સિંગાપુરના નેશનલ ક્રિકેટ ગ્રાઉન્ડ પર રમાયેલી 2026 એશિયન ગેમ્સ મેન્સ ટી20 ઈન્ટરનેશનલ ક્વોલિફાયર મેચમાં નેપાળે એવો ધમાકેદાર દેખાવ કર્યો કે સમગ્ર ક્રિકેટ જગત આશ્ચર્યચકિત થઈ ગયું. ચીન સામે રમાયેલી આ મેચમાં નેપાળે માત્ર 20 ઓવરમાં 2 વિકેટે 313 રનનો વિશાળ સ્કોર ઉભો કરીને ટી20 આંતરરાષ્ટ્રીય ક્રિકેટના ઇતિહાસમાં પોતાનું નામ સુવર્ણ અક્ષરે લખાવી દીધું. આ મુકાબલો માત્ર એક જીત સુધી મર્યાદિત રહ્યો નહોતો, પરંતુ રન, છગ્ગા અને અનેક ઐતિહાસિક રેકોર્ડ્સનો સાક્ષી બન્યો હતો. ખાસ કરીને કુશલ ભુર્તેલની વિસ્ફોટક બેટિંગે ચીનના બોલરોને સંપૂર્ણપણે બેકફૂટ પર ધકેલી દીધા હતા.
શરૂઆતમાં ઝટકો, પછી આવ્યું રનનું વાવાઝોડું
નેપાળની શરૂઆત અપેક્ષા મુજબ રહી નહોતી. ટીમે ચોથી ઓવરમાં ઓપનર આસિફ શેખની વિકેટ ગુમાવી હતી. આસિફ માત્ર 11 રન બનાવી પેવેલિયન પરત ફરતા ચીનને કદાચ મેચમાં વાપસીની આશા જાગી હશે. પરંતુ ત્યારબાદ જે બન્યું તે આંતરરાષ્ટ્રીય ક્રિકેટના ઇતિહાસમાં યાદગાર બની ગયું. આસિફના આઉટ થયા બાદ ક્રીઝ પર આવેલા કુશલ ભુર્તેલે ચીની બોલરો પર એવો હુમલો બોલાવ્યો કે મેદાનના દરેક ખૂણે ચોગ્ગા અને છગ્ગાનો વરસાદ શરૂ થઈ ગયો.
43 બોલમાં 129 રનની તોફાની ઈનિંગ
કુશલ ભુર્તેલે માત્ર 43 બોલમાં 129 રનની વિસ્ફોટક ઇનિંગ રમી હતી. તેની ઇનિંગમાં 5 ચોગ્ગા અને આશ્ચર્યજનક 16 છગ્ગાનો સમાવેશ થતો હતો. ભુર્તેલે શરૂઆતથી જ આક્રમક અભિગમ અપનાવ્યો હતો અને ચીનના કોઈ પણ બોલરને છોડ્યો નહોતો. તેણે મેદાનના દરેક ખૂણે ફટકાબાજી કરીને માત્ર પોતાની સદી જ પૂર્ણ કરી નહોતી, પરંતુ અનેક રેકોર્ડ્સ પણ પોતાના નામે કર્યા હતા.
આ પણ વાંચો: ગિલ-સૂર્યા OUT, 15 વર્ષનો વૈભવ IN! : એશિયન ગેમ્સ માટે BCCIની યાદીએ મચાવી સનસનાટી
એક ઓવરમાં 6 છગ્ગા, રચ્યો વિશ્વવિક્રમ
મેચની સૌથી યાદગાર ક્ષણ ત્યારે આવી જ્યારે ચીનના બોલર ચેન જુઓ યૂ બોલિંગ કરવા આવ્યા. આ ઓવરમાં કુશલ ભુર્તેલે પ્રથમ પાંચ બોલ પર સતત પાંચ છગ્ગા ફટકાર્યા હતા. છઠ્ઠો બોલ બોલરે દબાણમાં આવીને વાઇડ ફેંક્યો હતો. ત્યારબાદ ફેંકાયેલા કાયદેસર છઠ્ઠા બોલને પણ ભુર્તેલે બાઉન્ડ્રી પાર પહોંચાડીને એક જ ઓવરમાં 6 છગ્ગા ફટકારવાનો કારનામો કર્યો હતો. આ ઓવરમાં કુલ 37 રન આવ્યા હતા, જે આંતરરાષ્ટ્રીય ક્રિકેટના સૌથી મોંઘા ઓવરોમાંની એક તરીકે નોંધાયો છે. સાથે જ ભુર્તેલ મેન્સ ટી20 ઇન્ટરનેશનલ ક્રિકેટમાં સતત 6 છગ્ગા ફટકારનાર વિશ્વનો પ્રથમ બેટ્સમેન બન્યો હતો.
કુશલ મલ્લા અને રોહિત પૌડેલે પણ મચાવ્યો ધમાલ
ભુર્તેલની વિસ્ફોટક ઇનિંગ બાદ પણ ચીનની મુશ્કેલીઓ ઓછી થઈ નહોતી. મિડલ ઓર્ડરમાં કુશલ મલ્લા અને કેપ્ટન રોહિત પૌડેલે પણ જોરદાર બેટિંગ કરી હતી. કુશલ મલ્લાએ 47 બોલમાં અણનમ 85 રન ફટકાર્યા હતા, જેમાં 8 ચોગ્ગા અને 5 છગ્ગાનો સમાવેશ થતો હતો. બીજી તરફ કેપ્ટન રોહિત પૌડેલે માત્ર 21 બોલમાં અણનમ 69 રન બનાવ્યા હતા. તેની ઇનિંગમાં 5 ચોગ્ગા અને 7 ગગનચુંબી છગ્ગા સામેલ હતા. આ બંને બેટ્સમેનની આક્રમક બેટિંગના કારણે નેપાળ 313 રનના ઐતિહાસિક સ્કોર સુધી પહોંચી શક્યું હતું.
આ પણ વાંચો: IPL ફાઈનલ પહેલાં નરેન્દ્ર મોદી સ્ટેડિયમમાં સુરક્ષા સજ્જ : 3000 પોલીસ કર્મચારીઓ રહેશે તૈનાત
ઈન્ટરનેશનલ ક્રિકેટમાં 6 છગ્ગા ફટકારનાર ખેલાડીઓની યાદીમાં ભુર્તેલ
આંતરરાષ્ટ્રીય ક્રિકેટના ઇતિહાસમાં એક ઓવરમાં 6 છગ્ગા ફટકારવાની સિદ્ધિ અત્યંત દુર્લભ માનવામાં આવે છે. અત્યાર સુધી ODI અને T20I ક્રિકેટમાં માત્ર ગણતરીના ખેલાડીઓ જ આ કારનામું કરી શક્યા છે. દક્ષિણ આફ્રિકાના હર્ષલ ગિબ્સે 2007ના વર્લ્ડ કપમાં નેધરલેન્ડ્સ સામે પ્રથમ વખત આ રેકોર્ડ બનાવ્યો હતો. ત્યારબાદ અમેરિકાના જસકરન મલ્હોત્રાએ 2021માં PNG સામે ODIમાં એક ઓવરમાં 6 છગ્ગા ફટકાર્યા હતા. સમોઆના ડેરિયસ વિસરે પણ 2024માં આ સિદ્ધિ મેળવી હતી. જોકે તેની ઓવરમાં નોબોલ્સનો સમાવેશ થતો હોવાથી કુલ 39 રન આવ્યા હતા, જે મેન્સ T20 ઇન્ટરનેશનલમાં સૌથી મોંઘી ઓવર ગણાય છે. નેપાળના દીપેન્દ્ર સિંહ એરી પણ બે વખત સતત 6 છગ્ગા ફટકારવાનો રેકોર્ડ ધરાવે છે. હવે કુશલ ભુર્તેલનું નામ પણ આ વિશિષ્ટ યાદીમાં ગૌરવપૂર્વક જોડાઈ ગયું છે.
આ પણ વાંચો: IPL ફાઇનલમાં મેધરાજા મોટો ટ્વિસ્ટ લાવશે! : GT-RCB મેચ પહેલા અંબાલાલ પટેલની આગાહીએ વધારી ચિંતા
નેપાળ ક્રિકેટની વધતી તાકાતનો પુરાવો
છેલ્લા કેટલાક વર્ષોમાં નેપાળ ક્રિકેટે આંતરરાષ્ટ્રીય સ્તરે ઝડપથી પ્રગતિ કરી છે. યુવા ખેલાડીઓની પ્રતિભા, આક્રમક ક્રિકેટ અને સતત સુધરતા પ્રદર્શનના કારણે નેપાળ હવે એસોસિયેટ દેશોમાં સૌથી મજબૂત ટીમોમાંથી એક બની ગયું છે.
ચીન સામેની આ મેચ માત્ર એક જીત નહોતી, પરંતુ નેપાળ ક્રિકેટની વધતી તાકાત અને ભવિષ્યની સંભાવનાઓનો મજબૂત સંદેશ પણ હતી. કુશલ ભુર્તેલની આ ઇનિંગ અને ટીમના 313 રનનો સ્કોર લાંબા સમય સુધી ક્રિકેટપ્રેમીઓના મનમાં જીવંત રહેશે.
