ભારતીય બજારમાં ઇલેક્ટ્રિક વાહનોનો ક્રેઝ ઝડપથી વધી રહ્યો છે, ત્યારે ટુ-વ્હીલર ક્ષેત્રની દિગ્ગજ કંપની રોયલ એનફિલ્ડ પણ હવે આ રેસમાં જોડાવા માટે સજ્જ થઈ ગઈ છે. લાંબા સમયની રાહ જોયા બાદ કંપનીની પ્રથમ ઇલેક્ટ્રિક બાઇક રોડ પર ટેસ્ટિંગ દરમિયાન જોવા મળી છે. મીડિયા અહેવાલો મુજબ, આ બાઇક તેના પ્રોડક્શન મોડલની ખૂબ જ નજીક જણાય છે, જે સૂચવે છે કે કંપની તેને ટૂંક સમયમાં જ સત્તાવાર રીતે બજારમાં ઉતારવાની તૈયારી કરી રહી છે. આ ઇલેક્ટ્રિક અવતારમાં કંપનીના ક્લાસિક વારસા અને આધુનિક ટેકનોલોજીનો અદભૂત સમન્વય જોવા મળી શકે છે.
ક્લાસિક લુક સાથે આધુનિક ડિઝાઇન
ટેસ્ટિંગ દરમિયાન જે તસવીરો સામે આવી છે તે મુજબ, Royal Enfield Flying Flea ઇલેક્ટ્રિક બાઇકને કોઈપણ કવર વગર ખુલ્લેઆમ ટેસ્ટ કરવામાં આવી રહી છે. આ બાઇકની ડિઝાઇન બીજા વિશ્વયુદ્ધ સમયની મૂળ 'ફ્લી' મોટરસાઈકલથી પ્રેરિત હોવાનું જણાય છે. આમાં ગોળાકાર હેડલાઇટ, મોટા એલોય વ્હીલ્સ અને ડ્રાઈવ બેલ્ટ સેટઅપ જોવા મળે છે. બાઇકનો આકાર પાતળો અને આકર્ષક રાખવામાં આવ્યો છે, જે તેને જૂના જમાનાની એનફિલ્ડ જેવો વિન્ટેજ લુક આપે છે. આ ઉપરાંત, સુરક્ષા માટે બંને વ્હીલ્સમાં ડિસ્ક બ્રેકની સુવિધા પણ આપવામાં આવી છે.
પાવરફુલ બેટરી અને રેન્જની અપેક્ષા
કંપનીએ હજુ સુધી આ મોટરસાઈકલની બેટરી ક્ષમતા કે મોટર પાવર વિશે સત્તાવાર વિગતો જાહેર કરી નથી. જોકે, ઓટોમોબાઈલ નિષ્ણાતોનું માનવું છે કે આ બાઇક 350 થી 400 CC ની ક્ષમતા ધરાવતી ICE (પેટ્રોલ) મોટરસાઈકલ જેટલી જ પાવરફુલ હશે. આમાં 4 થી 5 kWh ની ક્ષમતા ધરાવતી બેટરી પેક મળી શકે છે, જે સિંગલ ચાર્જ પર અંદાજે 150 કિલોમીટર સુધીની રેન્જ આપી શકે તેવી શક્યતા છે.
ભારતમાં ક્યારે થશે લોન્ચ?
રોયલ એનફિલ્ડ દ્વારા આ ઇલેક્ટ્રિક મોટરસાઈકલને પ્રથમ વખત EICMA 2025 માં પ્રદર્શિત કરવામાં આવી હતી. વર્તમાન ટેસ્ટિંગની ગતિ જોતા એવું અનુમાન લગાવવામાં આવી રહ્યું છે કે આગામી 2 થી 3 મહિનામાં આ બાઇક ભારતીય રસ્તાઓ પર દોડતી જોવા મળી શકે છે. કંપની તેના પ્રથમ ઇલેક્ટ્રિક પ્રોડક્ટ દ્વારા પ્રીમિયમ ઇલેક્ટ્રિક ટુ-વ્હીલર માર્કેટમાં પોતાનું પ્રભુત્વ જમાવવા માંગે છે.
