જાન્યુઆરી 2026 માં ભારતીય ઓટોમોબાઈલ માર્કેટમાં 4.2 થી 4.5 મીટરની મિડ-સાઇઝ SUV કારના વેચાણમાં જોરદાર ઉછાળો જોવા મળ્યો છે. આ સેગમેન્ટમાં કુલ 74,673 યુનિટ્સનું વેચાણ થયું છે, જે જાન્યુઆરી 2025 ની સરખામણીએ અંદાજે 35 ટકા વધુ છે. નવા વર્ષની શરૂઆત સાથે જ ગ્રાહકોમાં SUV પ્રત્યેનો ક્રેઝ વધ્યો છે, પરિણામે ડિસેમ્બર 2025 ની સરખામણીએ વેચાણમાં 55 ટકાનો તોતિંગ વધારો નોંધાયો છે.
Hyundai Creta હજુ પણ સૌથી આગળ
Hyundai Creta એ ફરી એકવાર પોતાની નંબર-1 પોઝિશન જાળવી રાખી છે. જાન્યુઆરી 2026 માં Cretaના કુલ 17,921 યુનિટ્સ વેચાયા છે. જોકે આ આંકડો ગયા વર્ષ કરતા થોડો ઓછો છે, પરંતુ ડિસેમ્બરની સરખામણીએ વેચાણમાં નોંધપાત્ર સુધારો થયો છે. માર્કેટમાં વધતી હરીફાઈ છતાં Cretaના લેટેસ્ટ ફીચર્સ અને ભરોસાપાત્ર પરફોર્મન્સને કારણે ગ્રાહકોની તે પહેલી પસંદ બની રહી છે.
Maruti Victorisની શાનદાર એન્ટ્રી
Maruti Victoris એ માર્કેટમાં પ્રવેશતાની સાથે જ ધમાકો કર્યો છે. જાન્યુઆરી 2026 માં આ કારના 15,240 યુનિટ્સ વેચાયા છે, જેના કારણે તે વેચાણની યાદીમાં બીજા ક્રમે પહોંચી ગઈ છે. જોકે, Victorisની સફળતાની અસર Maruti Grand Vitara પર જોવા મળી છે, જેનું વેચાણ ઘટીને 7,030 યુનિટ્સ પર આવી ગયું છે. આનાથી સ્પષ્ટ થાય છે કે મારુતિના જ ગ્રાહકો હવે ગ્રાન્ડ વિટારાને બદલે વિક્ટોરિસ તરફ વળી રહ્યા છે.
Kia Seltos અને Tataના મોડલ્સની સ્થિતિ
Kia Seltos: નવી જનરેશન સેલ્ટોસે પણ મજબૂત દેખાવ કર્યો છે અને 10,639 યુનિટ્સનું વેચાણ નોંધાવ્યું છે. નવા અપડેટેડ ડિઝાઇન અને હાઈ-ટેક ફીચર્સ ગ્રાહકોને આકર્ષી રહ્યા છે.
Toyota HyRyder: હાઇબ્રિડ એન્જિનના વિકલ્પ સાથે હાયરાઇડરે 9,156 યુનિટ્સનું વેચાણ કર્યું છે.
Tata Sierra & Curvv: હાલમાં જ લોન્ચ થયેલી Tata Sierra એ 7,003 યુનિટ્સના વેચાણ સાથે સારી શરૂઆત કરી છે. જ્યારે Tata Curvv ના વેચાણમાં પણ ધીરે ધીરે સુધારો જોવા મળી રહ્યો છે.
EV અને અન્ય બ્રાન્ડ્સનું પ્રદર્શન
ઇલેક્ટ્રિક વ્હીકલ સેગમેન્ટમાં MG ZS EV અને Mahindraની ગાડીઓ પ્રત્યે લોકોની રુચિ વધી રહી છે. બીજી તરફ, Volkswagen Taigun અને Skoda Kushaq જેવી કારના વેચાણમાં ઘટાડો નોંધાયો છે, જે દર્શાવે છે કે નવા મોડલ્સના આગમનથી જૂની ગાડીઓ માટે સ્પર્ધા કઠિન બની છે. સમગ્રપણે જોતા, જાન્યુઆરી 2026 માં મિડ-સાઇઝ SUV સેગમેન્ટમાં Creta હજુ પણ લીડર છે, પરંતુ Victoris અને Seltos જેવી ગાડીઓ તેને કડી ટક્કર આપી રહી છે.
