છેલ્લા ઘણા સમયથી જેની આતુરતાપૂર્વક રાહ જોવાતી હતી તે સાઉથના સુપરસ્ટાર કપલ રશ્મિકા મંદાના અને વિજય દેવરકોંડાના લગ્નની સત્તાવાર જાહેરાત થઈ ગઈ છે. અનેક અટકળો અને અફવાઓ પર પૂર્ણવિરામ મૂકતા આ જોડીએ એક ભાવુક નોટ સોશિયલ મીડિયા પર શેર કરી છે. આ લગ્નની સૌથી ખાસ વાત એ છે કે તેમણે પોતાના લગ્નને ‘VIROSH’ (વિરોશ) નામ આપ્યું છે. આ માત્ર એક નામ નથી, પરંતુ વર્ષોથી ફેન્સ જે રીતે આ જોડીને પ્રેમ આપી રહ્યા હતા તેનું પરિણામ છે. ઉદયપુરના શાહી ઠાઠ વચ્ચે આ જોડી પ્રભુતામાં પગલાં પાડવા જઈ રહી છે, જેની સાથે જ દક્ષિણ ભારતીય સિનેમાની સૌથી ચર્ચિત લવ સ્ટોરી મંજિલ સુધી પહોંચશે.
કેમ રાખ્યું ‘VIROSH’ નામ? ફેન્સને આપ્યું અનોખું સન્માન
વિજય દેવરકોંડા અને રશ્મિકા મંદાનાએ પોતાની લગ્નની જાહેરાત માટે જે જોઈન્ટ નોટ શેર કરી છે, તેમાં સૌથી વધુ ધ્યાન તેમના વેડિંગ ટાઈટલે ખેંચ્યું છે. આ જોડીએ પોતાના લગ્નને સત્તાવાર રીતે ‘ધ વેડિંગ ઓફ VIROSH’ નામ આપ્યું છે. ખાસ વાત એ છે કે,આ નામ પાછળ કોઈ પ્રોફેશનલ વેડિંગ પ્લાનર કે કોઈ કૌટુંબિક પરંપરા નથી, પરંતુ આ નામ તેમના ચાહકોએ આપેલું એક અનોખું સન્માન છે. વર્ષો પહેલા સોશિયલ મીડિયા પર ફેન્સે વિજયના નામના પ્રથમ બે અક્ષર ‘VI’ અને રશ્મિકાના નામના અંતિમ અક્ષરો ‘ROSH’ ને જોડીને આ ‘શીપ નેમ’ (Ship Name) બનાવ્યું હતું. કપલે આ અંગે અત્યંત ભાવુક થતા જણાવ્યું કે, "જ્યારે અમે અમારા ભવિષ્ય અંગે કશું જ નક્કી નહોતું કર્યું, ત્યારે પણ ચાહકોએ અમને આ નામ અને અપાર પ્રેમ આપ્યો હતો. તેથી, અમારા જીવનની આ નવી અને સૌથી મોટી શરૂઆતને અમે ફેન્સને સમર્પિત કરીએ છીએ. આ લગ્ન જેટલા અમારા છે, તેટલા જ અમારા ચાહકોના પણ છે."
ઉદયપુરમાં લગ્ન અને હૈદરાબાદમાં ગ્રાન્ડ રિસેપ્શન
રશ્મિકા અને વિજયના આ હાઈ-પ્રોફાઈલ લગ્ન માટે રાજસ્થાનના લેક સિટી તરીકે જાણીતા ઉદયપુરની પસંદગી કરવામાં આવી છે. 26 ફેબ્રુઆરીના રોજ ઉદયપુરના એક આલીશાન પેલેસમાં આ જોડી અત્યંત ખાનગી સમારોહમાં સાત ફેરા લઈને લગ્નગ્રંથિથી જોડાશે. આ વેડિંગ ફંક્શનમાં માત્ર પરિવારના સભ્યો અને નજીકના મિત્રો જ હાજરી આપશે. જોકે, લગ્નની આ ખાનગી ઉજવણી બાદ ચાહકો અને ફિલ્મ ઈન્ડસ્ટ્રીના મિત્રો માટે એક ભવ્ય આયોજન કરવામાં આવ્યું છે. 4 માર્ચના રોજ હૈદરાબાદમાં એક ગ્રાન્ડ રિસેપ્શન યોજાશે, જેમાં દક્ષિણ ભારતીય ફિલ્મ ઉદ્યોગ અને બોલિવૂડના તમામ દિગ્ગજ સિતારાઓ તથા રાજકીય હસ્તીઓ હાજરી આપી નવદંપતીને આશીર્વાદ આપે તેવી પૂરેપૂરી શક્યતા છે.
વિજય દેવરકોંડા અને રશ્મિકા મંદાનાની લવ સ્ટોરી કોઈ ફિલ્મી પ્લોટથી ઓછી ઉતરતી નથી. આ સફરની શરૂઆત વર્ષ 2018માં થઈ હતી, જ્યારે બંને પહેલીવાર સુપરહિટ તેલુગુ ફિલ્મ 'ગીતા ગોવિંદમ' ના સેટ પર મળ્યા હતા. પડદા પર તેમની જોડીને એટલી પસંદ કરવામાં આવી કે આ જ વર્ષમાં તેમની બીજી ફિલ્મ 'ડિયર કોમરેડ' પણ રિલીઝ થઈ. આ ફિલ્મના શૂટિંગ દરમિયાન જ તેમની ઓન-સ્ક્રીન કેમિસ્ટ્રી વાસ્તવિક જીવનના પ્રેમમાં બદલાવા લાગી હતી. જોકે, છેલ્લા 8 વર્ષથી બંનેએ ક્યારેય પણ મીડિયા સમક્ષ પોતાના સંબંધોનો ખુલીને સ્વીકાર કર્યો નહોતો. ઘણીવાર વેકેશનના ફોટા અને સોશિયલ મીડિયા પોસ્ટ્સ પરથી ફેન્સ અનુમાન લગાવતા હતા કે બંને સાથે છે, પરંતુ આ જોડીએ હંમેશા પોતાના રિલેશનને સિક્રેટ રાખ્યા હતા. હવે આખરે વર્ષોના આ ઇંતેજારનો અંત આવ્યો છે અને આ સુંદર જોડી હંમેશા માટે એક થવા જઈ રહી છે.
ફેન્સ માટે ભાવુક સંદેશ
પોતાની નોટમાં કપલે લખ્યું કે, "અમારા પ્રિય ચાહકો, જ્યારે અમે અમારા માટે કંઈ જ નક્કી નહોતું કર્યું ત્યારે તમે અમારી સાથે હતા. તમે અમને 'VIROSH' નામ આપ્યું. આજે અમે અમારી આ નવી શરૂઆત તમને સમર્પિત કરીએ છીએ. આટલા વર્ષો સુધી અમને સાથ આપવા બદલ આભાર."
