Rohit Sharma Eyes on Historical Record IND vs AUS ODI: પૂર્વ ભારતીય ODI કેપ્ટન રોહિત શર્મા 50 ઓવરના ફોર્મેટમાં ફરીથી જોવા મળશે. તે ઓસ્ટ્રેલિયા સામે રવિવાર, 19 ઓક્ટોબરથી પર્થમાં શરૂ થનારી ત્રણ મેચની ODI સીરિઝમાં રમશે. શુભમન ગિલ આ સીરિઝમાં ભારતીય ટીમનું નેતૃત્વ કરશે, જ્યારે રોહિત શર્મા એક અનુભવી બેટ્સમેન તરીકે રમશે. રોહિત શર્માએ છેલ્લે 9 માર્ચે દુબઈમાં ન્યુઝીલેન્ડ સામે ODI રમી હતી, જ્યાં તેને 76 રન બનાવ્યા હતા અને પ્લેયર ઓફ ધ મેચનો એવોર્ડ જીત્યો હતો. હવે, તે મજબૂત ઓસ્ટ્રેલિયન ટીમ સામે બેટથી વધુ એક પ્રભાવ પાડવાનો પ્રયાસ કરશે.
તેંડુલકરનો સેંચુરીનો રેકોર્ડ પણ ચર્ચામાં
રોહિત શર્માએ ઓસ્ટ્રેલિયા સામે અત્યાર સુધીમાં 8 વનડે સેંચુરી ફટકારી છે. જો તે વધુ 2 સેંચુરી ફટકારે છે, તો તે સચિન તેંડુલકરનો રેકોર્ડ (9 સેંચુરી) તોડીને ઓસ્ટ્રેલિયા સામે સૌથી વધુ વનડે સેંચુરી ફટકારનાર બેટ્સમેન બનશે. વધુમાં, તે ઓસ્ટ્રેલિયા સામે 10 વખત ત્રિ-અંકી સ્કોર બનાવનાર વિશ્વનો પ્રથમ બેટ્સમેન બની શકે છે.
વનડેમાં સૌથી વધુ છગ્ગા ફટકારવાનો રેકોર્ડ
રોહિત શર્માએ તેની 273 વનડેમાં 344 છગ્ગા ફટકાર્યા છે. પાકિસ્તાનના પૂર્વ ઓલરાઉન્ડર શાહિદ આફ્રિદીએ 351 છગ્ગા ફટકારીને વિશ્વ રેકોર્ડ બનાવ્યો હતો. હવે, રોહિત શર્મા પાસે શાહિદ આફ્રિદીનો રેકોર્ડ તોડવા માટે ફક્ત 8 છગ્ગાની જરૂર છે. જો તે આ સિદ્ધિ હાંસલ કરશે, તો તે વનડે ઇતિહાસમાં સૌથી વધુ છગ્ગા ફટકારનાર બેટ્સમેન બની જશે.
ઓસ્ટ્રેલિયામાં 1000 રન પૂરા કરવાની તક
રોહિત શર્માએ ઓસ્ટ્રેલિયાની ધરતી પર 19 ODI માં 990 રન બનાવ્યા છે. ઓસ્ટ્રેલિયામાં 1,000 ODI રન પૂરા કરનાર પ્રથમ ભારતીય બેટ્સમેન બનવા માટે તેને ફક્ત 10 રનની જરૂર છે.
ગાંગુલીનો રેકોર્ડ તોડવાથી માત્ર આટલા રન દૂર
રોહિત શર્માએ અત્યાર સુધીમાં ટીમ ઈન્ડિયા માટે 11,168 વનડે રન બનાવ્યા છે. તેને સૌરવ ગાંગુલી (11,221 રન) ને પાછળ છોડીને ભારતનો ત્રીજો સૌથી વધુ વનડે રન બનાવનાર ખેલાડી બનવા માટે ફક્ત 54 રનની જરૂર છે.
500 આંતરરાષ્ટ્રીય મેચ પૂર્ણ તક
રોહિત શર્માએ અત્યાર સુધીમાં ભારત માટે 499 આંતરરાષ્ટ્રીય મેચ રમી છે. જો તે ઓસ્ટ્રેલિયા સામેની 3 વનડે મેચમાંથી કોઈપણ મેચ રમશે, તો તે સચિન તેંડુલકર, એમ. એસ ધોની, વિરાટ કોહલી અને રાહુલ દ્રવિડ પછી ભારત માટે 500 આંતરરાષ્ટ્રીય મેચ રમનાર પાંચમો ખેલાડી બનશે.
રોહિત શર્મા પાસે 20,000 આંતરરાષ્ટ્રીય રન પૂરા કરવાની તક
રોહિત શર્માએ અત્યાર સુધીમાં 499 આંતરરાષ્ટ્રીય મેચોમાં 19,700 રન બનાવ્યા છે. જો તે ઓસ્ટ્રેલિયા સામેની સીરિઝમાં 300 રન ઉમેરે છે, તો તે સચિન તેંડુલકર, વિરાટ કોહલી અને રાહુલ દ્રવિડ પછી 20,000 આંતરરાષ્ટ્રીય રન પૂરા કરનાર ચોથો ભારતીય બેટ્સમેન બની જશે.
ઓસ્ટ્રેલિયા સામે 100 છગ્ગા ફટકારવાની નજીક
રોહિત શર્માએ ઓસ્ટ્રેલિયા સામે અત્યાર સુધીમાં 46 વનડેમાં 88 છગ્ગા ફટકાર્યા છે. જો તે આગામી સીરિઝમાં વધુ 12 છગ્ગા ફટકારે તો તે કોઈ એક ટીમ સામે વનડેમાં 100 છગ્ગા મારનાર પ્રથમ ખેલાડી બની જશે.
