SCB Fire Tragedy: ઓડિશાના કટકમાં આવેલા પ્રખ્યાત SCB મેડિકલ કોલેજ અને હોસ્પિટલના ટ્રોમા કેર વિભાગના ICUમાં વહેલી સવારે ભયાનક આગ લાગી હતી. આ દુર્ઘટનામાં કુલ 10 દર્દીઓના મોત થયા છે, જ્યારે અનેક દર્દીઓ અને 11 હોસ્પિટલ સ્ટાફને ઈજા પહોંચી છે. આગનું કારણ શોર્ટ સર્કિટ હોવાનું પ્રાથમિક અનુમાન છે.
ICUમાં આગ લાગતાં જ હોસ્પિટલમાં ગભરાટ ફેલાઈ ગઈ
આ ઘટના સોમવારે (16 માર્ચ 2026) સવારે આશરે 2:30થી 3:00 વાગ્યાની વચ્ચે બની હતી. ટ્રોમા કેર ICUમાં આગ લાગતાં જ હોસ્પિટલમાં ગભરાટ ફેલાઈ ગઈ હતી. ફાયર બ્રિગેડની ત્રણ એન્જિનો તાત્કાલિક ઘટનાસ્થળે પહોંચી અને આગને કાબુમાં લીધી હતી. ICUમાં વેન્ટિલેટર પર હતા તેવા ઘણા ગંભીર દર્દીઓને બચાવવાના પ્રયાસ દરમિયાન ધુમાડાથી શ્વાસ બંધ થવાથી 7 દર્દીઓના મોત ICUમાં જ થયા, જ્યારે 3 અન્યને અન્ય વોર્ડમાં ખસેડતી વખતે મોત થયા.
મુખ્યમંત્રી મોહન ચરણ માઝી તાત્કાલિક ઘટનાસ્થળે પહોંચ્યા
ઓડિશાના મુખ્યમંત્રી મોહન ચરણ માઝી તાત્કાલિક ઘટનાસ્થળે પહોંચ્યા અને પરિસ્થિતિનું નિરીક્ષણ કર્યું. તેમણે મૃતકોના પરિવારોને મળીને આશ્વાસન આપ્યું અને જાહેરાત કરી કે દરેક મૃતકના પરિવારને મુખ્યમંત્રી રાહત ભંડોળ (CMRF)માંથી ₹25 લાખનું એક્સ-ગ્રેશિયા વળતર આપવામાં આવશે. ઈજાગ્રસ્ત દર્દીઓને શ્રેષ્ઠ સારવાર આપવામાં આવશે. ઘટનાની તપાસ માટે જ્યુડિશિયલ તપાસના આદેશ આપ્યા છે અને દોષી જણાય તો કડક કાર્યવાહી કરવામાં આવશે.
5 દર્દીઓની હાલત હજુ ગંભીર
હોસ્પિટલના અધિકારીઓએ જણાવ્યું કે બાકીના દર્દીઓને તાત્કાલિક અન્ય ICU અને વોર્ડમાં સુરક્ષિત રીતે ખસેડવામાં આવ્યા છે. 5 દર્દીઓની હાલત હજુ ગંભીર છે.આ ઘટનાએ હોસ્પિટલની ફાયર સેફ્ટી વ્યવસ્થા અને જાળવણી પર ગંભીર પ્રશ્નો ઉભા કર્યા છે.
