મધ્ય-પૂર્વના દેશોમાં યુદ્ધ જેવી સ્થિતિ અને વધતા તણાવને ધ્યાનમાં રાખીને ભારત સરકાર એક્શન મોડમાં આવી ગઈ છે. સાવચેતીના ભાગરૂપે દેશના તમામ મુખ્ય આંતરરાષ્ટ્રીય હવાઈ મથકોને હાઈ એલર્ટ પર રાખવામાં આવ્યા છે. ઈરાન પર અમેરિકી હુમલા બાદ સર્જાયેલી અસ્થિરતાને જોતા નાગરિક ઉડ્ડયન મંત્રી કે. રામમોહન નાયડુએ નવી દિલ્હીમાં એક ઉચ્ચ સ્તરીય સમીક્ષા બેઠક યોજી હતી.
એરપોર્ટ્સને સજ્જ રહેવા આદેશ
સંભવિત ફ્લાઈટ ડાયવર્ઝન અને ઈમરજન્સી લેન્ડિંગની આશંકાને પગલે એરપોર્ટ ઓથોરિટી ઓફ ઈન્ડિયા (AAI) અને ખાનગી એરપોર્ટ ઓપરેટરોને કડક સૂચના આપવામાં આવી છે. ગ્રાઉન્ડ હેન્ડલિંગ, પાર્કિંગ બે, ઈમિગ્રેશન સહાય અને ક્રૂ લોજિસ્ટિક્સ જેવી તમામ સુવિધાઓને વધુ સુદ્રઢ બનાવવા જણાવાયું છે. મંત્રાલયે સ્પષ્ટ કર્યું છે કે મુસાફરો અને વિમાનના ક્રૂ મેમ્બર્સની સુરક્ષા સરકારની સર્વોચ્ચ પ્રાથમિકતા છે.
ઉડ્ડયન મંત્રીના મહત્વના નિર્દેશો
વીડિયો કોન્ફરન્સ દ્વારા યોજાયેલી આ બેઠકમાં DGCA, એરપોર્ટ ઓથોરિટી અને વિવિધ એરલાઈન ઓપરેટરો હાજર રહ્યા હતા. મંત્રી નાયડુએ ખાસ કરીને મધ્ય-પૂર્વના એરસ્પેસમાં લાદવામાં આવેલા પ્રતિબંધો (NOTAM) અંગે ગંભીર ચર્ચા કરી હતી. તેમણે સૂચના આપી છે કે:
તમામ એરલાઈન્સ અન્ય દેશો દ્વારા જારી કરવામાં આવતી એરસ્પેસ એડવાઈઝરી પર સતત નજર રાખે.
જરૂર જણાય તો વૈશ્વિક સુરક્ષા પ્રોટોકોલ મુજબ ફ્લાઈટના રૂટ બદલવામાં આવે.
DGCA ને ક્રૂ ડ્યુટી ટાઈમ લિમિટેશન (CDTL) અને સુરક્ષાના નિયમોનું કડક પાલન કરાવવા આદેશ અપાયો છે.
Air India અને IndiGoની ફ્લાઈટ્સ પર અસર
વર્તમાન સ્થિતિને જોતા Air India અને IndiGo જેવી મોટી એરલાઈન્સે અખાતી દેશો તરફ જતી પોતાની અનેક ઉડ્ડયનો રદ અથવા સ્થગિત કરી દીધી છે. Air Indiaની તેલ અવીવ (ઈઝરાયેલ) જતી એક ફ્લાઈટને સુરક્ષાના કારણોસર અધવચ્ચેથી જ પરત બોલાવી લેવામાં આવી હતી. એરલાઈન્સે અસરગ્રસ્ત મુસાફરોને વૈકલ્પિક વ્યવસ્થા અથવા સંપૂર્ણ રિફંડ આપવાની ખાતરી આપી છે.
મુસાફરો માટે એડવાઈઝરી
ઈરાન અને અમેરિકા વચ્ચેના તણાવને કારણે લાંબા અંતરની ફ્લાઈટ્સના રૂટ બદલાતા ઈંધણના ખર્ચ અને મુસાફરીના સમયમાં વધારો થવાની શક્યતા છે. નાગરિક ઉડ્ડયન મંત્રાલયે મુસાફરોને અપીલ કરી છે કે તેઓ એરપોર્ટ પહોંચતા પહેલા પોતાની એરલાઈન સાથે સંપર્ક કરી ફ્લાઈટનું સ્ટેટસ ચોક્કસ ચેક કરી લે. સરકાર આ મામલે વિદેશ મંત્રાલય સાથે પણ સતત સંપર્કમાં છે જેથી વિદેશમાં ફસાયેલા ભારતીયોને મદદ કરી શકાય.
