દેશની રાજધાની દિલ્હીમાં વાયુ પ્રદૂષણ (Air Pollution)ની સ્થિતિ અત્યંત ગંભીર બની છે, જેનો પડઘો હવે સંસદમાં પણ પડ્યો છે. બુધવારે (3 ડિસેમ્બર) સંસદના શિયાળુ સત્ર (Winter Session)ના ત્રીજા દિવસે એક અલગ જ દ્રશ્ય જોવા મળ્યું હતું. પ્રદૂષણની ગંભીરતા દર્શાવવા માટે વિપક્ષી સાંસદો ચહેરા પર ગેસ માસ્ક (Gas Masks) પહેરીને સંસદ ભવનમાં પ્રવેશ્યા હતા.
"માસ્ક વગર શ્વાસ લેવો મુશ્કેલ"
સાંસદોની માંગ હતી કે શિયાળુ સત્ર દરમિયાન આ ગંભીર કટોકટી પર તાત્કાલિક ચર્ચા થવી જોઈએ. કોંગ્રેસના વરિષ્ઠ નેતા અને સાંસદ દીપેન્દ્ર સિંહ હુડ્ડા (Deepender Singh Hooda) એ આકરા શબ્દોમાં કહ્યું હતું કે, "પ્રદૂષણ હવે જીવલેણ બની ગયું છે અને આ માસ્ક વગર શ્વાસ લેવો મુશ્કેલ છે. કેન્દ્ર સરકારે અન્ય રાજ્યો અને વિપક્ષ પર દોષારોપણ કરવાનું બંધ કરવું જોઈએ અને તાત્કાલિક એક્શન લેવા જોઈએ." હુડ્ડાએ આ મુદ્દે ચર્ચા કરવા માટે સંસદમાં 'સસ્પેન્શન ઓફ બિઝનેસ' નોટિસ પણ આપી હતી.
PM મોદીને અપીલ: CMનું ગ્રુપ બનાવો
દીપેન્દ્ર હુડ્ડાએ વડાપ્રધાન નરેન્દ્ર મોદીને અપીલ કરતા એક મહત્વનું સૂચન કર્યું છે.
સૂચન: હરિયાણા, પંજાબ, ઉત્તર પ્રદેશ, દિલ્હી અને રાજસ્થાનના મુખ્યમંત્રીઓનું એક વિશેષ જૂથ બનાવવામાં આવે.
ઉદ્દેશ્ય: આ જૂથ બજેટની ફાળવણી સાથે એક 'ડિટેલ્ડ પ્લાન' તૈયાર કરે જેથી દિલ્હી-NCR વિસ્તારમાં લાખો લોકોને અસર કરતા પ્રદૂષણ સામે લડી શકાય.
દિલ્હી ગેસ ચેમ્બર બન્યું: AQI ડેટા સેન્ટ્રલ પોલ્યુશન કંટ્રોલ બોર્ડ (CPCB) ના ડેટા મુજબ બુધવારે સવારે સ્થિતિ ચિંતાજનક હતી:
સરેરાશ AQI: સવારે 7:00 વાગ્યે AQI 376 (ખૂબ ખરાબ શ્રેણી) નોંધાયો હતો.
ઇન્ડિયા ગેટ: આ વિસ્તાર ઝેરી સ્મોગની ચાદરથી ઢંકાયેલો હતો અને AQI 356 હતો.
અક્ષરધામ: અહીં સ્થિતિ સૌથી ગંભીર હતી. AQI 405 સુધી પહોંચી ગયો હતો, જે 'ગંભીર' (Severe) શ્રેણીમાં આવે છે.
