Manipur Violence: મણિપુરમાં છેલ્લા બે વર્ષથી ચાલી રહેલા જાતિય અને સામુદાયિક તણાવ વચ્ચે ફરી એકવાર હચમચાવી નાખનારી ઘટના સામે આવી છે. કાંગપોક્પી જિલ્લામાંથી અપહરણ કરાયેલા છ લોકોના મૃતદેહ મળી આવતા સમગ્ર રાજ્યમાં ભય, શોક અને આક્રોશનું વાતાવરણ સર્જાયું છે. મૃતદેહો મળ્યાની માહિતી બહાર આવતાં જ સ્થાનિક લોકોમાં ભારે રોષ ફાટી નીકળ્યો છે, જ્યારે પીડિત પરિવારો ન્યાયની માંગ સાથે આગળ આવ્યા છે. ઉત્તર-પૂર્વ ભારતના આ સંવેદનશીલ રાજ્યમાં છેલ્લા કેટલાક સમયથી શાંતિ સ્થાપવાના પ્રયાસો ચાલી રહ્યા હતા, પરંતુ તાજેતરની આ ઘટનાએ ફરી એકવાર કાયદો-વ્યવસ્થા અને સુરક્ષા વ્યવસ્થાને લઈને ગંભીર પ્રશ્નો ઉભા કર્યા છે. ઘટનાએ માત્ર મણિપુર જ નહીં પરંતુ સમગ્ર ઉત્તર-પૂર્વીય ક્ષેત્રમાં ચિંતા વધારી દીધી છે.
24 કલાકના સર્ચ ઓપરેશન બાદ મળી આવ્યા મૃતદેહ
અધિકારીઓના જણાવ્યા અનુસાર મણિપુર પોલીસ, આસામ રાઇફલ્સ અને સીઆરપીએફની સંયુક્ત ટીમોએ સતત 24 કલાક સુધી વ્યાપક સર્ચ ઓપરેશન હાથ ધર્યું હતું. વિવિધ સંવેદનશીલ વિસ્તારોમાં તપાસ દરમિયાન છ લોકોના મૃતદેહ મળી આવ્યા હોવાનું સુરક્ષા એજન્સીઓએ જણાવ્યું છે. પ્રાથમિક માહિતી અનુસાર, આ તમામ લોકોનું અપહરણ 13 મેના રોજ કરવામાં આવ્યું હોવાનું માનવામાં આવી રહ્યું છે. સુરક્ષા દળો હજુ પણ સમગ્ર ઘટનાની તપાસ કરી રહ્યા છે અને હત્યા પાછળ જવાબદાર તત્વોની ઓળખ કરવાની કામગીરી ચાલી રહી છે.
મૃતદેહોની હાલતને લઈને ઉઠ્યા ગંભીર પ્રશ્નો
મૃતદેહો મળ્યા બાદ તેમની સ્થિતિને લઈને અનેક પ્રશ્નો ઉભા થયા છે. સ્થાનિક સંગઠનો અને સમુદાયના આગેવાનોનો આક્ષેપ છે કે મૃતદેહો અત્યંત ખરાબ અને વિકૃત હાલતમાં મળી આવ્યા હતા. આ દાવાઓને કારણે લોકોમાં વધુ રોષ ફેલાયો છે. પીડિત પરિવારો અને સામાજિક સંગઠનો દોષિતો સામે કડક કાર્યવાહી તેમજ સમગ્ર ઘટનાની નિષ્પક્ષ તપાસની માંગ કરી રહ્યા છે. વિસ્તારમાં સુરક્ષા વધારી દેવામાં આવી છે જેથી કોઈ નવી અપ્રિય ઘટના ન બને.
આ પણ વાંચો: કેરળમાં નિપાહ વાયરસનું એલર્ટ: પ્રાથમિક તપાસમાં દર્દી પોઝિટિવ, તંત્ર હાઈ-એલર્ટ પર
યુનાઇટેડ નાગા કાઉન્સિલે સરકાર સામે ઉઠાવ્યા સવાલ
ઘટના બાદ નાગા સમુદાયની અગ્રણી સંસ્થા યુનાઇટેડ નાગા કાઉન્સિલ (UNC)એ કડક વલણ અપનાવ્યું છે. સંગઠને કેટલાક વિસ્તારોમાં 24 કલાકના બંધનું એલાન કર્યું છે અને રાજ્ય સરકારની ભૂમિકાને લઈને ગંભીર સવાલો ઉઠાવ્યા છે. યુએનસીએ રાજ્યના નાયબ મુખ્યમંત્રી નેમચા કિપગેનને પદ પરથી દૂર કરવાની માંગ પણ કરી છે. સંગઠનનું કહેવું છે કે રાજ્ય સરકાર હિંસાને નિયંત્રિત કરવામાં નિષ્ફળ રહી છે અને સામાન્ય નાગરિકોની સુરક્ષા સુનિશ્ચિત કરવામાં અસરકારક પગલાં લેવામાં આવ્યા નથી.
'સસ્પેન્શન ઓફ ઓપરેશન્સ' કરાર રદ કરવાની માંગ
યુનાઇટેડ નાગા કાઉન્સિલે કેન્દ્ર સરકાર અને કેટલાક કુકી બળવાખોર જૂથો વચ્ચે થયેલા ‘સસ્પેન્શન ઓફ ઓપરેશન્સ’ (SoO) કરારને લઈને પણ વિરોધ વ્યક્ત કર્યો છે. સંગઠનનું માનવું છે કે આવા કરારો હોવા છતાં હિંસાની ઘટનાઓ અટકતી નથી અને સામાન્ય લોકોની સુરક્ષા જોખમમાં રહે છે. યુએનસીએ ચેતવણી આપી છે કે,તેમની માંગણીઓ પર યોગ્ય કાર્યવાહી નહીં થાય ત્યાં સુધી તેઓ પોતાનો વિરોધ ચાલુ રાખશે. કેટલાક અહેવાલો અનુસાર, સંગઠને મૃતદેહો સ્વીકારવાનો પણ ઇનકાર કર્યો છે.
ચર્ચ નેતાઓની હત્યાથી શરૂ થયો હતો વિવાદ
આ સમગ્ર ઘટનાની શરૂઆત 13 મેના રોજ થયેલા હુમલાથી જોડાયેલી હોવાનું માનવામાં આવે છે. તે હુમલામાં થાડોઉ સમુદાયના ત્રણ ચર્ચ નેતાઓની હત્યા કરવામાં આવી હતી. ત્યારબાદ બે પાદરીઓ સહિત અનેક લોકોના અપહરણની ઘટનાઓ સામે આવી હતી. વિવિધ અહેવાલો અનુસાર કાંગપોક્પી અને સેનાપતિ જિલ્લાઓમાં કુલ 44 નાગરિકોને બંધક બનાવવામાં આવ્યા હતા. જોકે, મહિલાઓ અને બાળકો સહિત કેટલાક લોકોને બાદમાં મુક્ત કરવામાં આવ્યા હોવાનું જણાવાયું છે. હજુ પણ સમગ્ર ઘટનાક્રમની તપાસ ચાલી રહી છે.
આ પણ વાંચો: ભારતીય મૂળના વિભવ અલ્ટેકર કોણ છે?: જેમની 'ડ્રોન બોટે' હોર્મુઝમાં 2 US પાઈલટ્સના બચાવ્યા જીવ
ઉત્તર-પૂર્વ ભારતમાં વધતી ચિંતા
મણિપુરની આ ઘટનાએ સમગ્ર ઉત્તર-પૂર્વ ભારતમાં ચિંતા વધારી છે. વિવિધ રાજકીય નેતાઓ અને સામાજિક સંગઠનોએ આ હત્યાકાંડની નિંદા કરી છે અને શાંતિ સ્થાપવા માટે તાત્કાલિક પગલાં લેવાની માંગ કરી છે.
મેઘાલયના મુખ્યમંત્રી કોનરાડ સંગમાએ ઘટનાને અત્યંત દુર્ભાગ્યપૂર્ણ ગણાવી છે. તેમણે જણાવ્યું કે રાજ્યમાં શાંતિ અને સમાધાન માટે સતત પ્રયાસો થઈ રહ્યા છે, ત્યારે આવી ઘટના બનવી ચિંતાજનક છે. તેમના મતે હિંસા કોઈપણ સમસ્યાનો ઉકેલ નથી અને સ્થાયી શાંતિ માટે તમામ પક્ષોએ સંવાદ, વિશ્વાસ અને સહયોગનો માર્ગ અપનાવવો જરૂરી છે.
