First Flight Experience: કહેવાય છે કે, દીકરો જ્યારે પોતાના પગ પર ઊભો થાય ત્યારે તેનું સૌથી પહેલું સપનું પોતાના માતા-પિતાની ઈચ્છાઓ પૂરી કરવાનું હોય છે. આવો જ એક હૃદયસ્પર્શી કિસ્સો તમિલનાડુમાં સામે આવ્યો છે, જ્યાં મનીષ નામના યુવકે પોતાની માતાને વિમાનની મુસાફરી કરાવી જીવનની સૌથી યાદગાર ભેટ આપી છે. મનીષનું માનવું હતું કે તેની માતાએ આખું જીવન ઘર અને પરિવારની સંભાળ રાખવામાં વિતાવી દીધું, હવે સમય છે કે તે પોતાની માતાને દુનિયા બતાવે અને તેમની ખુશીઓનું ધ્યાન રાખે. મનીષે આ સમગ્ર મુસાફરીનો વીડિયો સોશિયલ મીડિયા પર શેર કર્યો છે, જે અત્યારે જોરદાર વાયરલ થઈ રહ્યો છે.
પરિવારની પ્રથમ મહિલા જેણે કરી 'હવાઈ સફર'
આ વાયરલ વીડિયોમાં મા-દીકરાની મુસાફરીના અત્યંત સુંદર દૃશ્યો કેદ થયા છે. મનીષની માતા જ્યારે એરપોર્ટ પર પહોંચ્યા અને ફ્લાઇટમાં અંદર ગયા ત્યારથી જ તેમના ચહેરા પર એક અનોખો સંતોષ જોવા મળતો હતો. ખાસ વાત એ છે કે, મનીષની માતા તેમના આખા પરિવારમાં વિમાનમાં બેસનારા પ્રથમ મહિલા બની ગયા છે. ફ્લાઇટની સીટ એડજસ્ટ કરવી અને વિન્ડોમાંથી બહાર આકાશના નજારા જોવા - આ બધું જ તેમના માટે જાદુઈ અનુભવ સમાન હતું.
ડરને બદલે ખુશી: ગીત ગાયું અને પછી છલકાયા આંસુ
મનીષને ચિંતા હતી કે ટેક-ઓફ સમયે કદાચ તેની માતા ડરી જશે, પરંતુ તેનાથી ઉલટું જ જોવા મળ્યું. તેની માતાએ જરાય ડર્યા વગર સમગ્ર મુસાફરીનો આનંદ માણ્યો હતો. મુસાફરી દરમિયાન તેઓ એટલા ખુશ હતા કે તેમણે એક ગીત પણ ગાયું હતું. જોકે, દીકરાના આ પ્રેમને જોઈને તેઓ અંતે ભાવુક થઈ ગયા હતા અને તેમની આંખોમાં ખુશીના આંસુ આવી ગયા હતા. આ ક્ષણે પ્લેનમાં હાજર અન્ય મુસાફરોને પણ ભાવુક કરી દીધા હતા.
સોશિયલ મીડિયા પર પ્રતિક્રિયાઓનો વરસાદ
આ વીડિયો વાયરલ થતા જ નેટીઝન્સ મનીષ પર પ્રેમ વરસાવી રહ્યા છે. લોકો કહી રહ્યા છે કે દરેક દીકરો મનીષ જેવો હોવો જોઈએ.
એક યુઝરે લખ્યું, "આ ભાઈએ તો દિલ જીતી લીધું, આનાથી મોટી કોઈ સિદ્ધિ નથી."
બીજા એક યુઝરે ભાવુક થઈને કહ્યું, "આ વીડિયો જોઈને મારું હૃદય છલકાઈ ગયું, માતા-પિતા માટે આનાથી મોટી ભેટ બીજી કોઈ હોઈ જ ના શકે."
ખાસ વાત એ છે કે, અકાસા એરલાઇને (Akasa Air) પણ આ વીડિયો પર કોમેન્ટ કરીને મનીષ અને તેની માતાને અભિનંદન પાઠવ્યા છે.
