Ghatlodia liquor raid: ગુજરાતમાં દારૂબંધીના કડક કાયદા વચ્ચે ગેરકાયદેસર વિદેશી દારૂની હેરાફેરી અને વેચાણના પ્રયાસો સતત ચાલુ રહે છે. આવા જ એક પ્રયાસને અમદાવાદના ઘાટલોડીયા વિસ્તારમાં પ્રોહિબિશન બ્યુરો (PCB)ની ટીમે નિષ્ફળ બનાવ્યો છે. આ કાર્યવાહીમાં મોટા પ્રમાણમાં વિદેશી દારૂનો જથ્થો જપ્ત કરવામાં આવ્યો છે, સાથે જ બે આરોપીઓને પણ ઝડપી પાડવામાં આવ્યા છે. ઘાટલોડીયા પોલીસ સ્ટેશનની હદમાં આવતા વિરસાવરકર સ્પોર્ટ્સ કોમ્પ્લેક્સ સામેના અર્જુન આઇકોન રોડ પર આવેલા ઓશન કોલિના ફ્લેટ્સ તેમજ આદર્શ સોસાયટી પાસેના ફેલેસીયા એપાર્ટમેન્ટના બ્લોક B/901માંથી આ દરોડો પાડવામાં આવ્યો હતો. બાતમીના આધારે પહોંચેલી PCBની ટીમે અહીંથી ભારતીય બનાવટના વિદેશી દારૂની મોટી શીલબંધ બોટલો જપ્ત કરી હતી. કુલ 15 બોટલોનો જથ્થો મળી આવ્યો, જેમાંથી ૧૪ બોટલો મોટી કદની હતી. આ જથ્થાની કુલ કિંમત રૂ. 72,452 છે.
કુલ કિંમત રૂ.1,53,452નો મુદ્દામાલ જપ્ત
આ સિવાય પોલીસે એક જ્યુપીટર મોટરસાયકલ (કિંમત રૂ. 70,000) અને બે મોબાઇલ ફોન (કિંમત રૂ. 11,000) પણ કબજે કર્યા છે. કુલ મુદ્દામાલની કિંમત રૂ.1,53,452 થાય છે. આ વાહન અને મોબાઇલનો ઉપયોગ દારૂની હેરાફેરીમાં થતો હોવાનું પ્રાથમિક તપાસમાં સામે આવ્યું છે. આ કાર્યવાહીમાં ઝડપાયેલા બે આરોપીઓના નામ છે: પ્રથમ આરોપી પ્રતિક દીપકકુમાર વ્યાસ (ઉં.વ. 45), જેઓ ફેલેસીયા-02ના B/901 ફ્લેટમાં રહે છે, અને બીજા આરોપી વિપુલ ઉર્ફે ડોન પ્રવિણભાઈ શાહ (ઉં.વ. 48), જેઓ શાહપુર વિસ્તારના કપાળીદાસની પોળમાં રહે છે. બંને આરોપીઓ વિરુદ્ધ ઘાટલોડીયા પોલીસ સ્ટેશનમાં ગુજરાત પ્રોહિબિશન એક્ટ હેઠળ ગુનો નોંધી વધુ તપાસ હાથ ધરવામાં આવી છે.
બુટલેગરોમાં ભયનું વાતાવરણ
ગુજરાતમાં દારૂબંધીના કાયદાનું કડક અમલ કરવા માટે પોલીસ વિભાગ સતત સક્રિય છે. તાજેતરમાં જ અમદાવાદ અને આસપાસના વિસ્તારોમાં અનેક દરોડા પાડીને લાખો રૂપિયાનો દારૂ જપ્ત કરવામાં આવ્યો છે. આવી કાર્યવાહીઓથી બુટલેગરોમાં ભયનું વાતાવરણ છે, પરંતુ તસ્કરો નવા નવા રસ્તા અપનાવીને દારૂની હેરાફેરી કરવાના પ્રયાસો કરે છે. આ કેસમાં પણ આરોપીઓનું નેટવર્ક કેટલું મોટું છે તે જાણવા તપાસ ચાલુ છે. આવી ઘટનાઓ સમાજ માટે ચિંતાનો વિષય છે, કારણ કે ગેરકાયદેસર દારૂનું વેચાણ યુવા વર્ગને અસર કરે છે. પોલીસની આ સફળ કાર્યવાહીથી સ્થાનિક રહેવાસીઓમાં રાહતનો માહોલ છે.
