Surat Mother-Son Case : સુરતના અલથાણ વિસ્તારમાં એક હૃદયવિદારી ઘટના સામે આવી છે, એક માતાએ તેમના પાંચ વર્ષના માસૂમ પુત્ર સાથે બિલ્ડિંગ પરથી આપઘાતનો પ્રયાસ કર્યો હતો. આ ઘટનામાં બાળકનું સ્થળ પર જ કરુણ મોત નીપજ્યું હતું, જ્યારે માતા ગંભીર રીતે ઈજાગ્રસ્ત હાલતમાં મળી આવી હતી.
માતાએ પુત્ર સાથે 14મા માળેથી લગાવી છલાંગ
પ્રાપ્ત માહિતી મુજબ, ભટાર ચોકી વિસ્તારમાં આવેલા સુમન અમૃત આવાસ ખાતે આ ઘટના બની હતી. માતાએ બાળક સાથે બિલ્ડિંગના 14 માળેથી નીચે પડ્યા હોવાનું સામે આવ્યું છે. ઊંચાઈને કારણે બાળકને ગંભીર ઈજાઓ થતાં તેનું ઘટનાસ્થળે જ મોત થયું હતું, જ્યારે માતાને તાત્કાલિક સારવાર માટે સુરત સિવિલ હોસ્પિટલમાં ખસેડવામાં આવી છે, જ્યાં તેમની હાલત ગંભીર હોવાનું જાણવા મળ્યું છે.
પોલીસે તપાસ હાથધરી
ઘટનાની જાણ થતાં જ પોલીસનો કાફલો ઘટનાસ્થળે દોડી આવ્યો હતો. પોલીસે જરૂરી કાર્યવાહી હાથ ધરી છે અને હાલ અકસ્માત મોતનો ગુનો નોંધ્યો છે. આટલું ગંભીર પગલું કેમ ભરાયું તેની પાછળના કારણો જાણવા માટે પોલીસ દ્વારા ઉંડાણપૂર્વક તપાસ શરૂ કરવામાં આવી છે.
માતા હોસ્પિટલમાં દાખલ
અલથાણ પીઆઈ ભાવેશ રબારીએ જણાવ્યું હતું કે, આજે સવારે અંદાજે 10:30 વાગ્યાની આસપાસ આશરે 30 વર્ષની મહિલા પોતાના બાળક સાથે બિલ્ડિંગમાં દુર્ઘટનાગ્રસ્ત થઈ હતી. આ ઘટનામાં બાળકનું મૃત્યુ થયું છે અને મહિલાને સારવાર માટે સિવિલ હોસ્પિટલમાં દાખલ કરવામાં આવી છે
