UAPA: ભારત સરકારે આતંકવાદ સામે વધુ એક કડક પગલું ભર્યું છે. કેન્દ્રીય ગૃહ મંત્રાલયે ગેરકાયદેસર પ્રવૃત્તિઓ નિવારણ અધિનિયમ (UAPA) હેઠળ લશ્કર-એ-તૈયબા (LeT) અને જૈશ-એ-મોહમ્મદ (JeM) સાથે સંકળાયેલા 23 વ્યક્તિઓને આતંકવાદી જાહેર કરતા ગેઝેટ નોટિફિકેશન બહાર પાડ્યું છે. સરકારનું કહેવું છે કે આ તમામ વ્યક્તિઓ આતંકવાદી ભરતી, તાલીમ, નાણાંકીય સહાય, શસ્ત્રોની સપ્લાય, સરહદ પાર ઘૂસણખોરી અને ભારતમાં આતંકવાદી હુમલાઓના કાવતરામાં સંડોવાયેલા રહ્યા છે.
ગૃહ મંત્રાલયે ગેઝેટ નોટિફિકેશન જાહેર કર્યું
4 જુલાઈ, 2026ના રોજ જાહેર કરાયેલા ગેઝેટ નોટિફિકેશનમાં કુલ 23 વ્યક્તિઓના નામ સામેલ કરવામાં આવ્યા છે. કેન્દ્ર સરકારના જણાવ્યા મુજબ, આ તમામ લોકો પાકિસ્તાન સ્થિત આતંકવાદી સંગઠનો લશ્કર-એ-તૈયબા અને જૈશ-એ-મોહમ્મદ સાથે સીધા અથવા પરોક્ષ રીતે જોડાયેલા છે. સરકારના જણાવ્યા મુજબ, આ વ્યક્તિઓ આતંકવાદી નેટવર્કને મજબૂત બનાવવા માટે ભરતી, તાલીમ, ભંડોળ એકત્ર કરવું, શસ્ત્રો પહોંચાડવા, આતંકીઓને ભારતમાં ઘૂસાડવા અને હુમલાની યોજના ઘડવા જેવી પ્રવૃત્તિઓમાં સક્રિય રહ્યા હતા.
સુંજવાન અને નગરોટા હુમલા સાથે જોડાયેલા નામો પણ સામેલ
ગેઝેટ નોટિફિકેશનમાં એવા કેટલાક લોકોના નામ પણ સામેલ કરવામાં આવ્યા છે, જેમના પર અગાઉ થયેલા આતંકવાદી હુમલાઓમાં સંડોવણીના આરોપ છે. સરકારના જણાવ્યા અનુસાર, મસૂદ ઇલ્યાસ કાશ્મીરી પર વર્ષ 2022માં સુંજવાન આર્મી કેમ્પ હુમલાના કાવતરામાં સામેલ હોવાનો આરોપ છે. જ્યારે મોહમ્મદ મુસાદ્દીક પર ઘૂસણખોરીનું આયોજન અને આતંકવાદી કામગીરીનું સંકલન કરવાનો આરોપ મૂકવામાં આવ્યો છે. તે જ રીતે મુફ્તી મોહમ્મદ અસગર ખાનને વર્ષ 2016ના નગરોટા આર્મી કેમ્પ હુમલા સાથે જોડાયેલા ઘૂસણખોરી નેટવર્કનો મુખ્ય સંચાલક ગણાવવામાં આવ્યો છે.
નગરોટા હુમલાના આરોપીઓ સામે પણ કાર્યવાહી
યાદીમાં હાફિઝ અબ્દુલ શકૂરનું નામ પણ સામેલ છે. તેના પર નગરોટા હુમલા પહેલા સ્થાનિક નેટવર્ક સાથે સંપર્ક સ્થાપિત કરીને આતંકવાદીઓને મદદ કરવાનો આરોપ છે. આ ઉપરાંત અબ્દુલ્લા જેહાદી ઉર્ફે શાહ નવાઝ (અલ હિજામા) પર નગરોટા હુમલામાં સામેલ આતંકવાદીઓને સહયોગ આપવાનો તેમજ જૈશ-એ-મોહમ્મદના અનેક તાલીમ કેમ્પો ચલાવવાનો આરોપ છે.
શસ્ત્રોની સપ્લાય અને ઘૂસણખોરીમાં સંડોવણીનો આરોપ
ગૃહ મંત્રાલયે જાહેર કરેલી માહિતી મુજબ ફિરદોસ અહેમદ ભટને લશ્કર-એ-તૈયબાનો લોન્ચિંગ કમાન્ડર ગણાવવામાં આવ્યો છે, જે ઘૂસણખોરી અને લોજિસ્ટિક સપોર્ટમાં સંડોવાયેલો હોવાનું જણાવાયું છે. તેમજ બિલાલ અહેમદ મીર ઉર્ફે અહેમદ ભાઈ પર લશ્કર-એ-તૈયબા અને ધ રેઝિસ્ટન્સ ફ્રન્ટ (TRF) માટે સરહદ પારથી શસ્ત્રોની સપ્લાય અને આતંકવાદી કામગીરીને સહયોગ આપવાનો આરોપ છે. તેના નામનો પણ UAPA હેઠળ જાહેર કરાયેલા આતંકવાદીઓની યાદીમાં સમાવેશ કરવામાં આવ્યો છે.
UAPA શું છે?
ગેરકાયદેસર પ્રવૃત્તિઓ નિવારણ અધિનિયમ (Unlawful Activities Prevention Act-UAPA) ભારતનો મુખ્ય આતંકવાદ વિરોધી કાયદો છે. આ કાયદાનો હેતુ દેશની સાર્વભૌમતા, અખંડિતતા અને સુરક્ષા સામેની ગેરકાયદેસર તેમજ આતંકવાદી પ્રવૃત્તિઓને રોકવાનો છે. વર્ષ 2019માં કરવામાં આવેલા મહત્વપૂર્ણ સુધારા બાદ કેન્દ્ર સરકારને માત્ર સંગઠન જ નહીં, પરંતુ વ્યક્તિને પણ આતંકવાદી જાહેર કરવાની સત્તા આપવામાં આવી હતી. જો કોઈ વ્યક્તિ આતંકવાદી પ્રવૃત્તિઓમાં સંડોવાયેલી હોવાનું માનવામાં આવે, તો તેને UAPA હેઠળ આતંકવાદી જાહેર કરી શકાય છે.
આ પણ વાંચો: કાશી વિશ્વનાથ મંદિર પરિસરમાં ફાયરિંગથી દોડધામ : PAC જવાનની બંદૂકમાંથી છૂટી ગોળી, ત્રણ લોકો થયા ઈજાગ્રસ્ત
આ કાર્યવાહીનું મહત્વ શું છે?
સુરક્ષા નિષ્ણાતોના મતે, UAPA હેઠળ વ્યક્તિઓને આતંકવાદી જાહેર કરવાથી તેમની સામે તપાસ અને કાનૂની કાર્યવાહી વધુ અસરકારક બની શકે છે. આવી કાર્યવાહી આંતરરાષ્ટ્રીય સ્તરે પણ આતંકવાદી નેટવર્ક સામે ભારતના વલણને મજબૂત બનાવે છે અને આતંકવાદને નાણાકીય તથા લોજિસ્ટિક સપોર્ટ આપતા તત્વો સામે કડક સંદેશ આપે છે. કેન્દ્ર સરકારનું કહેવું છે કે આતંકવાદ અને તેની સાથે જોડાયેલા તમામ નેટવર્ક સામે ઝીરો ટોલરન્સની નીતિ હેઠળ સતત કાર્યવાહી કરવામાં આવી રહી છે.
