Plane Crash in Mexico: મેક્સિકોમાં એક મોટી વિમાન દુર્ઘટના બની છે. એક પ્રાઇવેટ જેટ વિમાન ઇમરજન્સી લેન્ડિંગ કરતી વખતે એક ઇમારત સાથે અથડાયું. વિમાનમાં આગ લાગતાં જ તે તૂટીને બિલ્ડિંગ પર પડીગયું. આ અકસ્માતમાં સાત લોકોના મોત થયા છે, અને આશરે 130 લોકોને બચાવી લેવામાં આવ્યા છે. મેક્સિકો સ્ટેટ સિવિલ પ્રોટેક્શન કોઓર્ડિનેટર એડ્રિયન હર્નાન્ડેઝે ક્રેશની પુષ્ટિ કરી અને કહ્યું કે વિમાનમાં આઠ મુસાફરો અને બે ક્રૂ સભ્યો હતા.
ફૂટબોલ મેદાન પર કરાવવાનું હતું લેન્ડિંગ
સાન માટેઓ એટેન્કોના મેયર એના મુનિઝે જણાવ્યું હતું કે પ્રાઇવેટ જેટ બળીને રાખ થઈ ગયું હતું અને સાત મૃતદેહો મળી આવ્યા હતા. પ્રાઇવેટ જેટે મેક્સિકોના પેસિફિક કિનારાના શહેર અકાપુલ્કોથી ઉડાન ભરી હતી અને રાજધાની મેક્સિકો સિટીથી લગભગ 50 કિલોમીટર પશ્ચિમમાં ટોલુકા એરપોર્ટ પર ઉતરવાનું હતું. જોકે, ઇમરજન્સી લેન્ડિંગને કારણે તેને એરપોર્ટથી પાંચ કિલોમીટર પહેલા ફૂટબોલ મેદાન પર ઉતરવું પડ્યું. જોકે, જેટ એક બિલ્ડિંગની છત સાથે અથડાયું હતું.
ટક્કરથી પડી ગયું અને આગ લાગી ગઈ
પ્રારંભિક તપાસમાં જાણવા મળ્યું છે કે વિમાને ઇમરજન્સી લેન્ડિંગ દરમિયાન સંતુલન ગુમાવ્યું હતું અને એક ઇમારત સાથે અથડાયું હતું. આ અકસ્માત ઔદ્યોગિક વિસ્તારમાં થયો હતો, અને ઇમારતની છત ધાતુની હતી, જેની સાથે તે અથડાયું હતું. અથડાતાં જ વિમાનમાં આગ લાગી ગઈ, પરંતુ સદનસીબે, અંદર કોઈ લોકો નહોતા. નજીકના રહેવાસીઓએ અકસ્માત અંગે પોલીસને જાણ કરી. પોલીસ ઘટનાસ્થળે પહોંચી, પરિસ્થિતિને કાબુમાં લેવામાં સફળ રહી, લગભગ 130 લોકોને બચાવ્યા. ફાયર બ્રિગેડે આગ પર કાબુ મેળવ્યો.
અકસ્માતની તપાસના આદેશો જારી
ઘાયલોને એમ્બ્યુલન્સ દ્વારા હોસ્પિટલ લઈ જવામાં આવ્યા હતા. મૃતકોની હજુ સુધી ઓળખ થઈ નથી, અને અકસ્માતની તપાસ શરૂ કરવામાં આવી છે. પ્રાઇવેટ જેટને ઇમરજન્સી લેન્ડિંગ શા માટે કરવાની જરૂર પડી તે નક્કી કરવા માટે તપાસ ચાલી રહી છે.
