સોશિયલ મીડિયા પર દરરોજ અનેક દાવાઓ વાયરલ થતા હોય છે, પરંતુ તેમાંના બધા જ સાચા હોય એવું જરૂરી નથી. હાલમાં પ્રધાનમંત્રી નરેન્દ્ર મોદી દર રવિવારે રાત્રે 8 વાગ્યે પોતાના Instagram એકાઉન્ટ પરથી LIVE આવીને દેશના યુવાનો સાથે સીધી વાતચીત કરશે એવો દાવો ઝડપથી વાયરલ થઈ રહ્યો છે. લાખો લોકો આ પોસ્ટ શેર કરી રહ્યા છે, પરંતુ હવે પ્રેસ ઇન્ફોર્મેશન બ્યુરો (PIB)ની ફેક્ટ ચેક ટીમે આ સમગ્ર દાવા અંગે સત્ય સ્પષ્ટ કર્યું છે.
શું છે વાયરલ દાવો?
તાજેતરમાં Instagram સહિત અન્ય સોશિયલ મીડિયા પ્લેટફોર્મ્સ પર એક પોસ્ટ ઝડપથી વાયરલ થઈ રહી છે. તેમાં દાવો કરવામાં આવ્યો છે કે પ્રધાનમંત્રી નરેન્દ્ર મોદી હવે દર રવિવારે રાત્રે 8 વાગ્યે પોતાના સત્તાવાર Instagram હેન્ડલ પરથી LIVE આવીને દેશના યુવાનો સાથે સીધી વાતચીત કરશે. પોસ્ટમાં એવો પણ સંદેશ આપવામાં આવ્યો છે કે આ પહેલનો હેતુ યુવાનો સાથે સીધો સંવાદ સ્થાપિત કરવાનો છે. પોસ્ટ વાયરલ થતાં ઘણા લોકોએ તેને સાચી માનીને શેર કરવાનું શરૂ કર્યું હતું.
PIB Fact Checkએ કર્યો મોટો ખુલાસો
વાયરલ દાવાની સત્યતા તપાસ્યા બાદ પ્રેસ ઇન્ફોર્મેશન બ્યુરો (PIB)ની ફેક્ટ ચેક યુનિટે આ દાવાને સંપૂર્ણપણે ખોટો અને ભ્રામક ગણાવ્યો છે. PIBએ સ્પષ્ટ કર્યું છે કે પ્રધાનમંત્રી નરેન્દ્ર મોદી અથવા કેન્દ્ર સરકાર દ્વારા આવી કોઈ જાહેરાત કરવામાં આવી નથી. એટલે કે PM મોદી દર રવિવારે Instagram પર LIVE આવશે એવો દાવો સંપૂર્ણપણે બનાવટી છે અને તેનો કોઈ સત્તાવાર આધાર નથી.
PIBએ લોકોને સોશિયલ મીડિયા પર ફરતી આવી અફવાઓથી સાવચેત રહેવા અને કોઈપણ માહિતી શેર કરતા પહેલાં તેની સત્યતા ચકાસવાની અપીલ પણ કરી છે.
આવી ખોટી માહિતી કેમ વાયરલ થાય છે?
ડિજિટલ યુગમાં સોશિયલ મીડિયા પર વધુ વ્યૂઝ, લાઇક્સ અને એન્ગેજમેન્ટ મેળવવા માટે ઘણીવાર જાણીતા નેતાઓ, સરકારી યોજનાઓ અથવા મહત્વપૂર્ણ જાહેરાતોના નામે ખોટા દાવાઓ તૈયાર કરવામાં આવે છે. પ્રધાનમંત્રી નરેન્દ્ર મોદી દેશવાસીઓ સાથે 'મન કી બાત' જેવા કાર્યક્રમો દ્વારા નિયમિત સંવાદ કરે છે, પરંતુ દર રવિવારે Instagram LIVE આવવાની કોઈ સત્તાવાર યોજના જાહેર કરવામાં આવી નથી.
નિષ્ણાતોના મતે, આવી પોસ્ટનો હેતુ લોકોને ગેરમાર્ગે દોરવાનો અને સોશિયલ મીડિયા પર ઝડપથી વાયરલ થવાનો હોય છે. તેથી કોઈપણ વાયરલ પોસ્ટને આંખ મીંચીને સાચી માનવી યોગ્ય નથી.
ખોટા સમાચારથી કેવી રીતે બચશો?
PIBએ નાગરિકોને સલાહ આપી છે કે કેન્દ્ર સરકાર અથવા પ્રધાનમંત્રીને લગતી કોઈપણ મહત્વપૂર્ણ માહિતી માટે માત્ર સત્તાવાર સરકારી વેબસાઇટ, PIBના સત્તાવાર સોશિયલ મીડિયા હેન્ડલ્સ અને પ્રધાનમંત્રી કાર્યાલયના અધિકૃત પ્લેટફોર્મ પર જ વિશ્વાસ કરવો જોઈએ.
જો સોશિયલ મીડિયા પર સરકાર અથવા કેન્દ્ર સરકાર સંબંધિત કોઈ શંકાસ્પદ મેસેજ, પોસ્ટ અથવા વીડિયો મળે તો તેની સત્યતા ચકાસવા માટે તેને PIB Fact Checkને મોકલી શકાય છે. લોકો WhatsApp નંબર +91 8799711259 અથવા ઈ-મેલ [email protected] પર માહિતી મોકલીને તેની ચકાસણી કરાવી શકે છે.
