલ બની રહ્યું છે.
વિકેટકીપર-બેટ્સમેન
સલિલ અરોરા વિકેટકીપર-બેટ્સમેન તરીકે જાણીતા છે અને તેમની આક્રમક શૈલી SRHની 'પ્લે વિથ ફાયર' માનસિકતા સાથે સારી રીતે બંધબેસે છે. IPL 2026માં તેમની એન્ટ્રીથી ઓરેન્જ આર્મીને નવી ઉર્જા મળી છે અને ફિનિશર તરીકે તેમની ભૂમિકા ખૂબ જ મહત્વની રહેશે. આ યુવા તારાને જોતાં લાગે છે કે IPL 2026માં સનરાઇઝર્સ હૈદરાબાદની બેટિંગ વધુ વિનાશક બનશે!
