ગુજરાતમાં એશિયાટિક સિંહોના વસવાટ માટે જાણીતા અમરેલી જિલ્લાના રાજુલા તાલુકાના કોવાયા ગામ નજીકથી એક અત્યંત હૃદયદ્રાવક અને ચોંકાવનારી ઘટના સામે આવી છે. અહીં એક સિંહણના હુમલામાં પરપ્રાંતીય યુવકનું મોત નિપજતાં સમગ્ર પંથકમાં અરેરાટી વ્યાપી ગઈ છે. ઘટનાની ગંભીરતા એ વાત પરથી સમજાય છે કે મૃતકના શરીરના મોટા ભાગના અવશેષો પણ મળી આવ્યા નહોતા અને સ્થળ પરથી માત્ર માથાનો ભાગ તથા કેટલાક હાડકાના ટુકડા જ મળી આવ્યા હોવાનું જાણવા મળ્યું છે.
પ્રાથમિક માહિતી મુજબ મૃતકની ઓળખ પ્રકાશ ચંદ્ર તરીકે થઈ છે. તે મૂળ ઉત્તરાખંડનો રહેવાસી હતો અને કોવાયા નજીક આવેલી એક હોટલ-રેસ્ટોરન્ટમાં કામ કરતો હતો. રોજગારી માટે ગુજરાત આવેલા પ્રકાશ ચંદ્ર માટે વતન જવાનો દિવસ અંતિમ સાબિત થયો હતો.
મોડી રાત્રે થયો જીવલેણ હુમલો
માહિતી અનુસાર પ્રકાશ ચંદ્ર મોડી રાત્રે પોતાના વતન જવા માટે હોટલેથી નીકળ્યો હતો. તે દરમિયાન કોવાયા ગામ નજીકના વિસ્તારમાં અંધારાનો લાભ લઈ બેઠેલી સિંહણ તેના પર અચાનક હુમલો કર્યો હતો. સ્થાનિક સ્તરે મળતી વિગતો મુજબ હુમલો એટલો ભયાનક હતો કે યુવકને બચવાનો કોઈ મોકો મળ્યો નહોતો.
હુમલા બાદ સિંહણે યુવકને નજીકની ઝાડીઓ અને સીમ વિસ્તારમાં ખેંચીને લઈ ગયો હતો. ત્યારબાદ તેણે યુવકના શરીરને ગંભીર રીતે નુકસાન પહોંચાડ્યું હતું. સવારે યુવકનો પત્તો ન લાગતા શોધખોળ શરૂ કરવામાં આવી હતી. તપાસ દરમિયાન જે દૃશ્યો સામે આવ્યા તે જોઈને સ્થાનિક લોકો અને અધિકારીઓ પણ સ્તબ્ધ થઈ ગયા હતા.
ગોમતી ઘાટ પર સર્જાયા ભયજનક દ્રશ્યો: પાણીના જોરદાર કરંટમાં 2 લોકો તણાયા, માંડ માંડ બચ્યા
માત્ર અવશેષો જ મળતા લોકોમાં ફફડાટ
ઘટનાસ્થળેથી મૃતકના શરીરના સંપૂર્ણ અવશેષો પણ મળી આવ્યા નહોતા. સ્થાનિક સૂત્રો મુજબ ત્યાં માત્ર માથાનો ભાગ અને હાડકાના કેટલાક ટુકડા મળી આવ્યા હતા. આ દૃશ્ય જોઈને ઘટનાસ્થળે હાજર લોકોમાં ભારે આઘાત ફેલાયો હતો.
ઘટનાની જાણ થતાં જ વનવિભાગ અને પોલીસની ટીમો તાત્કાલિક સ્થળ પર પહોંચી હતી. પોલીસે અવશેષોને કબ્જે લઈને કાયદેસરની કાર્યવાહી હાથ ધરી હતી, જ્યારે વનવિભાગે હુમલાખોર સિંહણની ઓળખ અને તેની હિલચાલ અંગે તપાસ શરૂ કરી હતી.
ગામલોકોમાં ભય અને ચિંતા
આ ઘટનાને પગલે કોવાયા ગામ અને આસપાસના વિસ્તારોમાં ભયનો માહોલ જોવા મળી રહ્યો છે. ખાસ કરીને રાત્રિ દરમિયાન અવરજવર કરતા શ્રમિકો, ખેડૂતો અને પશુપાલકોમાં ચિંતા વધી છે. ગ્રામજનોનું કહેવું છે કે છેલ્લા કેટલાક સમયથી સિંહોની અવરજવર ગામની સીમ અને માનવ વસાહતોની નજીક વધી રહી છે, જેના કારણે લોકોની સુરક્ષા અંગે પ્રશ્નો ઉભા થયા છે.
સ્થાનિક લોકો દ્વારા વનવિભાગને અસરકારક પગલાં લેવા અને સંભવિત જોખમ ઉભું કરનારા સિંહને કાબૂમાં લેવા માંગ કરવામાં આવી રહી છે. વનવિભાગે પણ વિસ્તારમાં સતત પેટ્રોલિંગ, ટ્રેકિંગ અને મોનિટરિંગ શરૂ કર્યું હોવાનું જાણવા મળે છે.
અમદાવાદની 12 શાળાઓમાં બંધ થઈ શકે છે 17 વર્ગો!: DEOએ બોલાવી તાત્કાલિક સુનાવણી, જાણો તમારા વિસ્તારની શાળા પણ સામેલ છે કે નહીં
માનવ-સિંહ સંઘર્ષ ફરી ચર્ચામાં
સૌરાષ્ટ્રમાં ગિર અને આસપાસના વિસ્તારોમાં સિંહોની વધતી વસતિ સાથે માનવ-વન્યજીવ સંઘર્ષનો મુદ્દો ફરી ચર્ચામાં આવ્યો છે. નિષ્ણાતોના જણાવ્યા મુજબ મોટાભાગના કિસ્સાઓમાં સિંહ માનવોથી દૂર રહેવાનું પસંદ કરે છે, પરંતુ રહેણાંક અને ઔદ્યોગિક વિસ્તારોની નજીક તેમની અવરજવર વધતા જોખમ પણ વધી રહ્યા છે.
કોવાયા નજીક બનેલી આ ઘટના માત્ર એક દુર્ઘટના નથી, પરંતુ માનવ અને વન્યજીવ વચ્ચે વધતી નજીકતાના પડકારો તરફ પણ સંકેત કરે છે. હાલ સમગ્ર વિસ્તારની નજર વનવિભાગની કાર્યવાહી પર છે અને હુમલામાં સંડોવાયેલા સિંહ અંગે વધુ વિગતો બહાર આવે તેની રાહ જોવામાં આવી રહી છે.
