નોઈડાની હાઈરાઈઝ સોસાયટીમાં ભયાનક આગ: 12માં માળે ફ્લેટ સળગીને ખાખ
દિલ્હી-NCR (નેશનલ કેપિટલ રીજન) માં આગ લાગવાની ઘટનાઓ સતત વધી રહી છે. દિલ્હીના માલવીય નગરમાં થયેલી આગની દુર્ઘટનાના ગણતરીના દિવસો બાદ, શુક્રવારે વહેલી સવારે ઉત્તર પ્રદેશના નોઈડા સેક્ટર 74 (સેક્ટર 113 પોલીસ સ્ટેશન વિસ્તાર) માં આવેલી પ્રખ્યાત IVY કાઉન્ટી (IVY County) સોસાયટીમાં ભીષણ આગ લાગવાની ઘટના સામે આવી છે.
આ સોસાયટીના એક ટાવરમાં વહેલી સવારે લગભગ 8:00 વાગ્યે અચાનક આગ ફાટી નીકળી હતી. આગની લપેટ એટલી ભયાનક હતી કે બિલ્ડિંગમાંથી કાળા ધુમાડાના ગોટેગોટા ઉડતા જોઈ આસપાસની અન્ય સોસાયટીના લોકોમાં પણ ભારે ગભરાટ ફેલાઈ ગયો હતો.
12માં માળના ફ્લેટમાંથી શરૂ થઈ આગ
પ્રાપ્ત માહિતી અનુસાર, 28 માળની આ ગગનચુંબી ઇમારતમાં આગ 12માં માળ (12th floor) પર આવેલા એક ફ્લેટમાં લાગી હતી. જોતજોતામાં આગે વિકરાળ સ્વરૂપ ધારણ કરી લીધું હતું, જેના કારણે ઉપરના અને આસપાસના અન્ય કેટલાક ફ્લેટ પણ આગની ઝપેટમાં આવી ગયા હતા અને કાળા પડી ગયા હતા. સદનસીબે, સુરક્ષા કર્મચારીઓ અને ફાયર બ્રિગેડની સતર્કતાને કારણે બિલ્ડિંગમાં હાજર તમામ પરિવારોને તાત્કાલિક સીડીઓ અને ઇમરજન્સી એક્ઝિટ દ્વારા સુરક્ષિત બહાર કાઢી લેવામાં આવ્યા હતા, જેથી કોઈ જાનહાનિના અહેવાલ નથી.
હાઇડ્રોલિક ક્રેન દ્વારા આગ પર મેળવાયો કાબૂ
ઘટનાની જાણ થતાં જ ફાયર વિભાગની ટીમ અને સ્થાનિક પોલીસ ઘટનાસ્થળે દોડી ગઈ હતી. ટાવર ઉંચો હોવાના કારણે ફાયર બ્રિગેડના જવાનોએ હાઇડ્રોલિક ક્રેનની મદદથી ઉપરના માળ સુધી પાણીનો મારો ચલાવ્યો હતો. લાંબી જહેમત બાદ આગ પર સંપૂર્ણ કાબૂ મેળવી શકાયો હતો. પ્રાથમિક તપાસમાં આગ લાગવાનું કારણ શોર્ટ સર્કિટ હોવાનું માનવામાં આવી રહ્યું છે, જો કે સત્તાવાર તપાસ હજુ ચાલુ છે.
સેક્ટર 52 માં પણ આગની ઘટના
આ જ દિવસે નોઈડાના સેક્ટર 52 માં આવેલી શતાબ્દી વિહાર (E3 વિહાર) ની એક બિલ્ડિંગમાં ચાલતા PG (પેઇંગ ગેસ્ટ) માં પણ આગ લાગી હોવાના સમાચાર સામે આવ્યા છે. દિલ્હી-NCRમાં સતત વધી રહેલી આગની આ ઘટનાઓને કારણે બહુમાળી ઇમારતોમાં ફાયર સેફ્ટીની વ્યવસ્થાઓ સામે ફરી એકવાર ગંભીર સવાલો ઊભા થયા છે.
