Rashmika-Vijay Wedding Update: સાઉથ સિનેમાથી લઈને બોલિવૂડ સુધી જે જોડીની સૌથી વધુ ચર્ચા થાય છે, તે છે રશ્મિકા મંદાના અને વિજય દેવરકોંડા. છેલ્લા ઘણા સમયથી ચાહકો જે ઘડીની રાહ જોઈ રહ્યા હતા, તે આખરે નજીક આવી હોય તેમ લાગે છે. સોશિયલ મીડિયા પર વાયરલ થયેલા એક લેટેસ્ટ વીડિયોએ ઈન્ટરનેટ પર ધૂમ મચાવી દીધી છે, જેમાં દાવો કરવામાં આવ્યો છે કે આ સ્ટાર કપલ રાજસ્થાનના ઉદયપુરમાં શાહી ઠાઠમાઠ સાથે લગ્ન કરવા જઈ રહ્યું છે. જોકે, બંને કલાકારોએ હજુ સુધી સત્તાવાર જાહેરાત કરી નથી, પરંતુ વાયરલ વીડિયોમાં દેખાઈ રહેલી ભવ્ય તૈયારીઓ કંઈક અલગ જ વાર્તા કહી રહી છે.
ઉદયપુરના સિટી પેલેસમાં યોજાશે ડેસ્ટિનેશન વેડિંગ?
મીડિયા રિપોર્ટ્સ અને સોશિયલ મીડિયા પર વાયરલ થયેલી વિગતો અનુસાર, વિજય અને રશ્મિકાએ તેમના લગ્ન માટે રાજસ્થાનની પસંદગી કરી છે. ઉદયપુરનો વિશ્વપ્રસિદ્ધ 'સિટી પેલેસ' આ ભવ્ય લગ્નનું સાક્ષી બનશે તેવા સમાચાર છે. ઈન્સ્ટાગ્રામ પર તાન્યા નામની એક યુઝરે શેર કરેલા વીડિયોમાં દાવો કરવામાં આવ્યો છે કે પેલેસમાં તૈયારીઓ જોરશોરથી શરૂ થઈ ગઈ છે. વીડિયોમાં ડેકોરેશનની ઝલક જોઈ શકાય છે, જેમાં લાલ રંગના પડદા અને આલીશાન ઝૂમ્મર પેલેસની શોભા વધારી રહ્યા છે. આ નજારો કોઈ મોટા ફિલ્મી સેટ જેવો ભવ્ય લાગી રહ્યો છે.
ફેબ્રુઆરીએ લગ્નગ્રંથિમાં બંધાશે વિજય-રશ્મિકા?
સોશિયલ મીડિયા પર ચાલી રહેલી ચર્ચાઓ મુજબ, આ સ્ટાર કપલ 26 ફેબ્રુઆરી 2026ના રોજ લગ્નના બંધનમાં બંધાઈ શકે છે. અગાઉ એવા પણ અહેવાલો આવ્યા હતા કે ગત મહિને હૈદરાબાદમાં અત્યંત ખાનગી રીતે બંનેએ સગાઈ કરી લીધી છે. આ સેરેમનીમાં માત્ર નજીકના મિત્રો અને પરિવારજનો જ હાજર રહ્યા હતા. હવે ઉદયપુરમાં થનારા આ 'ગ્રાન્ડ વેડિંગ'માં ફિલ્મ ઈન્ડસ્ટ્રીના અનેક દિગ્ગજો હાજરી આપે તેવી શક્યતા છે.
ફેન્સમાં જોવા મળી રહ્યો છે ભારે ઉત્સાહ
રશ્મિકા અને વિજયના લગ્નના સમાચાર આવતા જ ચાહકોમાં ખુશીની લહેર દોડી ગઈ છે. વાયરલ વીડિયો પર યુઝર્સ સતત પ્રતિક્રિયા આપી રહ્યા છે. કેટલાક લોકો લગ્નની ચોક્કસ તારીખ પૂછી રહ્યા છે, તો કેટલાક 'પુષ્પા' ગર્લ અને 'અર્જુન રેડ્ડી' સ્ટારને અત્યારથી જ અભિનંદન પાઠવી રહ્યા છે. ભલે કપલે મૌન સેવ્યું હોય, પણ ઉદયપુરના મહેલમાં ચાલી રહેલી રોશની અને સજાવટ ઘણું બધું કહી જાય છે.
વર્ક ફ્રન્ટ પર રશ્મિકા અને વિજય
રશ્મિકા મંદાના હાલમાં તેની આગામી ફિલ્મોના શૂટિંગમાં વ્યસ્ત છે, જેમાં 'પુષ્પા ૨' સૌથી વધુ ચર્ચામાં છે. બીજી તરફ વિજય દેવરકોંડા પણ તેના આગામી પ્રોજેક્ટ્સ પર કામ કરી રહ્યો છે. બંનેના પ્રોફેશનલ લાઈફની સાથે હવે પર્સનલ લાઈફમાં પણ મોટો વળાંક આવવા જઈ રહ્યો છે, જેની સત્તાવાર પુષ્ટિની ચાહકો આતુરતાથી રાહ જોઈ રહ્યા છે.
