JSW MG Motor India દ્વારા ફેબ્રુઆરી 2026ના વેચાણના આંકડા જાહેર કરવામાં આવ્યા છે. ગત મહિનાના 28 દિવસોમાં કંપનીએ અંદાજે 5,000 કાર્સનું વેચાણ કર્યું છે. આ રિપોર્ટમાં સૌથી ચોંકાવનારી બાબત MG Comet EV અને Hectorના વેચાણમાં થયેલો બમ્પર વધારો છે. કંપનીની સૌથી સસ્તી ઇલેક્ટ્રિક કાર Comet EVના વેચાણમાં વાર્ષિક ધોરણે 140 ટકાની વૃદ્ધિ નોંધાઈ છે, જ્યારે પોપ્યુલર મિડસાઈઝ એસયુવી Hectorના વેચાણમાં પણ 134 ટકાનો મોટો ઉછાળો જોવા મળ્યો છે. જોકે, MG ZS EV અને Astorના વેચાણમાં ઘટાડો નોંધાયો છે.
MG Windsor EV: કંપનીની નંબર 1 કાર
ફેબ્રુઆરી મહિનામાં MG Windsor EV કંપનીની સૌથી વધુ વેચાતી કાર રહી છે. આ મોડેલની કુલ 2,599 યુનિટ્સનું વેચાણ થયું છે, જે ગત વર્ષના સમાન ગાળાની સરખામણીએ 7 ટકા વધુ છે. MGના કુલ વેચાણમાં Windsor EVનો હિસ્સો 52 ટકાથી પણ વધુ રહ્યો છે, જે તેની લોકપ્રિયતા દર્શાવે છે.
બીજા ક્રમે રહી MG Hector
કંપનીની મિડસાઈઝ એસયુવી Hector અને Hector Plusની સંયુક્ત રીતે 1,204 યુનિટ્સ વેચાઈ છે. ગત વર્ષે ફેબ્રુઆરીમાં આ આંકડો માત્ર 515 યુનિટ્સ હતો, જેનો અર્થ છે કે આ વર્ષે તેમાં 134 ટકાની એન્યુઅલ ગ્રોથ જોવા મળી છે. શાનદાર ફીચર્સ અને લુક્સને કારણે ગ્રાહકોમાં આ એસયુવીની ડિમાન્ડ ફરી વધી છે.
Comet EVનું ધુઆંધાર વેચાણ
MG Comet EV ફેબ્રુઆરીમાં ત્રીજી સૌથી વધુ વેચાતી કાર બની છે. તેની કુલ 699 યુનિટ્સ વેચાઈ છે, જે ગત વર્ષના 291 યુનિટ્સની સરખામણીએ 140 ટકા વધુ છે. બેટરી રેન્ટલ ઓપ્શન સાથે આ કારની એક્સ શોરૂમ કિંમત માત્ર 4.99 લાખ રૂપિયાથી શરૂ થાય છે, જ્યારે બેટરી સાથે તેની શરૂઆતી કિંમત 7.50 લાખ રૂપિયા છે. આ આર્થિક ફાયદાને કારણે યુવાનો અને સિટી ડ્રાઈવિંગ માટે લોકો તેને વધુ પસંદ કરી રહ્યા છે.
ZS EV અને Astorના વેચાણમાં ગાબડું
મિડસાઈઝ ઇલેક્ટ્રિક એસયુવી સેગમેન્ટમાં સ્પર્ધા વધવાને કારણે MG ZS EVના વેચાણમાં 14 ટકાનો ઘટાડો નોંધાયો છે અને તેની માત્ર 344 યુનિટ્સ વેચાઈ છે. તેવી જ રીતે Astorની પણ માત્ર 111 યુનિટ્સ વેચાઈ છે, જે 58 ટકાનો ઘટાડો દર્શાવે છે. બીજી તરફ, પ્રીમિયમ એસયુવી Glosterનું એક પણ યુનિટ વેચાયું નથી. નિષ્ણાતોના મતે ગ્રાહકો હવે કંપનીની આગામી એસયુવી Majesterની રાહ જોઈ રહ્યા હોવાથી ગ્લોસ્ટરની ડિમાન્ડ ઘટી છે.
