પાકિસ્તાનના માહિતી મંત્રી અત્તાઉલ્લાહ તરારે શનિવારે એક વિવાદાસ્પદ દાવો કર્યો કે ભારતીય એજન્સીઓ માટે જાસૂસીના આરોપમાં એક પાકિસ્તાની માછીમારની ધરપકડ કરવામાં આવી છે. મંત્રીના જણાવ્યા અનુસાર, ઇજાઝ મલ્લાહ નામના આ માછીમારને સપ્ટેમ્બર મહિનામાં દરિયાઈ વિસ્તારમાં માછીમારી કરતી વખતે ભારતીય કોસ્ટ ગાર્ડે પકડી પાડ્યો હતો.
તરારના દાવા મુજબ, કોસ્ટ ગાર્ડ અધિકારીઓએ મલ્લાહને જાસૂસી માટે તૈયાર થવા માટે વળતરની લાલચ આપી હતી, અને જો તે ઈનકાર કરે તો તેને જેલમાં મૂકવાની ધમકી પણ આપી હતી. બાદમાં, કહેવામાં આવે છે કે તેને છોડીને પાકિસ્તાન પરત મોકલી દેવામાં આવ્યો હતો.
મંત્રીના જણાવ્યા મુજબ, મલ્લાહ પાકિસ્તાન પહોંચ્યા બાદ લશ્કરી ગણવેશ અને અન્ય સાધનો ખરીદવાનો પ્રયાસ કરી રહ્યો હતો. આ હરકતથી તે પાકિસ્તાની ગુપ્તચર એજન્સીઓના રડાર પર આવી ગયો. તરારે દાવો કર્યો કે એજન્સીઓએ જ્યારે તેને ભારતીય સરહદ તરફ જતાં જોયો, ત્યારે દરિયામાં જ તેને પકડી લીધો.
હાલ, પાકિસ્તાન સરકારના આ દાવા અંગે ભારતીય પક્ષ તરફથી કોઈ સત્તાવાર પ્રતિસાદ આપવામાં આવ્યો નથી.
