PM Modi Fuel Saving Initiative: મધ્ય-પૂર્વ એશિયામાં વધી રહેલા યુદ્ધના તણાવ અને કાચા તેલની આંતરરાષ્ટ્રીય કિંમતોમાં અસ્થિરતા વચ્ચે પ્રધાનમંત્રીનરેન્દ્ર મોદીએ દેશને ઉર્જા સંકટથી બચાવવા માટે એક ક્રાંતિકારી પહેલ કરી છે. પીએમ મોદીએ પોતે ઉદાહરણ પૂરું પાડતા પોતાની સુરક્ષામાં તૈનાત સ્પેશિયલ પ્રોટેક્શન ગ્રુપ (SPG) ને તેમના કાફલાની ગાડીઓની સંખ્યામાં 50 ટકાનો ઘટાડો કરવાનો નિર્દેશ આપ્યો છે. આ ઐતિહાસિક નિર્ણય પાછળનો મુખ્ય હેતુ સરકારી સ્તરે ઈંધણના વપરાશમાં કાપ મૂકીને વિદેશી મુદ્રા ભંડારને સુરક્ષિત રાખવાનો છે.
પ્રધાનમંત્રીના આ પગલાને કારણે હવે સમગ્ર દેશના સરકારી વિભાગોમાં દોડધામ મચી ગઈ છે. પીએમ મોદીએ સ્પષ્ટ સંદેશ આપ્યો છે કે માત્ર અપીલ કરવાથી નહીં, પણ પોતે અમલ કરીને દેશવાસીઓને નવી દિશા આપવી પડશે. આ આદેશ બાદ હવે વિવિધ મંત્રાલયો અને રાજ્ય સરકારો પણ પોતાના સ્તરે ઈંધણ અને સરકારી ખર્ચ ઘટાડવા માટે સક્રિય થઈ ગઈ છે.
પીએમ મોદીનો કાફલો અડધો થશે, EV પર વિશેષ ભાર
પ્રધાનમંત્રીના કાફલામાં હવે ગાડીઓની સંખ્યા મર્યાદિત કરવામાં આવશે, જેનો અમલ SPG એ સુરક્ષાની 'બ્લૂ બુક'ના નિયમોને આધીન રહીને શરૂ કરી દીધો છે. પીએમ મોદીએ તેમના કાફલામાં ઇલેક્ટ્રિક વાહનો (EV) ના ઉપયોગની પણ ઈચ્છા વ્યક્ત કરી છે. જોકે, સરકારી તિજોરી પર વધારાનો બોજ ન પડે તે માટે તેમણે સ્પષ્ટ સૂચના આપી છે કે આ માટે કોઈ નવી ગાડીઓની ખરીદી કરવામાં આવશે નહીં, પરંતુ ઉપલબ્ધ સંસાધનોનો જ મહત્તમ ઉપયોગ કરવામાં આવશે.
આ પણ વાંચો: NEET પેપર લીક કેમ થાય છે? JEE મેઈન કેમ સુરક્ષિત છે? : NEET અને JEE પરીક્ષા પદ્ધતિ વચ્ચેનો તફાવત જાણો
શા માટે લેવો પડ્યો આ નિર્ણય?
આ આકરા નિર્ણય પાછળ ભવિષ્યના આર્થિક જોખમો જવાબદાર છે:
યુદ્ધનો તણાવ: ઈરાન અને ઇઝરાયેલ વચ્ચેના તણાવને કારણે કાચા તેલના પુરવઠા પર અસર પડી છે.
વિદેશી મુદ્રા ભંડાર: તેલની આયાત પાછળ ખર્ચાતા અબજો ડોલરની બચત કરવી જરૂરી છે.
સુરક્ષાનો સંગ્રહ: જોકે દેશમાં 60 દિવસનો તેલ-ગેસનો સ્ટોક છે, છતાં લાંબાગાળાની સાવચેતી તરીકે આ પગલાં લેવાઈ રહ્યા છે.
ઉત્તર પ્રદેશથી ગુજરાત સુધી: રાજ્યોમાં બચતની ‘લહેર’
પીએમ મોદીની અપીલ બાદ ભાજપ શાસિત પાંચ રાજ્યોમાં કડક નિર્દેશો જારી કરવામાં આવ્યા છે:
ઉત્તર પ્રદેશ: મુખ્યમંત્રી યોગી આદિત્યનાથે મંત્રીઓના કાફલામાં 50% વાહનો ઘટાડવા અને અઠવાડિયામાં બે દિવસ 'વર્ક ફ્રોમ હોમ' ની સલાહ આપી છે.
રાજસ્થાન: સીએમ ભજનલાલ શર્માએ પોતાના કાફલામાંથી વધારાના વાહનો હટાવી અધિકારીઓને પબ્લિક ટ્રાન્સપોર્ટ વાપરવા જણાવ્યું છે.
મધ્ય પ્રદેશ: સીએમ મોહન યાદવે પોતાના કાફલાની ગાડીઓ 13 થી ઘટાડીને 8 કરી દીધી છે.
દિલ્હી: મુખ્યમંત્રી રેખા ગુપ્તાએ મંત્રીઓને કારપૂલિંગ અને મેટ્રોનો ઉપયોગ કરવાના આદેશ આપ્યા છે.
ગુજરાત: અહીં પીએમની મુહિમની સૌથી ગંભીર અસર દેખાઈ છે. ડેપ્યુટી સીએમ હર્ષ સંઘવીએ સરકારી ખર્ચ બચાવવા માટે પોતાનો પ્રસ્તાવિત અમેરિકા પ્રવાસ રદ કરીને એક નવી મિસાલ પેશ કરી છે.
સરકારી ઓફિસોના બદલાશે નિયમો
આગામી સમયમાં સરકારી કર્મચારીઓએ ઓફિસ જવા માટે મેટ્રો કે કારપૂલિંગનો સહારો લેવો પડશે. મંત્રાલયોમાં ખર્ચાળ ભોજન સમારંભો પર રોક લગાવવામાં આવશે અને ટ્રાફિક જામ ઘટાડવા માટે ઓફિસના સમયમાં ફેરફાર અથવા 'નો વ્હીકલ ડે' જેવા પ્રયોગો પણ હાથ ધરવામાં આવી શકે છે.
