NEET પેપર લીક મામલે રાહુલ ગાંધી સમક્ષ ભાવુક બન્યા વિદ્યાર્થિનીના પિતા : કહ્યું- ‘સંસદમાં અમારો અવાજ ઉઠાવો’

NEET પેપર લીક વિવાદ ફરી એકવાર ચર્ચામાં આવ્યો છે. દેહરાદૂનમાં યોજાયેલા 'છાત્રોં કી ગૂંજ' કાર્યક્રમ દરમિયાન લોકસભાના વિરોધ પક્ષના નેતા રાહુલ ગાંધી સમક્ષ NEET પરીક્ષા બાદ આત્મહત્યા કરનાર વિદ્યાર્થીની રિયા કુમારીના પિતા રાજેશ મલ્લ ભાવુક બની ગયા હતા. તેમણે પોતાની દીકરીની વાત યાદ કરતાં સંસદમાં વિદ્યાર્થીઓની સમસ્યાનો અવાજ ઉઠાવવાની અપીલ કરી હતી. બીજી તરફ રાહુલ ગાંધીએ પેપર લીક મુદ્દે કેન્દ્ર સરકાર પર નિશાન સાધતા કહ્યું કે પેપર લીકની સમસ્યાએ સમગ્ર વ્યવસ્થાને અસર કરી છે.

'છાત્રોં કી ગૂંજ' કાર્યક્રમમાં ઉઠ્યો NEET પેપર લીકનો મુદ્દો

દેહરાદૂનમાં કોંગ્રેસ દ્વારા આયોજિત 'છાત્રોં કી ગૂંજ' કાર્યક્રમમાં રાહુલ ગાંધીએ દેશની પરીક્ષા વ્યવસ્થા અને પેપર લીકના મુદ્દા પર સરકારને ઘેરી હતી. કાર્યક્રમ દરમિયાન તેમણે NEET પેપર લીક બાદ આત્મહત્યા કરનાર વિદ્યાર્થીની રિયા કુમારીના પિતા રાજેશ મલ્લને મંચ પર આમંત્રિત કર્યા હતા જેથી તેઓ પોતાની વાત સીધી રીતે રજૂ કરી શકે.

રાહુલ ગાંધીએ કહ્યું કે દેશની પરીક્ષા પ્રણાલી સામે ઉભી થયેલી પેપર લીક જેવી સમસ્યા ગંભીર છે અને તેનો પ્રભાવ લાખો વિદ્યાર્થીઓના ભવિષ્ય પર પડી રહ્યો છે. તેમના જણાવ્યા મુજબ પેપર લીકની સમસ્યા સમગ્ર સિસ્ટમમાં ઊંડે સુધી ફેલાઈ ગઈ છે.

‘મારી દીકરી ખૂબ ખુશ હતી, પરંતુ પેપર લીકના સમાચાર બાદ તૂટી ગઈ’

રાજેશ મલ્લે જણાવ્યું કે તેમની દીકરી રિયા NEETની પરીક્ષા આપીને ખૂબ ખુશ ઘરે આવી હતી. તેણે પરિવારને કહ્યું હતું કે તેનું પેપર ખૂબ સારું ગયું છે અને તે પરિણામ અંગે આત્મવિશ્વાસ ધરાવતી હતી. પરંતુ થોડા દિવસ બાદ જ્યારે પેપર લીક થયાના સમાચાર સામે આવ્યા ત્યારે રિયાએ પોતાના પિતાને મોબાઇલમાં સમાચાર બતાવી કહ્યું કે ફરી એકવાર વિદ્યાર્થીઓ સાથે અન્યાય થયો છે.

તેમણે જણાવ્યું કે શરૂઆતમાં તેમને લાગ્યું કે કદાચ આ અફવા હશે, પરંતુ બાદમાં માહિતી સાચી હોવાનું જાણવા મળ્યું. ત્યારથી તેમની દીકરી સતત ચિંતામાં રહેવા લાગી હતી અને તેને લાગતું હતું કે મહેનત છતાં વિદ્યાર્થીઓને યોગ્ય ન્યાય મળતો નથી.

‘વિદ્યાર્થીઓ માટે કડક નિયમો, પરંતુ પેપર કેવી રીતે લીક થાય?’

રિયા કુમારીના પિતાએ જણાવ્યું કે તેમની દીકરી પરીક્ષા વ્યવસ્થાને લઈને ખૂબ નારાજ હતી. તે વારંવાર પૂછતી હતી કે જ્યારે પરીક્ષા કેન્દ્રમાં વિદ્યાર્થીઓ માટે એટલી કડક તપાસ થાય છે, હાથમાં દોરો પહેરીને પણ અંદર જવાની મંજૂરી મળતી નથી, ત્યારે પ્રશ્નપત્ર બહાર કેવી રીતે પહોંચી જાય છે?

રાજેશ મલ્લના જણાવ્યા અનુસાર તેમણે દીકરીને સમજાવવાનો પ્રયાસ કર્યો કે સિસ્ટમમાં ખામીઓ છે, પરંતુ તેને બદલી શકવી સરળ નથી. જોકે રિયા આ જવાબથી સંતુષ્ટ નહોતી અને તેને લાગતું હતું કે મહેનત કરનાર વિદ્યાર્થીઓ સાથે અન્યાય થઈ રહ્યો છે.

રોજ 10 કલાક અભ્યાસ કરતી હતી રિયા

પિતાએ જણાવ્યું કે તેમની દીકરી રોજ આશરે 10 કલાક સુધી અભ્યાસ કરતી હતી અને ડૉક્ટર બનવાનું તેનું સ્વપ્ન હતું. પેપર લીકના સમાચાર બાદ તે સતત માનસિક તણાવમાં રહેવા લાગી હતી. તેણે પોતાના પિતાને કહ્યું હતું કે જો પરીક્ષા ફરી લેવાશે તો ફરીથી એટલી જ તૈયારી કરવી તેના માટે ખૂબ મુશ્કેલ બનશે.

રાજેશ મલ્લે જણાવ્યું કે તેમણે દીકરીને વધુ ચિંતા ન કરવા સમજાવ્યું હતું, પરંતુ તે પરીક્ષા આયોજક સંસ્થા NTAની કામગીરીથી ખૂબ નારાજ હતી અને આખી ઘટનાનો તેના મન પર ઊંડો પ્રભાવ પડ્યો હતો.

રાહુલ ગાંધી સમક્ષ રડી પડ્યા પિતા, સંસદમાં મુદ્દો ઉઠાવવાની કરી અપીલ

પોતાની વાત રજૂ કરતાં કરતાં રાજેશ મલ્લ ભાવુક બની ગયા અને તેમની આંખોમાંથી આંસુ વહેવા લાગ્યા. તેમણે રાહુલ ગાંધીને અપીલ કરી કે દેશની શિક્ષણ વ્યવસ્થાને વધુ પારદર્શક અને વિશ્વસનીય બનાવવામાં આવે જેથી અન્ય કોઈ પરિવારને આવી પીડાનો સામનો ન કરવો પડે.

તેમણે કહ્યું કે તેમની એક જ ઈચ્છા છે કે તેમની દીકરી સાથે જે બન્યું તે બીજી કોઈ દીકરી અથવા વિદ્યાર્થી સાથે ન બને. સાથે જ તેમણે રાહુલ ગાંધીને સંસદમાં વિદ્યાર્થીઓના હિતમાં આ મુદ્દો જોરદાર રીતે ઉઠાવવાની વિનંતી કરી.