"કમર પર હાથ મૂક્યો અને અશ્લીલ ઈશારા કર્યા" : હરિયાણામાં મૌની રોયની થઈ છેડતી! એક્ટ્રેસે સોશિયલ મીડિયામાં ઠાલવ્યો રોષ

બોલીવુડ અને ટેલિવિઝનની લોકપ્રિય અભિનેત્રી મૌની રોય હાલમાં એક ખૂબ જ ખરાબ અનુભવને કારણે ચર્ચામાં છે. હરિયાણાના કરનાલમાં એક ઈવેન્ટ દરમિયાન મૌનીએ જાતીય સતામણી (Harassment) નો સામનો કરવો પડ્યો હોવાનો ચોંકાવનારો ખુલાસો કર્યો છે. મૌનીએ જણાવ્યું કે કેવી રીતે કેટલાક લોકોએ સ્ટેજ પર તેની સાથે અભદ્ર વર્તન કર્યું અને તેની ગરિમાને ઠેસ પહોંચાડી. આ ઘટના બાદ મૌની અત્યંત ગુસ્સામાં સ્ટેજ છોડીને જતી રહી હતી, જેનો એક વીડિયો હાલ સોશિયલ મીડિયા પર વાયુવેગે વાયરલ થઈ રહ્યો છે.

'દાદાની ઉંમરના લોકોએ કમર પર હાથ રાખ્યો': મૌનીની આપવીતી

મૌની રોયે પોતાની ઇન્સ્ટાગ્રામ સ્ટોરી પર એક લાંબી નોટ લખીને આખી ઘટનાનું વર્ણન કર્યું છે. તેણે લખ્યું કે, "ગઈકાલે રાત્રે કરનાલમાં એક ઈવેન્ટ હતી અને ત્યાં આવેલા મહેમાનો, ખાસ કરીને બે વ્યક્તિઓ કે જેની ઉંમર દાદા બનવા જેવી છે, તેમના વર્તનથી હું ખૂબ જ નારાજ છું. જેવી હું સ્ટેજ પર ગઈ, તે લોકો અને પરિવારના અન્ય પુરુષ સભ્યોએ ફોટો પડાવવાના બહાને મારી કમર પર હાથ રાખ્યો હતો." મૌનીએ જ્યારે તેમને હાથ હટાવવાનું કહ્યું ત્યારે તેમને આ વાત ગમી નહોતી.

સ્ટેજ પર અશ્લીલ ઈશારા અને ગુલાબ ફેંક્યા

મૌનીએ વધુમાં જણાવ્યું કે સ્ટેજ પરની સ્થિતિ તો વધુ ખરાબ હતી. બે વ્યક્તિઓ સ્ટેજની બિલકુલ સામે ઉભા રહીને અશ્લીલ વાતો કરી રહ્યા હતા અને અભદ્ર ઈશારા કરતા હતા. મૌનીએ લખ્યું, "મેં તેમને શાંતિથી ઈશારો કર્યો કે આવું ન કરો, તો તેમણે મારા પર ગુલાબના ફૂલો ફેંકવાનું શરૂ કરી દીધું. કેટલાક લોકો તો નીચેથી 'લો એંગલ' થી વીડિયો બનાવી રહ્યા હતા. અમે કોઈની ખુશીમાં સામેલ થવા જઈએ છીએ, પણ અમારી સાથે આવું વર્તન કરવામાં આવે છે."

વાયરલ વીડિયો અને લોકોનો પ્રતિસાદ

સોશિયલ મીડિયા પ્લેટફોર્મ Reddit પર એક વીડિયો વાયરલ થયો છે જેમાં મૌની સિલ્વર ડ્રેસમાં ડાન્સ કરતી જોવા મળે છે. વીડિયોમાં જોઈ શકાય છે કે તે ખૂબ જ ગુસ્સામાં છે અને સ્ટેજની સામે ઉભેલા લોકોને સચોટ જવાબ આપીને ત્યાંથી નીકળી જાય છે. આ વીડિયો સામે આવ્યા પછી યુઝર્સ મૌનીના સમર્થનમાં આવ્યા છે. લોકો કહી રહ્યા છે કે, "પૈસા આપીને બોલાવવાનો અર્થ એ નથી કે તમે કોઈની છેડતી કરી શકો." લોકોએ ઈવેન્ટની સિક્યોરિટી પર પણ સવાલો ઉઠાવ્યા છે.

ગરિમા અને સ્વમાનને પ્રાથમિકતા

મૌની રોયના આ પગલાના ચારેબાજુ વખાણ થઈ રહ્યા છે. તેણે સાબિત કરી દીધું કે ગમે તેટલી મોટી ઈવેન્ટ હોય કે પૈસા, પોતાના સ્વમાન અને સુરક્ષાથી ઉપર કંઈ જ નથી. આ ઘટના બોલીવુડ સેલિબ્રિટીઝની સુરક્ષા અને જાહેર કાર્યક્રમોમાં લોકોની માનસિકતા પર ફરી એકવાર ગંભીર પ્રશ્નાર્થ ચિહ્ન મૂકે છે.