દીકરી આદિરાનો પત્ર વાંચીને સ્ટેજ પર જ રડી પડી રાની મુખર્જી : 'મમ્મા, તમે બેસ્ટ છો પણ તમારો ગુસ્સો...', વાંચો મા-દીકરીનો આ હૃદયસ્પર્શી કિસ્સો

બોલિવૂડની 'બંગાળી બ્યુટી' અને પાવરહાઉસ પરફોર્મર રાની મુખર્જીએ હિન્દી સિનેમામાં સફળતાપૂર્વક 30 વર્ષ પૂર્ણ કર્યા છે. 'રાજા કી આયેગી બારાત'થી શરૂ થયેલી આ સફર આજે 'મર્દાની' સુધી પહોંચી છે. તાજેતરમાં યશરાજ ફિલ્મ્સ દ્વારા રાનીની આ સિદ્ધિની ઉજવણી કરવા માટે એક ખાસ ઈવેન્ટનું આયોજન કરવામાં આવ્યું હતું. જોકે, આ સેલિબ્રેશનમાં સૌનું ધ્યાન ત્યારે ખેંચાયું જ્યારે રાનીની 9 વર્ષની દીકરી આદિરાનો એક પત્ર સામે આવ્યો. વર્ષો સુધી લાઈમલાઈટથી દૂર રહેલી આદિરાએ પોતાની માતા માટે જે શબ્દો લખ્યા, તે સાંભળીને રાની મુખર્જી પોતાની જાતને રોકી શકી નહીં અને સ્ટેજ પર જ ભાવુક થઈ ગઈ હતી.

કરન જોહરે વાંચ્યો આદિરાનો 'સીક્રેટ' લેટર

આ ખાસ ઈવેન્ટને રાનીના ખાસ મિત્ર અને ફેમસ ડિરેક્ટર કરન જોહરે હોસ્ટ કરી હતી. કરને જ્યારે આદિરાએ પોતાના હાથે લખેલો પત્ર વાંચવાનું શરૂ કર્યું ત્યારે હોલમાં એકદમ શાંતિ છવાઈ ગઈ હતી. આદિરાએ તેની મમ્મીના 30 વર્ષના કરિયર પર જે લાગણીઓ વ્યક્ત કરી હતી, તે દરેકના દિલને સ્પર્શી ગઈ હતી. રાની માટે તે એક એવી ક્ષણ હતી જ્યાં એક એક્ટ્રેસ તરીકેની તેની સફળતા તેની દીકરીના પ્રેમ સામે નાની લાગતી હતી.

"તમે દુનિયાની બેસ્ટ મમ્મી છો, પણ..."

આદિરાએ પત્રની શરૂઆત ખૂબ જ વહાલથી કરી હતી. તેણે લખ્યું, "હેલો મમ્મા, સૌથી પહેલા તો હું તમને કહેવા માંગુ છું કે હું તમને ખૂબ પ્રેમ કરું છું. તમે દુનિયાની સૌથી શ્રેષ્ઠ માતા છો. આપણે સાથે ઘણી યાદો બનાવી છે – ખુશીની, રડવાની અને ઘણી મજેદાર પણ!"

પત્રમાં આદિરાએ રાનીની ખૂબીઓ અને ખામીઓ વિશે પણ ખૂબ જ સુંદર રીતે લખ્યું

• વારસામાં મળેલી કળા: આદિરાએ જણાવ્યું કે તેને તેની મમ્મી પાસેથી એક્ટિંગ, ડાન્સિંગ અને પેઇન્ટિંગની કળા વારસામાં મળી છે.

• ના ગમતી વાત: પત્રમાં એક રમુજી અને સાચી વાત પણ હતી. આદિરાએ લખ્યું, "એક વાત જે મને ગમતી નથી, પણ તે પણ તમારા તરફથી જ મળી છે, તે છે તમારું જલ્દી ગુસ્સે થઈ જવું." આ સાંભળીને ત્યાં હાજર સૌના ચહેરા પર સ્મિત આવી ગયું હતું.

ગણિતમાં મમ્મી કાચી અને દીકરી પાકી!

આદિરાએ પત્રમાં એ પણ ઉલ્લેખ કર્યો કે ભલે તેનો દેખાવ અને આદતો મમ્મી જેવી હોય, પણ કેટલીક બાબતોમાં તે અલગ છે. તેણે લખ્યું, "કેટલીક વાતો મારામાં છે જે તમારામાં નથી, જેમ કે મારી સ્કૂલની ગણિતની કુશળતા (Maths skills)." આ ઉપરાંત તેણે જણાવ્યું કે રાનીને ઘેરા રંગો ગમે છે જ્યારે તેને આછા રંગો પસંદ છે. આદિરાએ અંતમાં લખ્યું કે તે મોટી થઈને તેની મમ્મી જેવી જ આત્મવિશ્વાસુ, દયાળુ અને સ્ટાઇલિશ બનવા માંગે છે.

રાની મુખર્જીની આગામી ફિલ્મ: 'મર્દાની 3'ની તૈયારી

30 વર્ષની સફર પૂરી કર્યા પછી પણ રાનીનો જાદુ ઓછો થયો નથી. ચાહકો માટે ખુશીના સમાચાર એ છે કે રાની ટૂંક સમયમાં શિવાની શિવાજી રોયના આક્રમક અંદાજમાં ‘મર્દાની 3’ માં જોવા મળશે. આ ફિલ્મનું પ્રી-પ્રોડક્શન કામ તેજ ગતિએ ચાલી રહ્યું છે.