વડાપ્રધાન નરેન્દ્ર મોદીના નિવાસસ્થાન બહાર કોંગ્રેસ દ્વારા કરવામાં આવેલા વિરોધ પ્રદર્શનના પડઘા હવે ગુજરાતમાં પણ જોવા મળ્યા છે. અમદાવાદના પાલડી સ્થિત કોંગ્રેસના પ્રદેશ મુખ્યાલય રાજીવ ગાંધી ભવન ખાતે ગુજરાત ભાજપે ધરણા પ્રદર્શન યોજીને કોંગ્રેસ સામે વિરોધ નોંધાવ્યો હતો. આ દરમિયાન ભાજપ પ્રદેશ પ્રમુખ જગદીશ વિશ્વકર્માએ કોંગ્રેસ અને લોકસભામાં વિપક્ષના નેતા રાહુલ ગાંધી પર આકરા પ્રહારો કરતાં વારંવાર "રાહુલ બાબા, શરમ કરો... શરમ કરો..." ના નારા લગાવ્યા હતા.
ભાજપના આ કાર્યક્રમમાં પ્રદેશના આગેવાનો, પદાધિકારીઓ અને મોટી સંખ્યામાં કાર્યકરો ઉપસ્થિત રહ્યા હતા. રાજીવ ગાંધી ભવન ખાતે યોજાયેલા કાર્યક્રમ દરમિયાન પોલીસ દ્વારા ચુસ્ત સુરક્ષા વ્યવસ્થા ગોઠવવામાં આવી હતી, કારણ કે સવારે કોંગ્રેસના વિરોધ પ્રદર્શન દરમિયાન પોલીસ અને કાર્યકરો વચ્ચે ઘર્ષણની ઘટના પણ બની હતી.
'કોંગ્રેસ યુવાનોને ગેરમાર્ગે દોરી રહી છે'
ધરણા દરમિયાન સંબોધન કરતાં જગદીશ વિશ્વકર્માએ આરોપ લગાવ્યો કે કોંગ્રેસ દેશના યુવાનોને ભ્રમિત કરવાનો પ્રયાસ કરી રહી છે. તેમણે કહ્યું કે વડાપ્રધાન નરેન્દ્ર મોદીના નેતૃત્વમાં દેશ 'વિકસિત ભારત 2047'ના લક્ષ્ય તરફ આગળ વધી રહ્યો છે અને યુવાનો, ખેડૂતો, મહિલાઓ તથા ગરીબોના વિકાસ માટે સતત કામ થઈ રહ્યું છે.
તેમણે જણાવ્યું કે આવા સમયે કોંગ્રેસ દ્વારા વડાપ્રધાનના નિવાસસ્થાન બહાર કરવામાં આવેલું વિરોધ પ્રદર્શન માત્ર રાજકીય સ્ટંટ છે અને તેનો હેતુ દેશના યુવાનોમાં ગેરસમજ ફેલાવવાનો છે. વિશ્વકર્માએ દાવો કર્યો કે દેશના યુવાનો આવા પ્રયાસોને સફળ થવા નહીં દે.
રાહુલ ગાંધી પર સીધા પ્રહારો
જગદીશ વિશ્વકર્માએ પોતાના સંબોધનમાં રાહુલ ગાંધીનું નામ લઈને અનેક આક્ષેપો કર્યા હતા. તેમણે કહ્યું કે સંસદમાં ચર્ચા કરવાની તક હોવા છતાં કોંગ્રેસ રસ્તા પર ઉતરી વિરોધ કરી રહી છે. તેમણે કોંગ્રેસ પર સંવિધાનના અપમાનનો પણ આક્ષેપ કર્યો અને કહ્યું કે સંવિધાનની વાત કરનાર કોંગ્રેસ પોતે જ તેના મૂલ્યોનું પાલન કરતી નથી.
વિશ્વકર્માએ પોતાના ભાષણના અંતે વારંવાર "રાહુલ બાબા, શરમ કરો... શરમ કરો..." ના નારા લગાવતા કોંગ્રેસ પર દેશની શાંતિ ડહોળવાનો અને યુવાનોને ગેરમાર્ગે દોરવાનો પ્રયાસ કરવાનો આરોપ લગાવ્યો.
દિલ્હીના વિરોધના ગુજરાતમાં પડઘા
કોંગ્રેસ દ્વારા દિલ્હીમાં વડાપ્રધાનના નિવાસસ્થાન બહાર કરવામાં આવેલા વિરોધ પ્રદર્શન બાદ ગુજરાતમાં ભાજપે તેનો જવાબી વિરોધ નોંધાવ્યો છે. કોંગ્રેસનું કહેવું છે કે તેમનો વિરોધ NEET પરીક્ષામાં કથિત ગેરરીતિઓ અને કેન્દ્રીય શિક્ષણમંત્રી ધર્મેન્દ્ર પ્રધાનના રાજીનામાની માંગને લઈને હતો. બીજી તરફ ભાજપનું કહેવું છે કે કોંગ્રેસ આ મુદ્દે રાજકીય લાભ મેળવવાનો પ્રયાસ કરી રહી છે.
અમદાવાદમાં બંને પક્ષોના કાર્યક્રમોને ધ્યાનમાં રાખીને રાજીવ ગાંધી ભવન આસપાસ પોલીસનો લોખંડી બંદોબસ્ત ગોઠવવામાં આવ્યો હતો. ઉચ્ચ પોલીસ અધિકારીઓ પણ સ્થળ પર હાજર રહ્યા હતા જેથી કોઈ અનિચ્છનીય ઘટના ન બને.
રાજકીય ગરમાવો યથાવત
NEET મુદ્દે કોંગ્રેસ અને ભાજપ વચ્ચે આરોપ-પ્રત્યારોપનો દોર વધુ તેજ બન્યો છે. દિલ્હીમાં શરૂ થયેલો રાજકીય વિવાદ હવે ગુજરાત સુધી પહોંચ્યો છે અને આગામી દિવસોમાં પણ આ મુદ્દે બંને પક્ષો વચ્ચે રાજકીય ટકરાવ યથાવત રહેવાની શક્યતા છે.
