વિશ્વભરમાં રશિયા અને યુક્રેન વચ્ચે ચાલી રહેલા સંઘર્ષને શાંત પાડવા માટેના રાજદ્વારી પ્રયાસો તેજ બન્યા છે ત્યારે જ રશિયાએ ફરી એકવાર આક્રમક વલણ અપનાવ્યું છે. યુક્રેનની રાજધાની કીવ અને તેની આસપાસના વિસ્તારોમાં રશિયા દ્વારા શનિવારે કરવામાં આવેલા ઘાતક ડ્રોન અને મિસાઈલ હુમલાઓમાં કુલ 3 નિર્દોષ નાગરિકોના મોત થયા છે. આ ઘટના એવા સમયે બની છે જ્યારે અમેરિકા સહિતના પશ્ચિમી દેશો યુદ્ધવિરામ માટે સતત પ્રયત્નો કરી રહ્યા છે પરંતુ આ હુમલાએ શાંતિની આશાઓ પર પાણી ફેરવી દીધું છે.
કીવના સૈન્ય પ્રશાસને પોતાની ટેલિગ્રામ ચેનલ પર સત્તાવાર માહિતી આપતા જણાવ્યું હતું કે રશિયન હુમલાઓને કારણે કીવ શહેરમાં બે લોકો માર્યા ગયા છે. શહેરના મેયર વિટાલી ક્લિટ્સકોએ વિગતો આપતા કહ્યું કે આ હુમલાઓમાં અંદાજે 29 જેટલા લોકો ઘાયલ થયા છે. રશિયન ડ્રોન દ્વારા રહેણાંક વિસ્તારોને નિશાન બનાવવામાં આવતા ઘણી ઈમારતો કાટમાળમાં ફેરવાઈ ગઈ છે. આ ઉપરાંત કીવના પશ્ચિમ ભાગમાં વીજ પુરવઠો ખોરવાઈ ગયો છે. કીવ ક્ષેત્રના અન્ય ભાગોમાં થયેલા મિસાઈલ અને ડ્રોન હુમલામાં વધુ એક મહિલાનું મોત થયું છે અને 8 લોકો ગંભીર રીતે ઘાયલ થયા છે.
આ તણાવપૂર્ણ માહોલ વચ્ચે પણ કૂટનીતિક ગતિવિધિઓ ચાલુ છે. યુક્રેનના રાષ્ટ્રપતિ કાર્યાલયના એક ઉચ્ચ અધિકારીએ જણાવ્યું કે યુક્રેનના શાંતિ વાટાઘાટકારો આ વિકેન્ડમાં અમેરિકન સમકક્ષો સાથે મહત્વની મુલાકાત કરવાના છે. ત્યારબાદ એક અમેરિકન પ્રતિનિધિમંડળ આવતા સપ્તાહે મોસ્કો જઈને રશિયન રાષ્ટ્રપતિ વ્લાદિમીર પુતિન સાથે સીધી વાતચીત કરી શકે છે. ઉલ્લેખનીય છે કે છેલ્લા લગભગ 4 વર્ષથી ચાલી રહેલા આ લોહિયાળ જંગનો અંત લાવવા માટે અમેરિકી રાષ્ટ્રપતિ ડોનાલ્ડ ટ્રમ્પે ગત સપ્તાહે 28 મુદ્દાની એક વિસ્તૃત શાંતિ યોજના રજૂ કરી હતી. જોકે વર્તમાન હુમલાઓ જોતા લાગે છે કે યુદ્ધનો અંત લાવવો હજુ પણ એક મોટો પડકાર છે.
