Israel Iran War: ઈઝરાયલે લેબનોન પર તીવ્ર હુમલા શરૂ કર્યા છે, જેમાં હિઝબુલ્લાહના મુખ્ય ઠેકાણાઓને નિશાન બનાવવામાં આવ્યા છે. આ હુમલા હિઝબુલ્લાહ દ્વારા ઈઝરાયલ પર કરાયેલા રોકેટ અને ડ્રોન હુમલાના જવાબમાં કરવામાં આવ્યા છે. હિઝબુલ્લાહે દાવો કર્યો છે કે તેમનો હુમલો ઈરાનના સર્વોચ્ચ નેતા આયાતુલ્લાહ અલી ખામેનીની હત્યાના બદલામાં અને લેબનોન તથા તેના લોકોના રક્ષણ માટે કરવામાં આવ્યો છે. ખામેનીની હત્યા અમેરિકા અને ઈઝરાયલના સંયુક્ત હુમલામાં થઈ છે, જેમાં ઈરાનના અનેક ટોચના લશ્કરી નેતાઓ પણ માર્યા ગયા છે. ઈરાનમાં 40 દિવસનો શોક શરૂ કરવામાં આવ્યો છે.
2024ના યુદ્ધ પછીના સૌથી તીવ્ર હુમલા
ઈઝરાયલી સેના (IDF)એ પુષ્ટિ કરી છે કે તેઓ લેબનોનમાં હિઝબુલ્લાહના ઠેકાણાઓ પર હુમલા કરી રહ્યા છે, જેમાં બેઈરુતના દક્ષિણી ઉપનગરો (હિઝબુલ્લાહનું મજબૂત ગઢ) પર ભારે વિસ્ફોટો થયા છે. આ હુમલા 2024ના યુદ્ધ પછીના સૌથી તીવ્ર હુમલા તરીકે જોવામાં આવી રહ્યા છે.
અમેરિકી સૈનિકોના મોત
અમેરિકાના રાષ્ટ્રપતિ ડોનાલ્ડ ટ્રમ્પે જણાવ્યું છે કે ઈરાન વિરુદ્ધના હુમલા (ઓપરેશન એપિક ફ્યુરી) ત્યાં સુધી ચાલુ રહેશે જ્યાં સુધી તમામ ઉદ્દેશ્યો પૂરા ન થાય – ઈરાનના પરમાણુ કાર્યક્રમનો નાશ, બેલિસ્ટિક મિસાઈલ ક્ષમતાનો અંત અને IRGCના બાકી નેતાઓને ખતમ કરવા. ટ્રમ્પે કહ્યું કે ઈરાનની લશ્કરી કમાન્ડ મોટે ભાગે નાશ પામી છે અને બાકીના શરણાગતિ સ્વીકારવા તૈયાર છે. તેમણે એમ પણ કહ્યું કે આ દરમિયાન વધુ અમેરિકી સૈનિકોના મોત થઈ શકે છે.આ પરિસ્થિતિમાં મધ્ય પૂર્વમાં તણાવ વધુ વધી ગયો છે, અને હિઝબુલ્લાહની ભાગીદારીથી યુદ્ધ વધુ વ્યાપક બનવાની શક્યતા છે. ઈઝરાયલે લેબનોનના 50થી વધુ ગામડાઓને ખાલી કરવાની સૂચના આપી છે.
