નાસિક: મહારાષ્ટ્રના નાસિક જિલ્લામાં આગામી 24 કલાક અત્યંત પડકારજનક બની શકે છે. ભારતીય હવામાન વિભાગ (IMD) દ્વારા 8 જુલાઈ સુધી અતિભારે વરસાદ અને કેટલાક વિસ્તારોમાં વાદળ ફાટવા જેવી સ્થિતિ સર્જાવાની આશંકા વ્યક્ત કરવામાં આવતા સમગ્ર જિલ્લાને હાઈ એલર્ટ પર મૂકવામાં આવ્યો છે. સાવચેતીના ભાગરૂપે જિલ્લા પ્રશાસને મંગળવારે તમામ સરકારી અને ખાનગી શાળાઓ તેમજ કોલેજોમાં રજા જાહેર કરી છે. સાથે જ ભક્તોની સુરક્ષાને ધ્યાનમાં રાખીને ત્ર્યંબકેશ્વર જ્યોતિર્લિંગ મંદિર અને માતા સપ્તશૃંગી મંદિરને પણ એક દિવસ માટે બંધ રાખવાનો નિર્ણય લેવામાં આવ્યો છે.
જિલ્લા વહીવટી તંત્રે નાગરિકોને બિનજરૂરી રીતે ઘરની બહાર ન નીકળવા, નદી-નાળા અને ધોધ નજીક ન જવા તેમજ હવામાન વિભાગની સૂચનાઓનું પાલન કરવાની અપીલ કરી છે. સમગ્ર જિલ્લામાં આપત્તિ વ્યવસ્થાપન તંત્ર, પોલીસ, આરોગ્ય વિભાગ અને અન્ય સરકારી એજન્સીઓને એલર્ટ પર રાખવામાં આવી છે.
ત્ર્યંબકેશ્વર વિસ્તારમાં 300 મીમી સુધી વરસાદની સંભાવના
નાસિકના કલેક્ટર આયુષ પ્રસાદે જણાવ્યું કે અરબ સાગરમાં સર્જાયેલા લો-પ્રેશર સિસ્ટમના કારણે ત્ર્યંબકેશ્વર, ઇગતપુરી અને નાસિકના પશ્ચિમ વિસ્તારોમાં અત્યંત ભારે વરસાદ નોંધાઈ શકે છે. કેટલાક વિસ્તારોમાં આશરે 300 મિલીમીટર સુધી વરસાદ પડવાની સંભાવના છે, જેના કારણે વાદળ ફાટવા જેવી સ્થિતિ અને અચાનક પૂરનું જોખમ પણ વધી શકે છે.
પ્રશાસનનું કહેવું છે કે નીચાણવાળા વિસ્તારો, નદી કિનારાના ગામો અને પહાડી વિસ્તારોમાં રહેતા લોકો વિશેષ સાવચેતી રાખે. ખેડૂતોને પણ વરસાદની તીવ્રતા ઓછી થાય ત્યાં સુધી ખેતરમાં ન જવાની સલાહ આપવામાં આવી છે.
શાળા-કોલેજો અને ધાર્મિક સ્થળો રહેશે બંધ
વિદ્યાર્થીઓ અને ભક્તોની સુરક્ષા સર્વોચ્ચ પ્રાથમિકતા હોવાનું જણાવી જિલ્લા પ્રશાસને સમગ્ર નાસિક જિલ્લામાં મંગળવારે તમામ શાળા-કોલેજો બંધ રાખવાનો આદેશ આપ્યો છે. આ ઉપરાંત દરરોજ હજારો શ્રદ્ધાળુઓ આવતા ત્ર્યંબકેશ્વર જ્યોતિર્લિંગ મંદિર અને સપ્તશૃંગી દેવી મંદિર પણ બંધ રહેશે. આ નિર્ણયનો હેતુ ભારે વરસાદ દરમિયાન ભીડને નિયંત્રિત કરવાનો અને કોઈ અનિચ્છનીય ઘટના ટાળવાનો હોવાનું પ્રશાસને જણાવ્યું છે.
સાપ્તાહિક બજારો અને પ્રવાસન સ્થળો પર પ્રતિબંધ
ભારે વરસાદ અને ભૂસ્ખલનના જોખમને ધ્યાનમાં રાખીને ત્ર્યંબકેશ્વર, ઇગતપુરી, નાસિક ગ્રામ્ય, પેઠ, ડિંડોરી અને સુરગાણા તાલુકામાં યોજાતા સાપ્તાહિક બજારો પણ રદ કરવામાં આવ્યા છે.
તે ઉપરાંત ધોધ, કિલ્લાઓ અને અન્ય પ્રવાસન સ્થળોએ લોકોની અવરજવર પર નિયંત્રણ મૂકવામાં આવ્યું છે. પોલીસ, હોમગાર્ડ અને આપત્તિ વ્યવસ્થાપન ટીમોને સંવેદનશીલ સ્થળોએ તૈનાત કરવામાં આવી છે જેથી કોઈ પણ કટોકટીની સ્થિતિમાં તાત્કાલિક બચાવ કામગીરી હાથ ધરી શકાય.
ભૂસ્ખલન અને પૂર સામે તંત્રની ખાસ તૈયારી
જિલ્લા પ્રશાસને ભારે વરસાદને ધ્યાનમાં રાખીને ભૂસ્ખલનની શક્યતા ધરાવતા માર્ગો પર સતત નજર રાખવાનું શરૂ કર્યું છે. જરૂર પડ્યે કેટલાક માર્ગો અસ્થાયી ધોરણે બંધ કરવાની તૈયારી પણ કરવામાં આવી છે.
મુંબઈ-દિલ્હી રેલવે રૂટનો મહત્વનો ભાગ ઇગતપુરીમાંથી પસાર થતો હોવાથી ભારતીય રેલવેને પણ સતર્ક રહેવા સૂચના આપવામાં આવી છે. ભારે વરસાદને કારણે ટ્રેક પર કોઈ અસર થાય તો તાત્કાલિક કાર્યવાહી માટે વિશેષ ટીમો તૈયાર રાખવામાં આવી છે.
ડેમમાંથી પાણી છોડાયું, આરોગ્ય વિભાગ એલર્ટ
વધતા વરસાદ અને જળસ્તરને ધ્યાનમાં રાખીને નાંદુર-મધ્યમેશ્વર ડેમમાંથી નિયંત્રિત રીતે પાણી છોડવાની કાર્યવાહી શરૂ કરવામાં આવી છે. ડેમની આસપાસના વિસ્તારોમાં રહેતા લોકોને પણ સાવચેત રહેવા જણાવાયું છે.
સંભવિત આપત્તિને પહોંચી વળવા માટે આરોગ્ય વિભાગના તમામ અધિકારીઓ અને કર્મચારીઓની રજાઓ રદ કરી દેવામાં આવી છે. હોસ્પિટલો, એમ્બ્યુલન્સ સેવા અને ઈમરજન્સી રિસ્પોન્સ ટીમોને પણ તૈયાર રાખવામાં આવી છે.
મુખ્યમંત્રી ફડણવીસે અધિકારીઓને આપ્યા ખાસ નિર્દેશ
મહારાષ્ટ્રના મુખ્યમંત્રી દેવેન્દ્ર ફડણવીસે જણાવ્યું છે કે રાજ્ય સરકાર નાસિકની પરિસ્થિતિ પર સતત નજર રાખી રહી છે. તેમણે તમામ સંબંધિત વિભાગોને સંકલન સાથે કામગીરી કરવાની અને કોઈ પણ પ્રકારની આપત્તિ સર્જાય તો તાત્કાલિક રાહત અને બચાવ કામગીરી શરૂ કરવા સૂચના આપી છે. મુખ્યમંત્રીએ કહ્યું કે આગામી દિવસો હવામાનની દૃષ્ટિએ અત્યંત મહત્વપૂર્ણ છે અને લોકોને પણ સત્તાવાર સૂચનાઓનું પાલન કરીને અનાવશ્યક મુસાફરી ટાળવી જોઈએ.
આ પણ વાંચો: કોણ છે ચંપત રાયની જગ્યાએ નવા મહાસચિવ બનેલા રિટાયર્ડ IFS કૃષ્ણ મોહન? : રામ મંદિર ટ્રસ્ટના બનાવાયા વચગાળાના મહાસચિવ
નાગરિકોને સાવચેતી રાખવાની અપીલ
પ્રશાસને લોકોને નદી, નાળા, ધોધ અને પાણી ભરાયેલા વિસ્તારોમાં ન જવાની, વરસાદ દરમિયાન પહાડી વિસ્તારોમાં પ્રવાસ ટાળવાની અને માત્ર સત્તાવાર માહિતી પર વિશ્વાસ રાખવાની અપીલ કરી છે. આગામી 48 કલાક સુધી સમગ્ર નાસિક જિલ્લામાં પરિસ્થિતિ પર સતત નજર રાખવામાં આવશે અને જરૂરિયાત મુજબ વધુ પ્રતિબંધાત્મક પગલાં લેવામાં આવી શકે છે.
