ભારતીય સિનેમાના સૌથી લોકપ્રિય 'પાવર કપલ' રશ્મિકા મંદાના અને વિજય દેવરકોંડાના લગ્ન આડે હવે ગણતરીના કલાકો જ બાકી છે. 26 ફેબ્રુઆરી 2026ના રોજ આ જોડી લગ્નગ્રંથિથી જોડાશે. વર્ષો સુધી પોતાના સંબંધોને સિક્રેટ રાખ્યા બાદ હવે આ લવ-બર્ડ્સ હંમેશા માટે એક થવા જઈ રહ્યા છે. લગ્ન પહેલાના ઉત્સવની શરૂઆત ધામધૂમથી થઈ ચૂકી છે અને ગત રાત્રે આ કપલે એક શાનદાર પ્રી-વેડિંગ ડિનર પાર્ટીનું આયોજન કર્યું હતું, જેમાં પરિવાર અને ખાસ મિત્રો હાજર રહ્યા હતા.
ખાસ શેફ દ્વારા તૈયાર થયું સ્પેશિયલ મેનૂ
મળતી માહિતી મુજબ, વિજય અને રશ્મિકાએ મહેમાનો માટે એક લક્ઝરી ડિનર પાર્ટી હોસ્ટ કરી હતી. આ પાર્ટી માટે જાણીતા શેફ્સની એક ખાસ ટીમ બોલાવવામાં આવી હતી, જેમણે કપલની પસંદગીની વાનગીઓ પીરસી હતી. આ ડિનર પાર્ટી લગ્ન પહેલાના ફંક્શનની શરૂઆત હતી, જેમાં બંને પરિવારો વચ્ચે ખૂબ જ આત્મીયતા જોવા મળી હતી.
કેળાના પાન પર ભોજન અને દક્ષિણ ભારતીય પરંપરા
રશ્મિકા અને વિજયના આ ‘રોયલ વેડિંગ’ માત્ર ભવ્યતા જ નહીં, પરંતુ દક્ષિણ ભારતીય સંસ્કૃતિના ઊંડા મૂળ અને ભવ્ય પરંપરાઓનો પણ અદભૂત નમૂનો બની રહેશે. આ લગ્ન સમારોહ સંપૂર્ણપણે દક્ષિણ ભારતીય રીત-રિવાજો મુજબ યોજાવા જઈ રહ્યો છે, જેમાં ભોજનની શૈલી ખાસ આકર્ષણનું કેન્દ્ર બનશે. અહેવાલો અનુસાર, મહેમાનોને અત્યંત પવિત્ર અને પરંપરાગત ગણાતા કેળાના પાન પર શુદ્ધ દક્ષિણ ભારતીય વાનગીઓ પીરસવામાં આવશે. સ્વાગતની પરંપરામાં પણ કુદરતી સ્પર્શ ઉમેરતા, મહેમાનોનું અભિવાદન ઠંડા અને તાજા નાળિયેર પાણીથી કરવામાં આવશે. સમગ્ર લગ્નની થીમ 'સાદગી અને સંસ્કૃતિના સંગમ' પર આધારિત રાખવામાં આવી છે, જેમાં દક્ષિણ ભારતની પરંપરાગત કલા, સંગીત અને શૈલીની ઝલક જોવા મળશે, જે આ લગ્નને અન્ય સેલિબ્રિટી વેડિંગ કરતા અલગ અને યાદગાર બનાવશે.
શા માટે ઈન્ડસ્ટ્રીના મિત્રોને લગ્નમાં નથી બોલાવ્યા?
કપલે નિર્ણય લીધો છે કે લગ્નને અત્યંત પ્રાઈવેટ અને 'ઇન્ટિમેટ' રાખવામાં આવે. આ જ કારણ છે કે ઉદયપુરના લગ્ન પ્રસંગે ફિલ્મ જગતના મોટા સિતારાઓને આમંત્રણ આપવામાં આવ્યું નથી. આ નિર્ણય પાછળનો હેતુ પરિવાર સાથે શાંતિથી સમય વિતાવવાનો છે. જોકે, ચાહકો નિરાશ ન થાય તે માટે કપલે ઇન્સ્ટાગ્રામ પર એક જોઈન્ટ નોટ શેર કરીને આ લગ્નને 'ધ વેડિંગ ઓફ VIROSH' નામ આપ્યું છે.
હૈદરાબાદમાં યોજાનાર ગ્રાન્ડ રિસેપ્શનની વિગતો
ઉદયપુરમાં અત્યંત ખાનગી રીતે લગ્નગ્રંથિથી જોડાયા બાદ, રશ્મિકા અને વિજય પોતાની લગ્નની ખુશીઓને સહકલાકારો અને મિત્રો સાથે વહેંચવા માટે હૈદરાબાદમાં એક ભવ્ય રિસેપ્શનનું આયોજન કરવા જઈ રહ્યા છે. આ ગ્રાન્ડ ઇવેન્ટ 4 માર્ચના રોજ હૈદરાબાદની પ્રતિષ્ઠિત અને આલીશાન હોટલ 'તાજ ક્રિષ્ના' ખાતે યોજાશે. આ પ્રસંગે તેલુગુ ફિલ્મ ઉદ્યોગના લગભગ તમામ મોટા સુપરસ્ટાર્સ, જાણીતા દિગ્દર્શકો અને દિગ્ગજ રાજકીય હસ્તીઓ હાજર રહે તેવી શક્યતા છે. આ રિસેપ્શનની ખાસિયત એ છે કે, ઉદયપુરના ફંક્શનમાં માત્ર પરિવાર જ હાજર રહ્યો હોવાથી, અહીં કપલ ખાસ કરીને પોતાના ઈન્ડસ્ટ્રીના મિત્રો અને કલીગ્સ સાથે મળીને આ ખાસ અવસરની ભવ્ય ઉજવણી કરશે.
'ગીતા ગોવિંદમ' થી શરૂ થયેલો પ્રેમ
રશ્મિકા અને વિજયની જોડી પહેલીવાર વર્ષ 2018માં ફિલ્મ 'ગીતા ગોવિંદમ' માં જોવા મળી હતી. આ ફિલ્મની શૂટિંગ દરમિયાન જ તેમની વચ્ચે મિત્રતા થઈ હતી, જે બાદમાં 'ડિયર કોમરેડ' સુધી પહોંચતા પ્રેમમાં પરિણમી હતી. વર્ષોની સિક્રેટ ડેટિંગ અને ફેન્સના અસંખ્ય સવાલો બાદ આખરે 'VIROSH' એક થવા જઈ રહ્યા છે, જેનાથી ચાહકોમાં ભારે ખુશીનો માહોલ છે.
