અહેવાલ: Samir Shukla (Senior Journalist), New Jersey, USA
હોંગકોંગના તાઈ પો (Tai Po) જિલ્લામાં બુધવારે બહુમાળી રહેણાંક ઈમારતોમાં લાગેલી ભીષણ આગને કારણે ભારે જાનહાનિ થઈ છે. આ હોંગકોંગના ઇતિહાસની સૌથી ઘાતક આગની ઘટનાઓ પૈકીની એક માનવામાં આવી રહી છે. મળતી માહિતી મુજબ, આ દુર્ઘટનામાં અત્યાર સુધીમાં ઓછામાં ઓછા 36 લોકોના મોત થયા છે. આ ઉપરાંત, લગભગ 279 લોકો હજુ પણ લાપતા છે, જેમને શોધવા માટે બચાવ કામગીરી ચાલી રહી છે. અન્ય 30 લોકો હોસ્પિટલમાં સારવાર હેઠળ છે.
પવનને કારણે આગ ઝડપથી ફેલાઈ ગઈ
આગની આ ઘટના 'ન્યુ ટેરિટરીઝ' (New Territories) વિસ્તારના તાઈ પો જિલ્લામાં આવેલા એક હાઉસિંગ કોમ્પ્લેક્સમાં બની, કોમ્પ્લેક્સમાં કુલ 8 ઈમારતો છે, જેમા અંદાજે 4800 લોકો રહે છે. પ્રાથમિક તપાસમાં જાણવા મળ્યું છે કે આગ building ના બહારના ભાગમાં લગાવવામાં આવેલી વાંસની પાલખ પરથી શરૂ થઈ હતી. અને ભારે પવનને કારણે આગ ઝડપથી ફેલાઈ ગઈ અને આસપાસની સાત જેટલી બિલ્ડીંગોને પોતાની ઝપેટમાં લઈ લીધી. આગે વિકરાળ સ્વરૂપ ધારણ કરતા ફાયર બ્રિગેડ અને પોલીસ દ્વારા મોટા પાયે બચાવ કામગીરી હાથ ધરવામાં આવી છે. સેંકડો રહેવાસીઓને સુરક્ષિત સ્થળે ખસેડવામાં આવ્યા છે. આગ ઓલવવા માટે સેંકડો ફાયર ફાઈટર્સ તૈનાત કરવામાં આવ્યા છે, પરંતુ ઈમારતોની ઊંચાઈ અને પવનને કારણે કામગીરી મુશ્કેલ બની હતી.
રાષ્ટ્રપતિ શી જિનપિંગે પણ મૃતકોના પરિવારો પ્રત્યે સંવેદના વ્યક્ત કરી
આગને કાબૂમાં લેવા માટે તંત્ર દ્વારા યુદ્ધના ધોરણે કામગીરી હાથ ધરવામાં આવી છે . 140 થી વધુ ફાયર એન્જિન અને 800 થી વધુ ફાયર ફાઈટર્સ અને પેરામેડિક્સને તૈનાત કરવામાં આવ્યા છે. ડ્રોન ટેક્નોલોજીનો પણ ઉપયોગ કરવામાં આવી રહ્યો છે. હોંગકોંગના ચીફ એક્ઝિક્યુટિવ જ્હોન લી (John Lee) એ ઘટના પર દુઃખ વ્યક્ત કર્યું છે અને તપાસના આદેશ આપ્યા છે. ચીનના રાષ્ટ્રપતિ શી જિનપિંગે પણ મૃતકોના પરિવારો પ્રત્યે સંવેદના વ્યક્ત કરી છે અને બચાવ કાર્યને વેગ આપવા સૂચના આપી છે. તંત્ર દ્વારા હાલમાં આગ પર કાબૂ મેળવી લેવામાં આવ્યો છે, પરંતુ ગુમ થયેલા લોકોને શોધવા માટે સર્ચ ઓપરેશન હજુ પણ ચાલુ છે.
